U Fa Akaa a U Fatyô u Tsuan la Kpa?

Mbatwerev gema eren ior twer ken ayouacii kpishi sha tar hegen a awambe shio. U fa igbenda i sôron twer a awambe shio la tsembelee, i u fatyô u tsuan la kpa? Gba u ú fa igbenda ne cii sha er u fatyô u tsuan twersôron man ipaven i u soo la sha inja yô. Nenge tser u vidio u No Blood—Medicine Meets the Challenge la. U nengen u been yô, er msen shi yar tom a mkaanem ma ma lu shin heen ne, nahan time sha kwagh u ú hen ken tser ne la.—Ver ishima: I tese ajiir a i lu paven ior zan a mi ave yô ken tser u vidio ne, nahan mbamaren ve fa er vea nenge tser ne vea mbayev vev mba mbakiriki sha kwaghfan yô.

(1) Mbashiada mba Yehova mba vende awambe a tan, sha ci u tindi u Bibilo i we ken Aerenakaa 15:28, 29 la. Tindi la kaa ér ‘nyagh nen awambe.’ (2) Ka a va sha kwagh u twersôron yô, Mbashiada mba Yehova ka ve soo ér i er ve twer u hemban lun a inja la cii, kpa i de te ve awambe ga. (3) Hanma oruange yô nan ngu a ian i tsuan kwagh nan soo ér i er sha iyol i nan man u i de eren ga yô.

(4) U tsuan gbenda u sôron twer a awambe shio la ka kwagh u vough shi ka kwagh u injaa kpaa, sha ci u gbenda u sôron twer a awambe shio la hemba doon shi ngu a mzeyol ga. Awambe a tan nga a na ior iangev, er angev mbu i yer ér hepatitis, man AIDS kua iangev mbigenev nahan. Ka oruange i lu tom u nan u tsuan twer u nan soo ér i er nan man u nan vende la ye. (5) Or ka nana due awambe kpishi yô, mbatwerev ka ve hemba veren ishima u eren akaa ahar, ka ve soo ér awambe la a tôndo shi ve soo u seer awambe ken iyol i oruange la.

(6) Akaa anyiin a i gbe u á dondo sha kwagh u twersôron a awambe shio yô, ka u panden awambe a duen man u yangen mzeram ma awambem ma nyian ma ken iyol i oruange u duen man u nan sha er awambe aa seer oruange ken iyol yô kua u nan sha er awambe a a dugh la aa saa ishe ga yô.

(7) Mbatwerev ve̱ nôngo sha er vea (a) pande awambe a duen yô, man er (b) mzeram ma awambem ma nyian ma ken iyol i oruange ma a due ga yô, man er (c) awambe aa seer oruange ken iyol yô, man er (d) awambe a a dugh la aa saa ishe ga yô. Ve er kwagh ne sha u eren akaa a a dondo shin heen ne: (1) Ve yar tom a igbenda i injaa i paven or a mi la, er i i yer ér “electrocautery” la, man u i yer ér “argon beam coagulator” la, kua u i yer ér “fibrin glue” la nahan; (2) vea fatyô u yaren tom a gbenda u sôron twer u i yer ér “hemodilution” la; man (3) gbenda u sôron twer u i yer ér “erythropoietin (EPO”) la; kua (4) gbenda u sôron twer u i yer ér “cell salvage” la kpaa. (8) (a) Shighe u i lu paven or zan a mi ave la, ka i goom a awambe i za haa ken akpa agen, i gema i haa icigh ki seer awambe ki i er sha awambe ga la ken iyol i oruange la. Er i lu paven nan zan a mi ave la je, shin shighe u i pav nan i bee kera la, i mase hiden nan a awambe a i goom a mi i za hee ken akpa la her. Mba yer gbenda u sôron twer ne ér hemodilution. (b) Shighe u i lu paven or zan a mi ave la, ka i kura awambe a a lu duen la i kire shin i kase á, nahan i hide a awambe la ken iyol i oruange la. Mba yer gbenda u sôron twer ne ér cell salvage. (9) Doo u se pine ortwer u nan lu sôron se angev la ser nana ôr se mtsera man mbamzeyol mba ve lu sha ma gbenda u sôron twer a awambe shio u i gbe u a er se twer a mi la.

(10) A fatyô u paven or ipyaven i vesen man i taver kpishi a u tan nan awambe shio. I tese akav ahar ken tser u vidio la. Ikyav i môm ka wanyekwase u kiriki u i pav un ipyaven i vesen man i taver kpishi sha u kôôm kuhe u sha gwanger ijime u wankwase shon man orbeenyol u i pav un ipyaven i i yer ér endovascular sha u sôron un gbela shin uya la. (11) Mbatwerev mba eren kwagh u injaa ugen; kwagh shon yô, mbatwerev mba tesen ikyo i wan sha u yaren tom a twersôron u ainge ne sha u sôron Mbashiada mba Yehova twer.

Sha kwagh u igbenda i sôron twer igen i i tese ken vidio ne yô, ka or nana tsua a ishima i nan u lumun shin vendan, er imoshima i nan i Bibilo i tsaase i i tese nan la ye. U tsua igbenda i sôron twer i we man ônov ou ne lumun la wang shi u nger akaa shin kaade wou u DPA la vee? Aluer u soo u seer fan kwagh ne tsembelee yô, ôr ngeren u “Questions From Readers” u a lu ken Iyoukura [zwa Buter] i Jun 15, 2004, man u a lu ken Iyoukura [zwa Buter] i October 15, 2000 la. U been yô, yar tom a kwa u ken atô u Tom Wase Ú Tartor u Disemba 2006 u u kaa ér, “Kanyi i Doo u Me Tsua sha Kwagh u Twersôron a Aveghemakaa a i Dugh ken Awambe man Igbenda i Sôron Twer a Awambe Ama?” la, nahan mase tsuan gbenda u twersôron u ú lumun a mi shin u lumun a mi ga yô. Kwagh u masetyô yô, nger akaa a u tsough la vough vough shin kaade wou u DPA la. Ôr mba u tsough wer ve nengen sha kwagh u tweregh wou la man mba hen tsombor wou mba ve lu Mbashiada ga la igbenda i sôron twer i u tsough la wang.