Lu a Vangertiôr Wer Yehova Una Sur U Ishima

1. Pase mlu u Mbayuda lu ker ken Babilon la.

MBAYUDA yange ve hemba Yehova ato anyom imôngo. Kwagh ne na yô, Yehova de ér Mbababilon ve tim tar ve shi ve yem a ve uikyangen. Nahan u hen wer mlu ve u ken Babilon la yange una lu nena? (2 Kron. 36:15, 16, 20, 21) Ka mimi, yange ve lu a ian i eren akaa a ve soo la. (Yer. 29:4-7) Kpa, uma yange taver ve, shi lu ijiir i ve soo u lun la ga. Nahan yange lu ve ken ishima nena? Nenge ase kwagh u orgen ken ve yange ôr ne, a kaa ér: “Hen uifi mba Babilon la, se tema heregh, se lu vaan, zum u se lu umbur Shion yô.” (Ps. 137:1) Yange gba u a sur Mbayuda mban ishima, kpa lu an nana sur ve ishima?

2-3. (a) Ka nyi yange Yehova er sha ci u Mbayuda mba ve lu uikyangen ken Babilon laa? (b) Ka nyi se lu timen sha mi ken ngeren nee?

² Yehova ka “Aôndo u lun a ishimasurun cii.” (2 Kor. 1:3) Er a lu Aôndo u dooshima yô, ka a sur ior nav asema. Yehova yange fa je ér Mbayuda mbagenev mba ve yem uikyangen la vea lumun tsaha shi vea hide hen na kpaa. (Yes. 59:20) Nahan Yehova yange mgbegha profeti Yesaia nger loho ugen ken takeda u i yer u sha iti na yô. Takeda ne pase Mbayuda mban kwagh u Yehova ôr sha kwagh ve anyom kar kuma 100 cii ve i va yem a ve uikyangen ken Babilon ye. Takeda u Yesaia nger la wase ve nena? Yesaia kaa ér: “Sur nen ior Av asema, sur nen ve asema je; kape Aôndo wen A kaa la.” (Yes. 40:1) Yehova yange sur Mbayuda mban asema ken takeda u profeti ne nger la.

³ Se kpa, ka i gba u a sur se asema sha ashighe ashighe, vough er Mbayuda mba ve lu uikyangen la nahan. Ken ngeren ne, se lu timen sha igbenda itiar i Yehova yange sur Mbayuda mba i yem a ve uikyangen ken Babilon la asema yô: (1) Yange tôndo zwa ér una de mba ve gem asema la asorabo a ve, (2) yange na ior nav ishimaverenkeghen, man (3) yange wase ve, ve de mciem. Se nguren timen sha akaa ne yô, ver ishima nenge er gbenda u Yehova yange sur ior nav asema la ua fatyô u wasen se yô.

YEHOVA DEN SE A ASORABO A ASE

4. Yehova yange tese ér un ngu Aôndo u zungwen mhôônom nena? (Yesaia 55:7)

⁴ Yehova “ka Ter u lun a mhôônom ma zungwen tsung.” (2 Kor. 1:3) Yange tese ieren ne shighe u tôndo zwa ér una de Mbayuda mba ve lu uikyangen la a akaabo a ve la. (Ôr Yesaia 55:7.) Yange kaa ér: “[Me] zungwe u mhôônom sha erdoo u tsôron.” (Yes. 54:8) Yehova una zungwe ve mhôônom nena? Shin er lu u Mbayuda vea ya ican sha kwagh u ve er la nahan kpa, Yehova tôndo zwa a ve ér vea lu ken Babilon gbem sha won ga. Yange lu u vea lu uikyangen hen anshighe kpuaa tseegh. (Yes. 40:2) Mkaanem man yange ma a taver Mbayuda mba ve gema ishima mbara asema je ka u henen a hen ga!

5. Se hemba mban a ityôkyaa i nan jighjigh ser Yehova una de se a asorabo a ase a Mbayuda mba i yem a ve uikyangen mbara sha ci u nyi?

