Esekiel

36 “Kpa we yô wan u or, ôr kwaghôron u profeti sha iwo i Iserael, kaa wer: ‘Ne iwo i Iserael, ungwa nen kwaghôron u Yehova. 2 Yehova Ter u Hemban Cii ngu kaan nahan ér: “Orhyom ôr kwagh sha a ven kaa ér, ‘Enhen! Ajiir a taven sha a ngise la je kpa hingir a ase!’”’+

3 “Nahan ôr kwaghôron u profeti, kaa wer, ‘Yehova Ter u Hemban Cii ngu kaan ér: “Ve tim ne shi ve ta num sha a ven ken hanma vegher cii, sha er ne hingir kwagh u mba ve war* ken akuraior la yô. Shi ior mba lamen sha a ven shi wan ne akaa iyol.+ 4 Sha nahan yô, ne iwo i Iserael, ungwa nen kwaghôron u Yehova Ter u Hemban Cii! Yehova Ter u Hemban Cii ngu ôron kwagh a iwo man agungu, iagh man upev, alôgh a a hingir ice+ man agar a i undu a shi i ye ishar ker shi mba ve war ken akuraior a a kase a la ve lu lahan a la;+ 5 Yehova Ter u Hemban Cii ngu kaan a ve cii ér: ‘Me zôhô a mba ve war ken akuraior kua Edom cii sha gbashima wam+ u yeghen a yegh la. Ve mba yange ve ngohol tar wam hingir kwagh ve sha iember man sha tarnahan+ kpishi la, shi ve ngohol ajiir a u a ilev yan toho shi ve ya u ishar la.’”’+

6 “Nahan ôr kwaghôron u profeti sha tar u Iserael, kaa a iwo man agungu, iagh man upev wer, ‘Yehova Ter u Hemban Cii ngu kaan ér: “Nenge! Me ôr kwagh sha gbashima wam man sha iyugh yam, sha ci u kunya u akuraior a ne ne ye la.”’+

7 “Sha nahan yô, Yehova Ter u Hemban Cii ngu kaan ér: ‘Mo iyol yam m kende uwegh sha m bum mer akuraior a a kase ne la aa ya kunya u a.+ 8 Kpa ne iwo i Iserael, ne ta agbaa ne ume atam sha ci u ior av Iserael,+ gadia mba sôôn hiden. 9 Gadia m ngu a ven, me gema hen a ven kpaa, nahan a kaha ne shi a lôô iyiav hen a ven. 10 Me seer iyenge i ior enev, ya u Iserael cii, un cica cii. Ior a tema ken ugar,+ shi a hide a maa alôgh kpaa.+ 11 Een, me seer iyenge i ior enev kua uzendenya enev,+ vea mar vea seer kpishi. Me na a hide a tema hen a ven er ngise lu nahan.+ Shi me na ne za ikyura a hemba er yange ne vande lun la,+ nahan ne fa er mo m lu Yehova yô.+ 12 Me na ior vea zende sha a ven, ka ior av Iserael je la, vea tema hen a ven,+ ne hingir dyako ve je. Shi mayange ne kera na vea ban a ônov ga.’”+

13 “Yehova Ter u Hemban Cii ngu kaan ér: ‘Mba kaan a ven ér, “U ngu tar u u ye ior mba ker shi u ne akuraior a ou a lun a mbayev ga yô.”’ 14 ‘Sha nahan yô, u kera ya ior ga, shi u kera kar a ônov mba akuraior a ou kera kpaa ga,’ kape Yehova Ter u Hemban Cii a kaa la. 15 ‘Me kera de mer akuraior a laha u shin ior ve naha u tar ga,+ shi u kera na ior ou gbeev mbu nôngon kpaa ga,’ ka kwagh u Yehova Ter u Hemban Cii a kaa je la.”

