NGEREN U TIMEN SHA MI 22
ICAM 15 Sugh Nen Waniunda u Yehova!
Er i Hii ve Iti i Yehova i Gbe Yesu Kwagh Kpishi Yô
“M pase ve iti you, shi me za hemen u pasen i kpaa.”—YOH. 17:26.
KWAGH U SE LU HENEN YÔ
Ken ngeren ne, se nenge er Yesu yange pase iti i Yehova man er yange tsegha i shi wanger i yô.
1-2. (a) Yesu yange er nyi hen tugh mbu kpernan i wua un laa? (b) Ka mbampin mba han se lu timen sha mi ken ngeren nee?
SHA iyange i Tomanyiin aikighe ken uwer u Nisan 14, inyom i 33 la, lu u a nenge Yesu mker, shi a ôr un ijir a na un ibo, shi a gbidye un, maa a mase wuan un. Yange ya Kwaghyan u Ter u Aikighe vea mbaapostoli nav mba jighjigh mbara sha kpoiyou u sha. Mba ye kwaghyan la mba been je maa, Yesu mase ôron ve akaa a taver ve ishima. Kpa cii ve ve sambe ve yem yô, Yesu er msen u hange hange ugen. Apostoli Yohane nger msen ne ken Yohane ityough 17.
2 Msen u Yesu er la wase se u fan kwagh u lu un kwagh u vesen hen shighe la nena? Msen la yange tese kwagh u lu un kwagh u vesen shighe u lu eren tom na u pasen kwagh shin tar la nena? De se time nen sha mbamlumun mba sha mbampin mban.
“M PASE VE ITI YOU”
3. Ka nyi Yesu yange ôr sha kwagh u iti i Yehova, man inja i kwagh u ôr la ér nyi? (Yohane 17:6, 26)
3 Yesu yange ôr ken msen u er la ér: “M pase iti you.” Yesu yange ôr mkaanem man kwa har a mbahenen nav, nahan se fa ser kwagh ne lu un kwagh u vesen. (Ôr Yohane 17:6, 26.) Nahan lu ôron ér nyi jimi? Yange lu pasen ve iti i ve vande fan ga yôô? Mbahenen mba Yesu yange ve lu Mbayuda, nahan ve vande fan er iti i Aôndo i lu Yehova yô. Iti la due kwa udubu imôngo ken Ruamabera u Mbaheberu la. Nahan Yesu lu ôron ve lu kwagh u iti i Aôndo ga; kpa lu pasen ve Or u Aôndo a lu jim jim yô. Yange lu wasen ve u seer fan Yehova, man kwagh ne kua mbaawashima nav sha ci u tar ne kua uumace, man akaa a a er kua a una va er ken hemen la, man aeren a a lu a mi la nahan. Ka Yesu tswen a fe Yehova tsembelee ye.
4-5. (a) Inja i u fan iti i or la ér nyi? Tese ikyav. (b) Ka sha nyi gbenda nahan mbahenen mba Yesu yange ve va seer fan kwagh u Yehova?
4 Tôô ase wer ortamen ugen ken tiônnongo wou iti na ér David, ka ortwer u paven ior. U fa anmgbian ne ica gba. Kpa iyange igen yô, u gba angev kpoo maa gba u a pav u. Nahan i za a we hen iyouci i anmgbian ne a eren twer her la, maa a er u twer, nahan u war. Hegen anmgbian ne una hemba doon we ishima cii, man hanma shighe u i yer iti na yô, u umbur kwagh u yange er sha u yiman we la! David ka ortamen u yange u vande fan un la her, kpa hegen yô, u nenge un wer ka ortwer u yange war uma wou yô.