⁵ Ka nyi se hen ken kwagh ne? Yehova kegh a kegh iyol u den ior nav a kwaghbo wuee. Nyian ne se hemba mban a ityôkyaa i nan jighjigh ser Yehova una de se a asorabo a ase a Mbayuda mba i yem a ve uikyangen mbara. Sha ci u nyi? Sha ci u se fa kwagh u Yehova a er u den se a asorabo a ase yô. Profeti Yesaia yange ôron kwaghôron u profeti la anyom nga kar uderi imôngo yô, Yehova tindi Wan na u ishima ishima la shin tar, va na nagh sha u paan mbaasorabo mba ve gema asema yô. Er Yesu kpe sha ci wase yô, “i ese” asorabo shin i kough a kera elegh elegh. (Aer. 3:19; Yes. 1:18; Ef. 1:7) Sha mimi yô, Yehova ka Aôndo u den kwaghbo!

6. Ka sea henen er Yehova a zungu mhôônom yô, kwagh la a wase se nena? (Shi nenge foto kpaa.)

⁶ Aluer ishima ngi nan se ibo sha asorabo a yange se er la yô, mkaanem ma Yehova ma i ôr ken Yesaia 55:7 la ma a fatyô u surun se ishima. Alaghga se mbagen ishima a lu zan se iyol her sha akaabo a yange se er kpa Yehova a de se a mi la. Kwagh a fatyô u lun nahan hemban je yô aluer se mba yan ican sha ci u a akaa a yange se er shami ga la yô. Nahan kpa aluer se gema ishima, se de akaa a yange se eren la yô, se fatyô u nan jighjigh ser Yehova de se a akaabo shon. Man Yehova ka una de se a asorabo a ase yô, kera umbur a ga. (Nenge Yeremia 31:34.) Nahan er Yehova a zeren henen sha asorabo a ase ga yô, gba u se kpa se zer henen sha a ga. Ka kwagh u se lu eren hegen ne a gbe Yehova kwagh ye, ka asorabo a yange se er ken ijime la ga. (Esek. 33:14-16) Ica a gba ga tsô, Ter wase u a zungwen mhôônom la una kar a atsan a se lu yan sha ci u akaa a yange se er shami ga la.

7. Aluer se er isholibo man se mba yeren yô, ka nyi ia wase se u keren iwasene?

⁷ Aluer ishima ngi nan se ibo sha ci u se mba yeren isholibo i vesen i se er yô, ka nyi i gbe u se ere? Bibilo kaa ér se ker iwasen hen mbatamen. (Yak. 5:14, 15) Nahan kpa, alaghga a taver se u ôron ve kwaghbo u se er la. Kpa gba u se umbur ser Yehova ver mbatamen mban ér ve wase se, shi vea er kwagh a vese sha dooshima, vea zungwe se mhôônom er Yehova kpa a eren nahan. Aluer se umbur kwagh ne shi se gema ishima yô, kwagh ne una wase se u za lamen a ve. Nenge ase kwagh u anmgbian ugen u yange Yehova wase un sha ikyev i mbatamen yô, iti na ér Arthur.a Yange ishima lu nan un ibo kpishi sha kwaghbo u er yô. A kaa ér: “Yange m nenge ufoto mba ijimbagh nôngo u kuman inyom jimin. Kpa m ongo kwaghôron u anmgbian ugen na sha kwagh u imoshima yô, m ôr kwase wam kua mbatamen isholibo i m er la. Yange m ôron ve yô pever mo iyol, kpa ishima lu zan mo iyol her sha kwagh u m er la. Nahan mbatamen umbur mo ér Yehova vendam ga. Ka a kôôm se sha ci u se doo un ishima. Mkaanem vem ma kundu kundu mara yange ma kôrom ken ishima shi ma wasem u hiden sôron mhen wam.” Nyian ne, Arthur ngu pania u keke shi ngu orshiren tiônnongo kpaa. Ka kwagh u surun se ishima kpishi u fan er ka sea gema ishima ve Yehova a zungwe se mhôônom yô!

