Kange Ishima Wer Ú Hen Bibilo a Or
1 “Kende nen ashe sha, nenge nen, iyiav mbi ken ishule, mbi via kuma u sundan ve.” (Yoh. 4:35) Mkaanem ma Yesu Kristu man ma zua sha kwagh ugen u Mbakristu mba pasen kwagh ve tagher a mi nyian yô.
2 Se mba a de u zuan a ior mba mimi mba i sar ve u henen igbenda i Yehova la ga. Iyenge i mbahenen mba hev mba ve eren batisema hanma inyom la tese ér kwagh ne ka mimi. Aluer gba u ishima tsung u henen Bibilo a or yô, kanyi nahan u eree?
3 Tsua Kwagh u Ú Er Yô: Hiihii yô, kange ishima wer u zua a or u ú henen Bibilo a nan hanma shighe yô. U due kwaghpasen yô awashima wou ne a de hungur we ga. Tom u i ne se Mbakristu la kua u tesen ior shi pasen kwagh kpaa, nahan yô doo u se cii se nôngo sha er se seer henen Bibilo a ior yô.—Mat. 24:14; 28:19, 20.
4 Atôakaa Agen a Se Umbur Hanma Shighe Yô: Gba u mbapasenkwagh u Tartor vea eren msen a ishima ve i môm. Ashighe agen ka se zua a ior mba ve er msen ér Aôndo a̱ wase ve vea fa un yô. Yehova er a vese doo kpen kpen, gadia ngu yaren tom a vese u zuan a ambaaior ne shi tesen ve kpaa!—Hag. 2:7; Aer. 10:1, 2.
5 Anmgbian u kwase ugen yange er msen ér Aôndo a wase un una hii u henen Bibilo a or, been yô maa a ver ukôpi mba trak u Ú Soo u Fan Kwagh u Bibilo Seer Kpa? la hen ijiirtom na, ape ior vea nengen a mi yô. Kwase ugen va nenge a utrak mban maa tôô môm gba ôron, er been yô maa a gba ngeren adereshi na ken ijime i trak ne; anmgbian u kwase ne nengen nahan yô, maa a lam a na shi a hii u henen Bibilo a na kpaa.
6 Mbapasenkwagh mbagenev mba ve fe u hiin Bibilo i henen a ior yô vea fatyô u wasen we sha er u hii u henen Bibilo a or er u we ishima nahan yô. Er msen hen Aôndo a wase u hii u henen Bibilo a or shi lumun hanma iwasen i i ne u sha er u kure awashima wou ne yô. Alaghga we kpa ica a gba ga tsô u zua a or u ú hii u henen Bibilo a nan yô.