5 Kape mbahenen mba Yesu kpa yange ve vande fan iti i Yehova je la. Kpa Yesu yange va wasen ve u seer fan kwagh u Yehova yô, iti i Yehova seer gban ve kwagh. Er nan ve se ôr nahana? Sha ci u Yesu yange kaven Ter na sha hanma kwagh u ôron shi eren cii. Nahan mbahenen mba Yesu yange mba nengen gbenda u Yesu tesen shi mba nengen gbenda u eren kwagh a ior la yô, kwagh la wase ve u seer fan kwagh u Yehova.—Yoh. 14:9; 17:3.
“ITI YOU, I U NEM LA”
6. Yehova yange na Yesu iti na sha nyi gbenda? (Yohane 17:11, 12)
6 Yesu yange er msen sha ci u mbahenen nav kaa ér: “Kura ve sha ci u iti you.” (Ôr Yohane 17:11, 12.) Kwagh ne lu u tesen ér a yilan Yesu ér Yehova? Ei. Umbur wer ken msen u Yesu er la, a ôr kwagh u iti i Yehova a kaa ér, “iti you.” Nahan iti i Yehova la yange hingir iti i Yesu kpôô kpôô ga. Nahan shighe u Yesu kaa ér i na un iti i Aôndo la lu ôron ér nyi? Hiihii yô, Yehova yange tindi Yesu ér a va lam sha ci na. Yange va ken iti i Ter, shi er ityom i kpilighyol ken iti la kpaa. (Yoh. 5:43; 10:25) Sha uhar yô, inja i iti i Yesu la ér, “Yehova Ka Myom.” Nahan inja i iti i Yesu la wa iti i Yehova kpa ker.
7. Tese ikyav er lu u Yesu una fatyô u lamen sha ci u Yehova yô.
7 De se tese ikyav i ia wase se u kaven er lu u Yesu una fatyô u lamen ken iti i Yehova yô. Orhemen nana fatyô u tindin or ér nana za lam a mbagenev sha ci u nan. Nahan shighe u or la nan lu za lamen yô, a lu vough er ka orhemen la nahan. Yesu kpa yange lu a tahav mbu lamen sha ci u Yehova, sha ci u lu Yehova je tindi un ye.—Mat. 21:9; Luka 13:35.
8. Iti i Yehova yange i lu “ken” Yesu shighe u lu a va shin tar ga la nena? (Ekesodu 23:20, 21)
8 Bibilo yila Yesu ér “Imo” sha ci u Yehova eren tom a na u ôron mbatyomov man uumace akaa a Yehova a soo ér ve fa shi ve er yô. (Yoh. 1:1-3) A shi nan kpa, lu Yesu lu ortyom u Yehova tindi un ér a za nenge sha Mbaiserael shighe u ve lu ken taaikyôngo la ye. Yehova yange ôron Mbaiserael ér ve ungwa imo i ortyom la yô maa shi kaa a ve ér: “Gadia iti Yam ngi ken a Na.”a (Ôr Ekesodu 23:20, 21.) Yehova yange kaa ér iti na ngi “ken” Yesu sha ci u lu un hemban tesen ér hanma kwagh u Yehova a eren cii ka u vough shi Ngu icighan ye.
“TERE, NA ITI YOU ICIVIR”
9. Iti i Yehova la yange gba Yesu kwagh nan je? Ta iwanger.
9 Er se vande nengen nahan, cii ve Yesu va shin tar je kpa, iti i Yehova lu un kwagh u vesen. Nahan shighe u va shin tar la kpa, a tese sha hanma kwagh u eren la ér iti i Yehova gba un kwagh kpishi! Yesu yange kaa a Yehova shighe u zurum u una kure tom na u pasen kwagh la ér: “Tere, na iti you icivir.” Her ave ave je Ter na kaa genger genger ér: “M vande nan i icivir, shi me na i icivir kpaa.”—Yoh. 12:28.
10-11. (a) Yesu yange na iti i Yehova icivir nena? (Shi nenge foto kpaa.) (b) Er nan ve i gbe u a tsegha iti i Yehova shi a kar a ilyahan sha i kera?
