Aerenakaa

28 Se mba dugh sha tar kwagh eren se ga yô, se mase fan ser iti i icile la ér Melita. 2 Ikyurior i hen icile ne* er a vese doo je kpilighyol. Ve ngohol se sar sar, shi ve keer se usu, sha ci u ura lu nôôn shi wuhe kôr. 3 Paulu za kura ayegheraikyon, gbe va haan sha usu la yô, igbinde za due sha ci u usu tsee i̱, maa i̱ zer un anyi sha uwe. 4 Er ior mban nenge bo-iyô zer Paulu sha uwe yô, ve gba lamen ayol a ve, kaan ér: “Or ne ka orwuan-or keng; er a dugh shin zegemnger kwagh a er un ga nahan kpa, Ijirôron* de ér a za hemen u lun uma ga.” 5 Nahan kpa, a mishi uwegh iyô la gba sha usu, kpa kwagh er un ga. 6 Kpa ve lu henen ér una va mura iyol shin una gba a kpe. Ve ver ashe zan zan kpa ve nenge kwagh môm er un ga, maa ve gema zwa, ve gba kaan ér ngu aôndo.

7 Ishule igen gema lu her ikyua, lu ishule i orhemen u icile la, i yilan un ér Pubiliu. Or ne ngohol se, nenge sha a vese doo doo ayange atar. 8 Kwagh gema er yô, ter u Pubiliu gba angev lu sha gambe, fiva er un shi lu nyian awambe. Nahan Paulu nyôr za hen a na za er msen, penda un ave iyol, bee un angev. 9 Kwagh ne eren kera yô, mbauangev mbagenev cii hen icile la kpa gba van hen a na, lu been ve iangev vev. 10 Shi ve na se uiyua kpishi, shi se mba va ngur nyôron tso u yemen yô, ve wa se ikyav sha akaa a kwagh gba se a mi la cii.

11 Yange se tsa hen icile ne iwer itiar. Tsô se nyôr tso u i er eev mbu “Ônov mba Zuusu” sha ityough nagh yô. Lu tso u ken Alekezanderia, u va lu hen icile ne zan zan shighe u wuhee la kar been yô. 12 Se mba va nyer hen ihyongo i hen Sirakuse yô, se tsa her ayange atar; 13 se mough her se va zan zan se va ar hen Regium. Iyange karen i môm yô, ahumbe a ken imbusutariyan za va kpoo, maa se va nyôr hen Putilai sha iyange i sha uhar. 14 Se zua a anmgbianev hen ijiir ne shi ve taver se ishima se tsa vea ve ayange ataankarahar, maa se mough se ver ishigh u yemen ken gar u Roma. 15 Anmgbianev mba ken gar la mba za ongo kwagh wase yô, ve mough ve gba van u va keghen se gbenda hen Ayou a Memen Atar; mbagen va zan zan ve va ar hen Tembekasua u Apiu. Er Paulu nenge a ve yô, a sugh Aôndo shi ishima taver un. 16 Se mba va nyer ken gar u Roma yô, i na Paulu ian kôr ya na lu her, vea orshoja u lu kuran un la.

17 Nahan kpa, ayange nga kar atar yô, a yila Mbayuda mba duen ati hen a na. Mba va kohol cii yô, a kaa a ve ér: “Anmgbianev, yange m er ior asev ma kwaghbo ga, shi m er ma kwagh u hendan a aeren a uter asev ga, nahan kpa i kôrom ken Yerusalem i nam sha ikyev i Mbaroma. 18 Mba tôvon sha kwagh shon yô, ve soo u pasen mo, sha ci u ve zua a ityôkyaa i môm i vea wuam ga. 19 Kpa Mbayuda mba ngur hanger her yô, hingir u me va a ijir hen Shisar, kpa u ngu wer m lu van mer me va yila ityô yam ijir sha ma kwagh ga. 20 Ka sha ityôkyaa ne m yer ne sha u me zua ishigh a ven shi me lam a ven kpaa ye, gadia ka sha kwagh u ishimaverenkeghen i Iserael la i tem ishiligh kun ye.” 21 Ve kaa a na ér: “Se zua a uwashika ken Yudia sha kwagh wou ga, shi anmgbianev mba ve mough ker ve ve la kpa, mô ve ôr se kwaghbo u u er ga. 22 Kpa se nenge yô, doo u se kegh ato a we se ungwa kwagh u u lu a mi u ôron la, gadia mimi je, annongo ne yô, se fa, hanma ijiir cii mba lamen sha a na dang.”

23 Tsô ve ver iyange i vea va hen a na yô. Nahan ior va hen a na ape lu tsan la ngee hemba kwa u hiihii la. Maa a gba pasen ve kwagh shon shi eren shiada sha kwagh u Tartor u Aôndo vighe vighe, hii pepe je zan zan aikighe; lu pasen ve kwagh u Yesu ken Atindi a Mose man ken Uprofeti sha u ve̱ na jighjigh. 24 Nahan mbagenev hii u nan akaa a a ôr la jighjigh, kpa mbagen na jighjigh ga. 25 Tsô er ve gba zwa môm ga yô, ve hii u yemen, Paulu maa mase ôron ve imo ne, ér:

“Kwagh u icighan jijingi tsenga ôron a uter enev sha ikyev i profeti Yesaia ne ka nahan vough, 26 ér, ‘Za hen nongoior ne za kaa wer: “Ne ungwa, kpa mayange ne kav kwagh shon ga, shi ne nenge, kpa mayange ne kav je ga. 27 Gadia asema a ior mban cighir. Ato a ve ungwa, kpa ve wa ikyo ga. Shi ve kusu ashe a ve, sha er mayange vea nenge sha ashe a ve ga, shin vea ungwa ken ato a ve, vea kav kwagh shon ken ishima, sha u vea gema asema, nahan m bee ve angev kpaa ga.”’ 28 Yô, fa nen ner loho u myom u u dugh hen Aôndo ne, i tindi a u hen akuraior agen; aa ungwa u keng je.” 29 *——

30 Paulu kôr ya lu her; a tsa her anyom ahar jimin, lu ngohol mba ve lu van hen a na la cii sar sar, 31 pasen ve kwagh u Tartor u Aôndo shi tesen ve kwagh u Ter Yesu Kristu gbar gbar a ishima i môm, kwagh môm yange un ga.