16 Kwaghôron u Yehova shi va hen a mo kaa ér: 17 “Wan u or, zum u mba hen ya u Iserael tema hen tar ve la, ve hôngor a u sha igbenda ve man aeren a ve.+ Igbenda ve lum er ka hôngor u kwase u nan dugh won nahan.+ 18 Nahan m haa ishimavihin yam sha a ve sha ci u awambe a ve haa inya ken tar shon la,+ man sha ci u ve hôngor tar la a ieev vev mbi ndôhôrshima* mbira.+ 19 Nahan m sambe ve ken akuraior shi m tsenda ve ken ityar wue wue.+ M ôr ve ijir sha igbenda ve man sha aeren a ve la. 20 Kpa zum u ve za nyôr ken akuraior la yô, ior gba lahan icighanti wam+ sha u ôron akaa sha a ve ér, ‘Ior mban ka ior mba Yehova, nahan kpa ve due ve undu tar na.’ 21 Nahan me tese mer kwagh gbam sha kwagh u icighanti wam u yange mba hen ya u Iserael hôngor a mi ken akuraior a ve yem ker la.”+

22 “Sha nahan yô, kaa a mba hen ya u Iserael wer, ‘Yehova Ter u Hemban Cii ngu kaan ér: “Ka sha ci wen m lu eren kwagh ne ga, ne mba hen ya u Iserael, kpa ka sha ci u icighanti wam u yange ne za hôngor ken akuraior a ne yem ker la.”’+ 23 ‘Me tsegha zegeti wam+ u yange i hôngor un ken akuraior la keng je a bunde ga, u yange ne hôngor un hen atô ve la. Nahan akuraior cii aa fa er mo m lu Yehova yô,’+ ka kwagh u Yehova Ter u Hemban Cii a kaa je la, ‘zum u a tsegham hen atô wen sha ashe a ve la. 24 Me za kua a ven ken akuraior, me kura ne ken ityar la cii me hide a mi ken tar wen.+ 25 Me mishi ne mngerem ma wang iyol, nahan ne hingir wang;+ me wanger ne sha hôngor wen cii,+ man sha ieev yenev mbi ndôhôrshima la cii.+ 26 Me na ne ishima i he+ shi me wa jijingi u he ken a ven.+ Me dugh iwen-ishima ken a ven kera,+ me gema me na ne ishima i inyam.* 27 Me wa jijingi wam ken a ven, me na ne zende sha akaawan a am,+ ne waan atindiakaa a am ikyo shi ne eren sha a kpaa. 28 Nahan ne tema ken tar u yange m na uter enev la, ne lu ior av, mo di me lu Aôndo wen.’+

29 “‘Me yima ne ken hôngor wen la cii. Me yila samuyia ua va, me na ua ngee kpishi, me kera na ijen ia gba hen atô wen ga.+ 30 Me na ikyon ia ume atam kpishi shi iyiav mbi ken sule kpa mbia ngee, sha er ijen ia kera na ne ya kunya ken akuraior mayange ga yô.+ 31 Maa ne umbur igbenda yen i ifer man aeren a en a a doo ga la, nahan kwagh wen una ndôhôr ne ishima sha ci u ibo yen man aeren a en a hôngorough la.+ 32 Kpa fa nen kwagh ne: M ngu eren kwagh ne ka sha ci wen ga,’+ ka kwagh u Yehova Ter u Hemban Cii a kaa je la. ‘Kpa kunya u gema u kôr ne, va nen ahenge sha ci u igbenda yen la, ne mba hen ya u Iserael.’

33 “Yehova Ter u Hemban Cii ngu kaan ér: ‘Sha iyange i me wanger ne ibo yen cii kera la, me na a tema ken agar+ shi a hide a maa ajiir a a hingir atihi a alôgh la.+ 34 A hide a kaha kwagh ken tar u ngise u lu ice ior karen kenger la. 35 Nahan ior vea kaa ér: “Tar u ngise u lu ice la, u hingir er ka sule u Eden nahan.+ Shi agar a ngise lu alôgh shi a lu ice, i yôhôr a i haa inya la, hegen i maa a ugir shi ior tema ker.”+ 36 Nahan akuraior a a shi her, a a kase ne la aa fa er i lu mo Yehova iyol yam m maa ajiir a yange i yôhôr a la shi m môôr kwagh hen ijiir i yange i lu ice la yô. Ka mo Yehova iyol yam m ôr kwagh ne ye, shi m er un kpaa.’+

37 “Yehova Ter u Hemban Cii ngu kaan ér: ‘Shi me de mba hen ya u Iserael vea sônom ér m er kwagh ne sha ci ve: Me seer iyenge i ior vev er ka ikyumuile nahan. 38 Ior vea iv ken agar a yange hingir ice la akum akum+ er ikyum i uicighanmbaiorov nahan, er ikyum i ken Yerusalem* sha shighe u uiniongo nav nahan.+ Nahan vea fa er mo m lu Yehova yô.’”