10 Yesu kpa yange na iti i Ter na icivir. Yange er kwagh ne nena? Gbenda môm u yange er kwagh ne yô, lu u ôron mbagenev aeren a Ter na a lu a mi a doon tsung kua gbenda u a eren kwagh a ior la. Shi yange er kwagh ugen kpaa. Yange gba u Yesu una tese ér hanma kwagh u Yehova a eren cii ka u vough, shi una tsegha iti na la kpaa.b Yesu yange tese er kwagh ne a lu hange hange yô, shighe u tese mbahenen nav u eren msen la. A kaa ér: “Ter wase u sha, i tsegha iti you.”—Mat. 6:9.
11 Er nan ve i gbe u se tese ser hanma kwagh u Yehova a eren cii ka u vough shi se tsegha iti na? Sha ci u yange Satan wa Yehova Aôndo aie iyol, shi laha iti Na ken sule u Eden. Satan yange senge ér Yehova ka oraie shi ngu nyumen Adam man Ifa akaa a dedoo. (Gen. 3:1-5) Shi kwagh u Satan ôr la tese ér gbenda u Yehova a eren kwagh la ka u shami ga. Mbaaie mba Satan er la vihi Yehova iti. Shighe kar yô, shi a va ôr kwagh ne sha shighe u Yobu la. A kaa ér ka akaa a Yehova a ne uumace la tseegh a ne ve ve civir Un ye. Ormsende ne shi kaa ér orumace môm u Yehova a doo nan ishima sha mimi, u nana za hemen u civir Un shighe u nan tagher a mbamtaver kpa nan ngu ga. (Yobu 1:9-11; 2:4) Nahan lu u shighe a kar cii ve a fa aluer ka Yehova a lu oraie shin ka Satan kpaa.
Yesu yange tese mbahenen nav er iti i Aôndo i lu kwagh u vesen yô (Nenge ikyumhiange i sha 10)
“M NA UMA WAM”
12. Er Yehova doo Yesu ishima yô, yange kegh iyol u eren nyi sha ci u iti Na?
12 Er Yehova yange doo Yesu ishima yô, a er kwagh u fatyô la cii u tseghan iti i Yehova shi karen a ilyahan sha iyol Na kera. Yesu yange kaa ér: “M na uma wam.” (Yoh. 10:17, 18) Yange kegh a kegh iyol u kpen sha ci u iti i Yehova.c Adam man Ifa, mba ve lu uumace mba hiihii la venda Yehova, kpa gema ta ikyaa a Satan. Kpa Yesu yô, yange kegh a kegh iyol u van shin tar sha er una va tese er Yehova a doo un ishima yô. Yesu yange tese kwagh ne sha hanma kwagh u ôron shi eren yô. (Heb. 4:15; 5:7-10) Yange za hemen u tilen sha mimi ken uma na cii, zan zan kar kpen ku u nyoon tsung sha kon. (Heb. 12:2) Nahan a tese ér Yehova man iti Na doo un ishima.
13. Er nan ve Yesu yange lu sha ian i hemban doon i tesen ér Satan ka oraie? (Shi nenge foto kpaa.)
13 Yesu yange tese sha hanma kwagh u eren cii er Satan a lu oraie, i lu Yehova ga yô! (Yoh. 8:44) Yesu yange fa Yehova hemba hanma orumace ugen cii. Luun er ma kwagh ken akaa a Satan ôr sha iyol i Yehova la lu mimi kpa, Yesu yange ma fa. Kpa Yesu yange kange ishima u paase iti i Yehova. Shighe u lu inja er Yehova undu Yesu la kpa, Yesu kegh iyol u tilen sha mimi zan zan ku na, a u hemban Ter na ato shio.—Mat. 27:46.d
Hanma kwagh u Yesu eren cii tese er Satan a lu oraie, i lu Yehova ga yô! (Nenge ikyumhiange i sha 13)
“M BEE TOM U U NEM WER M ER NE”
