Ka iwuese i Davidi.
א [Alefa]
145 Me wuese we, we tor wam man Aôndo wam,+
Me wuese iti you, zan zan gbem sha won.+
ב [Beti]
2 Me wuese we pepe zan zan tugh;+
Me wuese iti you, zan zan gbem sha won.+
ג [Gimel]
3 Yehova hemba, shi a hemba kuman iwuese cii;+
Mhembe na gande u tôvon fan.+
ד [Daleti]
4 A wuese ityom you sha ikyov ikyov;
A ôr kwagh u aeren a ou a ageegh la.+
ה [He]
5 Vea ôr kwagh u iengem i kpilighyol i icivir you+
Shi mo kpa me hen sha kwagh u ityom you i kpilighyol la.
ו [Woo]
6 Vea ôr kwagh u aeren a ou a tan ihindi iyol,
Mo kpaa me pase kwagh u mhembe wou.
ז [Sayin]
7 Vea umbur erdoo wou u vesen la,
Nahan vea ôr kwagh na nduuluu.+
Vea ger amo sha iember, sha ci u perapera wou.+
ח [Heti]
8 Kunya ngu ker Yehova a ior, shi zungwen mhôônom,+
Vihin ishima fele ga, shi tesen dooshima wuee kpaa.+
ט [Teti]
9 Yehova eren a ior cii doo doo,+
Mhôônom nam due tseer tseer ken ityom na cii.
י [Yodi]
10 Yehova, ityom you cii ia na u icivir,+
Shi mba ve civir we sha mimi la kpaa vea wuese we.+
כ [Kafi]
11 Vea pase iengem i hementor wou+
Shi vea ôr kwagh u mhembe wou kpaa,+
ל [Lamedi]
12 Sha er ior vea fa aeren a ou a ageegh+
Kua iengem i kpilighyol i hementor wou yô.+
מ [Mem]
13 Hementor wou ka u tsôron,
Tartor wou kpaa ua lu sha ikyov ikyov je.+
ס [Sameki]
14 Yehova ka a sue mba ve lu gban la cii+
Shi mba ve lu ngugh ngugh la cii ka a mough a ve sha.+
ע [Ayin]
15 Ior cii ver ashe sha a we;
U ne ve kwaghyan sha ashighe a ve vough.+
פ [Pe]
16 Ka u bugh uwegh ough,
U na hanma kwagh u uma sha isharen na, i kuma un.+
צ [Tsade]
17 Yehova ngu perapera sha igbenda na cii+
Shi eren akaa cii sha mimi.+
ק [Kofi]
18 Yehova ngu ikyua ikyua a mba ve yer un la cii,+
Mba ve yer un sha mimi la cii.+
ר [Reshi]
19 Ka a na mba ve cie un la kwagh u a sar ve la;+
Ka a ungwa mliam vem, shi a yima ve kpaa.+
ש [Shin]
20 Yehova kor mba a doo ve ishima la cii,+
Kpa mbaaferev yô, una tim ve purututu.+
ת [Towi]
21 Zwa wam ua wuese Yehova;+
Hanma kwagh u a lu uma cii a̱ wuese icighanti na, zan zan gbem sha won.+