Eseta

2 Akaa ne nga been ishima i gbe Tor Ahasueru+ shimi yô, a hide a hen sha kwagh u Vaseti er la+ kua kwagh u i kure ér a er a na la.+ 2 Maa mbatomov mba tor kaa a na ér: “I ker tor anuunaukase a doonashe. 3 Tor a tsua ior ken hanma kpentar* u ken tartor na cii,+ ve kohol anuunaukase a doonashe cii ve va a mi ken Shushan,* iyou i taver,* ken iyou i ukase. I̱ wa ve sha ikyev i Hegai,+ or u eren tom ken ya u tor* u a nengen sha ukase la, shi i̱ shighe ve akaa a sôron ve iyol.* 4 Nahan gumkwase u nan hembe doon Tor la cii nana lu torkwase sha ityough ki Vaseti.”+ Mhen ne yange doo tor, man lu kwagh u er je la.

5 Oryuda ugen gema lu ken Shushan,*+ iyou i taver* la, iti na lu Mordekai+ wan u Yair wan u Shimei wan u Kishi, lu Orbenyamin+ 6 u yange i mough a na ken Yerusalem i yem a na uikyangen vea ior mba i kura ve vea Yekonia*+ tor u Yuda i yem a ve la. Nebukadinesar tor u Babilon yange yem a ve uikyangen. 7 Yange nengen sha* Hadasa,* ka Eseta je la, Eseta ne lu wan u anmgbian u ter na,+ sha ci u Eseta lu a ter ga, ngô kpaa ga. Gumkwase ne yange kuma ashe shi doo ashe kpaa. Yange ter na man ngô na mba kpen yô, Mordekai tôô un hingir wan na. 8 Zum u i yôô mkaanem ma tor kua tindi na, shi i kohol agumaukase i va a ve ken Shushan,* iyou i taver* i va ver ve sha ikyev i Hegai la,+ Eseta kpaa i va a na ken iyou i tor i va ver un sha ikyev i Hegai, or u nengen sha ukase la.

9 Yange or ne soo kwagh u gumkwase la, shi doo un a na kpaa, nahan fese je a ker gbenda ér i shighe un akaa a sôron un iyol*+ shi i naan un kwaghyan, shi a tsua agumaukase hen ya u tor ataankarahar a na ér a wasen un. Shi a tôô un kua agumaukase a a lu nengen sha na la a za ver hen ijiir i hemban doon ken iyou i ukase la. 10 Eseta yange ôr kwagh môm sha kwagh u ior nav+ shin anmgbianev nav ga, sha ci u Mordekai+ kaa a na ér a de ôron or môm ga.+ 11 Hanma iyange yô, Mordekai a va kar hen ishigh ki tembe u iyou i ukase la sha er una fa er Eseta a lu man er akaa a lu zan a na yô.

12 Hanma gumkwase yô nan lu a shighe u nan u i gbe u nana za hen Tor Ahasueru, zum u i shigh nan akaa sha u sôron nan iyol iwer 12 i bee yô, er i tese ér gba u a er a kasev mban nahan. Gadia ka gbenda u yange i gba u a shighe ve akaa a sôron ve iyol* je ne—ve shighe mkurem ma mire+ iwer ataratar shi ve shighe mkurem ma balsam*+ kua akaa agen kposo kposo a shighen sha u sôron ve iyol* iwer ataratar. 13 A̱ been yô gumkwase la nan kuma u zan hen tor, man hanma kwagh u nan sôn cii i na nan zum u nan lu moughon hen iyou i ukase yemen ken iyou i tor la. 14 Yange nan za aikighe, sev mbua aven yô nan due nan yem ken iyou i ukase i sha uhar la, nan za lu sha ikyev i Shaashigashi, or u eren tom ken ya u tor,*+ u nengen sha kasev mba tor la. Nan kera za hen tor ga, saa di doo tor a nan shi a yila nan sha iti ér i va a nan.+

15 Shighe va kom u Eseta wan u Abihail anngô u ter u Mordekai, u Mordekai tôô un hingir wan na la+ una za hen tor yô, a sôn kwagh ugen môm ga, saa kwagh u Hegai ortom u hen ya u tor, u nengen sha ukase la kaa ér a sôn la tseegh. (Hen shighe ne nahan hanma or u nana̱ nenge a Eseta cii yô kwagh na a doo nan.) 16 Tsô i za a Eseta hen iyou i Tor Ahasueru ken uwer u sha pue, ka uwer u Tebeti* je la, ken inyom i sha utaankaruhar+ i hemen na la. 17 Nahan Eseta doo tor ishima hemba kasev mbagen mbara cii, shi hemba doon un a na a anuunaukase agen la. Tsô tor kange un adikpo u torkwase shi a ver un torkwase+ sha ityough ki Vaseti.+ 18 Shi tor er zegeiniongo sha ci u mbatarev nav cii kua mbatomov nav, lu iniongo i Eseta, maa a yôô ér i na ior mba ken hanma kpentar* cii mmem, shi a na ior uiyua sha indi i tor.

19 Zum u i kohol anuunaukase*+ sha kwa har la, Mordekai tema hen hunda u ya u tor. 20 Eseta yange ôr kwagh môm sha kwagh u anmgbianev nav man ior nav ga,+ vough er Mordekai ôr ér a er nahan; a za hemen u eren kwagh u Mordekai ôr la vough er shighe u yange lu sha ikyev na la nahan.+

21 Sha ayange la, zum u Mordekai tema hen hunda u ya u tor yô, ishima vihi Bigetan man Tereshi, iorov uhar mba eren tom hen ya u tor mba ve lu mba kuran ihinda yô, nahan ve zua zwa u been a* Tor Ahasueru. 22 Kpa Mordekai gema ungwa kwagh ne, nahan fese je a ôr Torkwase Eseta. Eseta di gema ôr tor ken iti i* Mordekai. 23 Nahan i tôv sha ikyaa ne tsembelee maa i va fa er lu mimi yô. Tsô i sende iorov mba uhar mban sha kon; shi i nger akaa ne cii ken takeda u yiase i sha ashighe la, sha ishigh ki tor.+