Aerenakaa

1 Tiofilu, ken kwagh u yange m hii ngeren we la, m pase hanma kwagh u Yesu hii u eren shi tesen 2 zan zan va ar sha iyange i i yem a na sha, zum u wa mbaapostoli mba tsua la kwagh sha iwasen i icighan jijingi bee kera cii la. 3 Yange ye ican kera cii yô, a tese iyol na hen a ve sha igbenda kpishi i wasen ve u fan er un lu uma mimi yô. Ve nenge a na acin imôngo ken atô u ayange 40, lu ôron kwagh u Tartor u Aôndo. 4 Kwagen la, er kohol a ve imôngo yô, a kaa a ve ér: “De undun nen Yerusalem ga, kpa keghen nen kwagh u Ter a tende zwa, u yange m ôr kwagh sha mi ne ungwa la; 5 sha ci u, jighilii yô, Yohane er ior batisema sha mnger, kpa ne yô, ica a kera gba ga je tsô a er ne batisema sha icighan jijingi.”

6 Nahan mba va kohol imôngo kwagen yô, ve pine un ér: “Tere, ka hen shighe ne u lu hiden a tartor u Iserael la her yee?” 7 A kaa a ve ér: “Gba u ne fa ashighe shin aan a i lu Ter tseegh a lu a ian i* veren la ga. 8 Kpa ne va ngohol tahav zum u icighan jijingi una sen sha a ven yô, nahan ne lu mba eren shiada sha kwagh wam ken Yerusalem man ken Yudia kua ken Samaria cii, man ken ajiir a hemban gban ica sha tar.”* 9 Ôron akaa ne been yô, i mough a na i gba yemen a na sha aôndo. Ve lu kenger, tsô ibyeenegh va yisa un, ve kera nenge a na ga. 10 Ve lu kenger sha kwavaôndo er lu yemen la, maa ica i gbe ga yô, nomsombaiorov uhar va tile ikyua a ve, a akondo a pupuu iyol, 11 ve kaa ér: “Ne ior i Galilia, er nan ne til ne kenger sha kwavaôndo nahana? Yesu u i mough a na hen a ven i yem a na sha kwavaôndo ne, er ne nenge a lu yemen sha kwavaôndo nahan, shi kape una va je la.”

12 Tsô ve hungwa sha uwo u i yilan ér Uwo u Olev la, ve hide ken Yerusalem. Uwo ne lu ikyua a Yerusalem kuma er kilomita môm nahan tseegh.* 13 Mba va nyer yô, ve unde sha ruumyou u sha, u ve luun ker la. Ve yô, lu Peteru man Yohane kua Yakobu; Anderia man Filibu; Toma man Batolomiu; Mateu man Yakobu wan u Alefeu; Shimon, ortseenshima, kua Yuda wan u Yakobu. 14 Ve cii ve lu eren msen nduuluu a awashima môm, shi kasev mbagenev kua Maria, ngô u Yesu vea anmgbianev mba Yesu mba nomso kpa lu a ve imôngo.

15 Tsô sha iyange igen la, Peteru mough tile hen atô u anmgbianev, (ingyegh ki* mba ve kohol imôngo la cii kuma er iorov 120 nahan) a kaa ér: 16 “Anmgbianev, icighan jijingi yange na Davidi ôr kwaghôron u profeti sha Yuda, ér gba hange hange u ruamabera a kure sha mi. Lu un shon je va hingir u hemen ior mba ve kôr Yesu la ye. 17 Un lu môm ken a vese, shi i tsua un ér a er tom ne vea vese. 18 (Nahan, un shon ne, yange yam ijiir sha inyaregh ki zua a mi sha ifer la, maa sen va tume ityough inya, gbor pav,* myam nam cii haa won. 19 Ior mba ken Yerusalem cii hingir u fan kwagh ne, nahan i gema yilan ijiir la ken zwa ve ér Akedama, inja na yô ér, “Inya i Awambe.”) 20 Gadia i nger ken takeda u Upasalami ér, ‘Ijiir na i teman i̱ hingir ice, ma or a̱ de tem her ga,’ shi ‘Orgen nana̱ tôô iantom na la.’ 21 Sha nahan yô, gba hange hange u ken nomso mba ve luun a vese imôngo sha ayange a Ter Yesu lu eren ityom na* hen a vese, 22 hii sha shighe u Yohane er un batisema la zan zan ar sha iyange i i tôô un hen a vese kera la, orgen ken nomso mbara nana hingir or u eren shiada vea vese imôngo er i nder un shin ku yô.”

23 Tsô ve ver iorov uhar, lu Yosev u i yilan ér Barseba, shi i yilan iti na igen ér Yusetu la, kua Matia. 24 Maa ve er msen ve kaa ér: “Yehova,* u fa asema a ior cii. Yô tese se or môm ken iorov mba uhar mban, u u tsough 25 wer nana tôô iantom ne kua ian i lun apostoli, i Yuda yange undu yem hen ijiir na la.” 26 Tsô ve er ishor, maa ishor gba sha Matia, nahan i seer un sha* mbaapostoli mba 11 mbara.