YEHOVA NE SE ISHIMAVERENKEGHEN

8. (a) Ka ishimaverenkeghen i nyi Yehova na Mbayuda mba i yem a ve uikyangen laa? (b) Sha kwagh u Yesaia 40:29-31 a ôr yô, ishimaverenkeghen la yange i wase Mbayuda mba ve gema asema la nena?

⁸ Sha mnenge u orumace yô, yange lu inja er Mbayuda mba i yem a ve uikyangen la mba a or u wasen ve ga nahan. Mbababilon mba yange ve hemba tahav sha tar cii hen shighe la yange vea kôr ior vea yem a ve uikyangen yô, ve pase ior mbara ga. (Yes. 14:17) Kpa Yehova na ior nav ishimaverenkeghen. Yange tôndo zwa a ve ér a pase ve vea hide a yem ken tar ve, man kwaghmôm kpa lu u una yange un u kuren iceghzwa i er a ve la ga. (Yes. 44:26; 55:12) Hen Yehova yô, Mbababilon yange ve lu er ka ihyundu i i lu a tahav ga nahan. (Yes. 40:15) Er or ka nana fehe humbe ve ihyundu i kar kera fese nahan, kape Yehova kpa a lu un ican ga u karen a Mbababilon kera je la. Nahan er Mbayuda lu a ishimaverenkeghen ér vea hide ken tar ve yô, kwagh la wase ve nena? Kwagh la yange una sur ve ishima. Shi yange una wase ve sha gbenda ugen kpaa. Yesaia nger ér: “Mba ve veren ashe sha TER yô, vea hide a agee a ve her.” (Ôr Yesaia 40:29-31.) Ishimaverenkeghen la yange i hide i na ve agee; nahan lu u vea “kôndo sha sha akper er ugafa nahan.”

9. Ka ityôkyaa i nyi yange i na ve Mbayuda mba i yem a ve uikyangen la na jighjigh ér Yehova una kure uityendezwa nava?

⁹ Shi Yehova yange na Mbayuda mba i yem a ve uikyangen la ityôkyaa i nan jighjigh a uityendezwa nav. Yange er kwagh ne nena? Hen ase sha akaaôron a profeti a yange vande kuren sha mi la. Yange ve fa er Mbashiria hemba ikwe pue i tartor u Iserael la shi yem a ve uikyangen yô. (Yes. 8:4) Shi ve nenge er Mbababilon yange ve tim Yerusalem shi ve kura mba ve lu ker la, ve yem a ve uikyangen kpaa yô. (Yes. 39:5-7) Yange ve fa er tor u Babilon yange ongor Sedekia ashe tôô un yem a na ken Babilon yô. (Yer. 39:7; Esek. 12:12, 13) Hanma kwagh u Yehova tsenga ôron cii va kure sha mi vough. (Yes. 42:9; 46:10) Akaa ne cii yange wase ve u fan ér akaa a Yehova tsenga ôron sha kwagh u mhidi ve ken tar ve la kpa aa va kure sha mi kpee a bunde ga!

10. Se er nan ve ishimaverenkeghen yase ia seer taver ken ayange a masejime nee?

¹⁰ Ka nyi se hen ken kwagh ne? Shighe u iyol i kpe se je kpa, ishimaverenkeghen yase i sha kwagh u ken hemen la ia fatyô u surun se ishima shi nan se agee. Se mba hen shighe u a taver kpishi, shi mbaihyomov mbaageev kpa ve lu hendan a vese yô. Kpa gba u se yina ishima ga. Yehova na se ishimaverenkeghen i doon tsung i va lun uma gbem sha won ken Paradiso, ape se lu ken bem shi kwagh môm a lu u tan se mciem iyol ga la. Nahan gba u se henen sha ishimaverenkeghen la. Aluer se er nahan ga yô, ishimaverenkeghen yase ne ia lu dimii er ka ijiir i doonashe i i due cing sha ci u se mba kenger i sha windou u ihyundu i cir sha mi nahan. Se “ovur windou la” nena, inja na yô, se er nan ve ishimaverenkeghen yase ne ia seer tavere? Se fatyô u tôôn shighe henen er uma wase una va lu ken tar u he la yô. Se fatyô u ôron ngeren shi ungwan atsam, shin nengen uvidio mba ve tese kwagh u ishimaverenkeghen yase ne yô. Shi se fatyô u lamen a Yehova ken msen sha kwagh u akaa a se lu veren ishima ser a ve er ken Paradiso la.

