Kporom Hen Aôndo

Aôndo Ka Una De Se Asorabo Nahan, A Hungur a Mi Je He?

UTAN a ta aningir ga yô, se na mlumun ser, een. Yehova tôndo zwa a mba a lumun ve la ér: “Me de ve ifer ve, asorabo a ve kpaa Me kera seer u umbur a ga.” (Yeremia 31:34) Yehova tese se heen wang ér ka una de mbaasorabo kwaghbo ve yô, un kera umbur kwaghbo shon ga. Kpa kwagh ne tese ér u umbur tsô kpa Aôndo u a gbe sha man tar la umbur asorabo a a de ior a mi la gaa? Mkaanem ma Esekiel ta iwanger sha gbenda u Aôndo a den se asorabo shi a hungur a mi la.—Ôr Esekiel 18:19-22.

Yehova yange tindi profeti Esekiel, u lu orshua na la, za yôô ijirôron na sha Mbayuda, mba ve tile sha mimi ga la. Tar la cii yange u de u civir Yehova, u yem ipila i eren. Nahan Yehova tsengaôron ér Mbababilon vea va tim Yerusalem, gartamen u Mbayuda la. Er lu u Yehova una tim gar la nahan kpa, a gema a tindi a loho ugen, u u na ior ishimaverenkeghen yô. Yange kaa ér hanma or yô nan ngu a ian i tsuan kwagh u nan soo yô; shi or a er isholibo yô, nana za ityough ki nan.—Ivur 19 man 20.

Kpa aluer or de u eren kwaghbo, nan gema eren kwagh u dedoo di ye? Yehova kaa ér: “Aluer iferor nana gema á undu asorabo a nan cii, a nan lu eren la, man nana waan akaawan a Am cii ikyo, man nana eren sha tindi vough man sha mimi kpaa yô, nana lu uma kpee je, nana kpe ga.” (Ivur 21) Man kape yange i lu je la. Orsholibo yange nana undu gbenda u bo, nana gema ishima sha mimi yô, Yehova a “kegh iyol u den [nan] kwaghbo.”—Pasalmi 86:5.

Kpa asorabo a nan er la di ye? Yehova kaa ér: “Á kera umbur ma iferkwagh i môm i nan er ga.” (Ivur 22) Ver ishima, ivur ne kaa ér a “kera umbur” asorabo a nan “ga.” Kwagh u i er heen ne ngu se a inja sha ci u nyi?

Ken Bibilo yô, inja i ishember i ken zwa Heberu, i i gem ér “umbur” la hemba di u umbur kwagh ken ishima tseegh tsô la. Takerada ugen ôr kwagh u ishember ne kaa ér: “Ashighe kpishi ka i̱ ôron kwagh u ieren, shi ka i nôngo u teren i vea asember agen a tesen ieren i or.” Nahan inja i ishember i “umbur” la a fatyô u lun “u eren” kwagh. Sha nahan yô, Yehova ka una kaa a orsholibo u nan gem ishima la ér una “kera umbur” asorabo a nan “ga” yô, á lu kaan ér una kera kôr nan kwar sha ci u asorabo a nan, er u nan nan ibo shin tsahan nan nahan ga.a

Mkaanem ma ken Esekiel 18:21, 22 la ma tese er Yehova a den asorabo vindi vindi la sha gbenda u kôron ken ishima kpen kpen. Yehova ka una de se asorabo a ase yô, mayange a kera hide a tsaha se sha ci u asorabo shon ken hemen ga. Kpa ngu a hungur a asorabo a mba ve gem ishima la cii. (Yesaia 38:17) Ka i lu inja er a ese asorabo shon cii kera nahan.—Aerenakaa 3:19.

Er se uumace se yen yô, gba u Aôndo una zungwen se mhôônom, sha ci u ashighe kpishi ka se gba ken isholibo. (Mbaromanu 3:23) Kpa Yehova soo ér se fa ser un kegh iyol u den se kwaghbo, aluer se gba ken isholibo, kpa se gema ishima sha mimi yô. Shi ka una de se kwaghbo yô, a hungur a mi, inja na yô, mayange a kera hide a umbur asorabo a ase sha u una na se ibo shin una tsaha se ga. Kwagh ne ka kwagh u surun se ishima kpishi je! Mhôônom ma Aôndo a zungwen la mgbegha u u kporom ikyua a na kpa?

[Ngeren u shin kpe]