Utor u Hiihii
19 Tso Ahaba+ ôr Yesebel+ akaa a Eliya er la cii, man er wua uprofeti mbara cii sha sanker yô.+ 2 Maa Yesebel tindi mbaôron-loho hen Eliya kaa ér: “Aluer kper hen shighe ne, m gema u u hingir er hanma ve nahan ga yô, mbaaôndo ve tsaham tsung!” 3 Nahan cier un iyol, maa a mough a gba yevese sha u una war uma na yô.+ A va nyôr hen Bersheba+ u ken Yuda,+ maa a undu wanye na her. 4 A er zende u iyange i môm a yem ken taaikyôngo, a za tema hen itinekon ugen ken toho, maa a gba tômon ér ma un kpe, a kaa ér: “Kuma nahan! Hegen yô Yehova, tôô uma wam kera,+ gadia m hemba uter av ga.”
5 Maa a yav hen itinekon u ken toho la a gba mnyam. Kpa ica i gbe ga yô, ortyom va kpoghol un,+ kaa a na ér: “Mough sha ya kwagh.”+ 6 Gem ashe yô, a nenge a beredi u vingir sha awen a tseen man mngerem ken ishegh sha ityough nagh. A ya, shi a ma, maa a hide a yav inya. 7 Shighe kar yô, ortyom u Yehova shi va sha kwa har, va kpoghol un, kaa ér: “Mough sha ya kwagh, sha ci u u ngu a gôgôzende u zan je gande.” 8 Tsô a mough sha a ya, shi a ma, nahan agee a kwaghyan la na un la, wase un a zende ayange 40 man aime 40, zan zan a za nyôr Horebi, hen uwo u Aôndo u mimi la.+
9 Nahan a kar a za nyôr ken bar,+ a tsa ker; maa nenge! Yehova va ôr kwagh a na, kaa ér: “Eliya ka nyi u lu eren heenee?” 10 A gema a kaa ér: “M tese gbashima tsung sha kwagh u Yehova Aôndo u akum a sha;+ kpa ior i Iserael undu ikyuryan you,+ shi ve hembe atse a nan nagh a ou, shi ve wua uprofeti ou sha sanker,+ ka mo tseegh m mase shin ye. Hegen yô, mba keren u tôôn uma wam kera.”+ 11 Kpa a kaa ér: “Due za tile sha uwo, sha ishigh ki Yehova.” Maa nenge! Yehova gba karen,+ shi ahumbe a vesen man a taver lu paven iwo, shi hemben avande sha ishigh ki Yehova,+ kpa Yehova lu ken ahumbe la ga. Ahumbe la nga been yô, tar tenger,+ kpa Yehova lu ken tar u u tenger la ga. 12 Tar ngu tenger ka been yô, usu due,+ kpa Yehova lu ken usu la ga. Usu la ngu been yô, imo i kundu kundu man i gban kur kur, due.+ 13 Eliya ongo imo la yô, fese je, a kange ikyondo na i profeti la sha ishi,+ a due a za tile hen zwa u bar la. Maa imo due pine un ér: “Eliya ka nyi u eren heenee?” 14 A gema a kaa ér: “M tese gbashima tsung sha kwagh u Yehova Aôndo u akum a sha; kpa ior i Iserael undu ikyuryan you,+ shi ve hembe atse a nan nagh a ou, shi ve wua uprofeti ou sha sanker, ka mo tseegh m mase shin ye. Hegen yô, mba keren u tôôn uma wam kera.”+
15 Yehova kaa a na ér: “Hide za ken taaikyôngo u Damaseku. U za nyôron yô, shighe Hasael+ mkurem a hingir tor u Shiria. 16 Shi shighe Yehu,+ wan u wan u Nimshi mkurem a hingir tor u Iserael, shi Elisha* wan u Shafati, u ken Abel-mehola la kpa, shighe un mkurem, a hingir profeti sha ityough you.+ 17 Hanma or u nana war sanker u Hasael yô,+ Yehu una wua nan;+ shi hanma or u nana war sanker u Yehu yô, Elisha una wua nan.+ 18 Shi m shi a iorov 7,000 ken Iserael her,+ mba ve cii anu a ve a gur Baal inya ga,+ shi ijô ve i suse eev nav kpaa ga yô.”+
19 Tsô a mough her, a za zua a Elisha wan u Shafati, lu kahan kwagh a anomabua 24, a i kange a ahar ahar, lu un ken hemen yô, un gema lu a ahar a masetyô la. Nahan Eliya za ape lu la, za hambe un ikyondo na i profeti+ la iyol. 20 Tsô a undu anomabua la, a zenda Eliya ijime, a za kaa ér: “Wea lumun yô, de m za suse terem man ngôm zwa, maa me hide me va dondo u ijime.” Eliya gema kaa a na ér: “Za tsô u hide, me yange u ga.” 21 Maa a hide a za kôr anomabua ahar a na nagh a mi, shi a tôô ikyon i kahan kwagh a mi la a jiidi inyam i anomabua la, a na ior ve ya. Been yô, a mough a dondo Eliya ijime, a gba eren un tom.+