11. Ka nyi ka i wase anmgbian u kwase ugen u a lu a angev mbu vihin kpishi u hiden zuan a agee?

¹¹ Anmgbian u kwase ugen iti na ér Joy. Ngu a angev mbu vihin kpishi, nahan kpa ishimaverenkeghen yase ne ka i sur un ishima shi i na un agee kpaa. A kaa ér: “Mbamzeyol ka vea na mea ure kpishi yô, m ôr Yehova er ishima i lum ker la cii, sha ci u m fa je mer a kav er i lum yô. Man Yehova ka a ungwa msen wam, a nam ‘agee a a gande a orumace’ yô.” (2 Kor. 4:7) Shi anmgbian u kwase ne ka a henen er una va lu ken tar u he, ape “ma or u nan tem ker kpaa nana kera kaa ér: Kwagh nyoon mo, ga” la. (Yes. 33:24) Aluer se kpa se mba ôron Yehova hanma kwagh u a lu zan se iyol shi se mba henen sha kwagh u ishimaverenkeghen yase ne yô, se zua agee a wan ishima a mbamzeyol asev.

12. Ka atôakyaa a nyi se lu a mi a nan uityendezwa mba Yehova jighjigh? (Shi nenge foto kpaa.)

¹² Nyian ne kpa, Yehova na se atôakyaa a nan jighjigh a uityendezwa nav vough er yange na Mbayuda mba i yem a ve uikyangen la nahan. Hen ase sha kwagh u akaaôron a profeti a se nenge a lu kuren sha mi nyian ne. Ikyav i tesen yô, se nenge er tahav mbu mbu hemba tahav sha tar cii la, vegher ugen a taver man vegher ugen a lu oson a oso yô. (Dan. 2:42, 43) Shi se mba ungwan kwagh u ‘ityartenger sha ajiir kposo kposo,’ shi pasen ior mba ken “akuraior cii” loho u dedoo. (Mat. 24:7, 14) Akaaôron a profeti ne kua agen kpaa ka a taver jighjigh u se ne ser akaa a Yehova a tôndo zwa a mi kpa a lu a er ga la aa va kure sha mi vough.

YEHOVA KA A NA I KERA CIER SE IYOL GA

13. (a) Ka mbamtaver mba nyi yange lu u Mbayuda vea tagher a mi shighe u zurum u a pase ve laa? (b) Yesaia 41:10-13 kaa ér Yehova yange sur Mbayuda mba ve lu uikyangen la asema nena?

¹³ Shin er Yehova yange sur mba ve lu uikyangen la asema sha u nan ve ishimaverenkeghen i injaa nahan kpa, yange fa ér a va zurum u a pase ve yô, vea tagher a mbamtaver. Yange tsenga ôron ér tor u lun a tahav kpishi nana va ta num sha akuraior a a kase Babilon la, nana ngohol a, maa shi nana ta num sha Babilon kpaa. (Yes. 41:2-5) Nahan yange lu u ishima ia za Mbayuda iyolo? Yehova yange vande surun ior nav asema sha u kaan a ve ér: “De cie ga, gadia M ngu a we; de enger kenger sha mcie ga, gadia Mo M ngu Aôndo wou.” (Ôr Yesaia 41:10-13.) Inja i kwagh u yange kaa ér “Mo M ngu Aôndo wou” la ér nyi? Yange lu umbur ve ér ve civir un ga, sha ci u ve vande fan er i gbe u vea er nahan yô. Kpa lu umbur ve ér un ngu a ve shi una wase ve kpaa.—Ps. 118:6.

