Ityough 7

U Kporom Ikua hen Aôndo ken Msen

Er nan i lu hange hange u eren msen hanma shighe? (1)

Ka hen ana i gbe u se eren msene, man ka nena? (2, 3)

Ka atôakaa a nyi i lu vough u eren msen shami? (4)

Ka hanma shighe i doo u ú er msene? (5, 6)

Aôndo ongo mbamsen ciili? (7)

1. Msen ka u ôron kwagh a Aôndo a iyol i hiden a mi jime. Eren msen hen Aôndo hanma shighe. Sha nahan yô ú fatyô u lun ikua a na vough er ka huror u ishima ishima nahan. Yehova hemba shi ngu a zege utaha, nahan kpa keghen ato sha mbamsen asev! We ú eren msen hen Aôndo hanma shighe kpa?—Pasalmi 65:2; 1 Mbatesalonika 5:17.

2. Msen ka gbaa u mcivir wase. Nahan yô, ka u se eren msen hen Aôndo, Yehova, tseegh. Zum u Yesu lu shin tar la, yange eren msen hen Ter na hanma shighe, lu hen ma orgenegh ga. Se kpa se er nahan. (Mateu 4:10; 6:9) Nahan cii kpaa, mbamsen asev cii gba u a er ve ken iti i Yesu. Ngun tese er se wa iko sha ian i Yesu la shi se mba a jighjigh u nan ken nagh ku ipaan na la.—Yohane 14:6; 1 Yohane 2:1, 2.

3. Zum u se lu eren msen yô doo u kwagh u se lam a Aôndo la a̱ due ken asema a ase. Doo u se kimbir mbamsen ken ityou yasegh shin se ôr ve ken takerada u msen ga. (Mateu 6:7, 8) Se fatyô u eren msen sha nyityô mtem u a lu sha icivir cii, a fatyô u lun hanma ian, man hanma ijiir kpaa. Aôndo una fatyô u ungwan mbamsen mba se er ken ishima a iliam shio kpaa. (1 Samuel 1:12, 13) Doo u a ker ijiir i lun a ayôôso shio ca a ijiir i ior ve lu yô sha u se er mbamsen asev.—Marku 1:35.

4. Ka atôakaa a nyi ú fatyô u eren msen shami? Nyityô kwagh i ia fatyô u benden a ijende you vea na cii. (Mbafilipi 4:6, 7) Msen u ikyav la tese er doo u se er msen sha kwagh u awashima u Yehova. Shi se fatyô u sônon er i̱ na se mbamgbaiyol asev, i̱ de se asorabo ase, shi i̱ na se iwasen sha er se hendan a ameen yô. (Mateu 6:9-13) Mbamsen asev ve̱ de lu sha kangegh ga. Se er msen sha akaa a a zough sha ishima i Aôndo tseegh.—1 Yohane 5:14.

5. Ú fatyô u eren msen hanma shighe u ishima you i mgbegha ú u sughun shin wuese Aôndo cii. (1 Kroniku 29:10-13) Er msen zum u ú lu a mbamzeiyol man i lu karen jighjigh u nan wou yô. (Pasalmi 55:22; 120:1) Ka vough u eren msen cii man ú ya kwaghyan ye. (Mateu 14:19) Yehova lôhô se er se̱ eren msen “hanma shighe.”—Mbaefese 6:18.

6. Se er msen hemban je yô zum u se er ma isholibo i vesen yô. Hen ashighe angara yô doo u se zamber er Yehova a̱ zungwe se mhôônom shi a̱ de se asorabo a ase. Aluer se pase asorabo ase hen a na shi se nôngo tsung sha er se kera kimbir á ga yô, Aôndo “kegh iyol u den [se] kwaghbo.”—Pasalmi 86:5; Anzaakaa 28:13.

7. Yehova ongo mbamsen mba ior mbaperapera tseegh. U Aôndo a̱ ungwa mbamsen ou yô, saa ú lu nôngon sha afatyô wou cii u dondon atindi na. (Anzaakaa 15:29; 28:9) Saa ú hide a iyol jime zum u ú lu eren msen yô. (Luka 18:9-14) Gba u ú nôngo sha kwagh u ú lu eren msen shami la. Sha nahan yô ú lu tesen wer ú ngu a jighjigh u nan shi mimi je ú soo u eren kwagh u ú lu ôron la. Ka sha nahan tseegh man Yehova una ungwa mbamsen ou ye.—Mbaheberu 11:6.