14. Ka nyi igen kpa Yehova yange er sha er ishima ia gba Mbayuda shimi?

¹⁴ Shi Yehova yange na ishima gba Mbayuda mba ve lu uikyangen la shimi sha u umbur ve er tahav nav mbu lu a ikighir ga shi un hembe kwaghfan sha won yô. Yange kaa a ve ér ve kenger asan a sha kwavaôndo. Maa a kaa a ve ér ka un, un gbe asan ye, shi un fa a cii sha ati ati. (Yes. 40:25-28) Aluer Yehova fa hanma ishan sha iti yô, una fa iti i hanma or u nan civir un la je ka u henen a hen ga! Man er Yehova a lu a tahav mbu gban asan yô, tese ér ngu a tahav mbu wasen ior nav je ka ashe tugh ga. Sha mimi yô, Mbayuda mban yange ve lu a ityôkyaa i ishima a nyian ve shin vea cia kwagh ga.

15. Aôndo yange wa Mbayuda mba ve lu uikyangen la ago iyol sha kwagh u vea va tagher a mi ken hemen la nena?

¹⁵ Yehova shi yange wa ior nav ago iyol sha kwagh u vea va tagher a mi ken hemen yô. Yange ôr ior nav kwagh u vea er ken mhii u takeda u Yesaia la, a kaa ér: “Nyôr nen ken ayou a en, wuhe nen ihinda kera cii, yer nen kpeghee, zan zan iyugh i̱ kar kera.” (Yes. 26:20) A shi nan kpa, Mbayuda yange ve dondo kwaghwan ne shighe u Tor Shirushi va ta num sha Babilon la. Or u timen sha akaa a mbayiase u ken Grika ugen kaa ér, yange Shirushi nyer ken Babilon yô “a kaa a [ushoja nav] ér ve wua hanma or u ve nenge a nan ken won cii.” Nenge er yange a cier ior mba ve lu ken Babilon la iyol sha wono! Kpa yange Mbayuda mban war sha ci u ve dondo kwaghwan u Yehova.

16. Gba u ishima ia nyian se kpishi sha kwagh u ken hemen la ga sha ci u nyi? (Shi nenge foto kpaa.)

¹⁶ Ka nyi se hen ken kwagh ne? Ica a gba ga tsô zegecan una hii, man a lu ican i i gbe je uumace ve lu a tagher a mi ga yô. Ican la ia hiin yô, ior vea fa kwagh u vea er ga shi a cier ve iyol kpaa. Kpa ior mba Yehova yô, kwagh ve a lu nahan ga. Se fa ser Yehova ka Aôndo wase. Se tile dông sha ci u se fa ser “myom [wase] zurum a zurum je.” (Luka 21:28) Zum u mzough u akuraior aa ta num sha a vese la je kpa, se tile dông. Yehova una va kura se sha ikyev i mbatyomov nav shi una ôr se kwagh u se er ve se war yô. Una ôr se akaa shon nena? Shighe la a kuma tsô se fa. Nahan cii kpa, ikyav tese ér Yehova una lamen a vese sha ikyev i atôônanongo a ase. Atôônanongo ne aa lu er ka “ayou” a se nyôr ker se war nahan. Se wa ago iyol sha kwagh u a lu van ken hemen la nena? Gba hange hange u se lu kôôsôô a anmgbianev asev mba nomso man mba kasev shi se kegh a kegh iyol u dondon kwaghwan u nongo u Yehova shi se na jighjigh ser ka Yehova a lu hemen nongo wase ye.—Heb. 10:24, 25; 13:17.

17. U er nan ve Yehova una za hemen u surun we ishima?

¹⁷ Shin er uma yange taver Mbayuda mba ve lu ken Babilon la nahan kpa, Yehova sur ve ishima. Se kpa una er a vese nahan vough. Nahan aluer ka nyi je u tagher a mi kpa, za hemen u suur sha Yehova wer a sur u ishima. Na jighjigh wer Yehova den mbacivir un sha mimi la a asorabo a ve shi una nenge sha a we kpaa. Za hemen u taver ishimaverenkeghen you la. Umbur wer, er Yehova a lu Aôndo wou yô, kwagh môm u u cia kpa ngu ga.