14. Yesu yange tile sha mimi nahan Yehova ver un nena?
14 Yesu yange ôr ken msen u er hen tugh mbu kpernan i wua un la gbar gbar ér: “M bee tom u u nem wer m er ne.” Yesu yange na jighjigh ér Yehova una ver un doo doo sha ci u un civir un sha mimi. (Yoh. 17:4, 5) Man er yange suur sha Ter na yô, Ter na kpa va un ahenge ga. Yehova yange de ér a saa shin uwar ga. (Aer. 2:23, 24) Yange nder un shin ku, yem a na sha za ver un sha ian i hemban cii. (Fil. 2:8, 9) Shighe karen yô, Yesu hii u hemen sha Tartor u Aôndo. Ka nyi Tartor la ua ere? Vegher u sha uhar u msen u Yesu tese mbahenen nav la kaa a vese ér: “Tartor wou u̱ va. I̱ er ishima you [Yehova] shin tar kpaa, vough er i eren sha nahan.”—Mat. 6:10.
15. Ka nyi igen kpa Yesu una ere?
15 Ica a gba ga tsô Yesu una ta num sha mbahyomov mba Aôndo, nahan una tim mbaaferev ken ityav mbi Armagedon la. (Mpa. 16:14, 16; 19:11-16) Una eren kwagh ne a been yô, una kende Satan shin “ihyungwa i i ze kweng la,” ape una kera fatyô u eren kwagh môm môm ga yô. (Mpa. 20:1-3) Maa Yesu una hemen anyom dubu, nahan una hide a bem sha tar, shi una wase uumace u hiden lun vough. Una nder mbakpenev. Shi una er tar cii ua hingir paradiso. Awashima u Yehova una kure vough hen shighe la!—Mpa. 21:1-4.
16. Ka nyi ia er hen shighe u Hemen u Anyom Dubu la ua bee kera laa?
16 Ka nyi ia er shighe u Hemen u Anyom Dubu la ua bee kera laa? A kar a isholibo kua myen u uumace cii kera. Uumace vea kera sônon ér i de ve a asorabo a ve sha ci u nagh ku ipaan kura ga; shi a kera lu u a er tom u orhimen shin u upristi la sha ci u uumace kpaa ga. Man “orhyom u a va mase timin kera yô, ka ku.” Hen shighe la a nder ior vea hide a lu uma, nahan iwar ia lu gbilin. Or môm sha tar nana kera lu a myen ga.—1 Kor. 15:25, 26.
17-18. (a) Ka nyi ia er ken mbee u Hemen u Anyom Dubu laa? (b) Yesu una er nyi shighe u hemen na ua bee laa? (1 Mbakorinte 15:24, 28) (Shi nenge foto kpaa.)
17 Ka nyi igen kpa ia er ken mbee u Hemen u Anyom Dubu laa? Hen shighe la kwagh u doon tsung ugen una er. Or môm nana kera huna gbenda u Yehova a eren kwagh la ga. Sha ci u nyi? Satan yange ôr ken sule u Eden ér Yehova ka oraie, shi hemen uumace sha dooshima ga. Hii shighe la je, mbacivir Un tese acin imôngo ér gbenda u a eren kwagh la hemba doon. Nahan a va kar a ilyahan sha iti i Yehova kera vindi vindi ken mbee u Hemen u Anyom Dubu la. Shi una tese wang er un lu Ter wase u sha u se doo un ishima kpishi yô.
18 Ken mbee u Hemen u Anyom Dubu la, hanma or nana fa er akaa a Satan wa Yehova iyol la cii lu aie yô. Ka nyi Yesu una er hen shighe u hemen na ua bee laa? Una hendan a Yehova er Satan nahanaa? Ei! (Ôr 1 Mbakorinte 15:24, 28.) Yesu una hide a Tartor la una na Ter na. Una wa iyol na sha ikyev i Yehova. Yehova doo Yesu ishima, nahan a kegh a kegh iyol u eren hanma kwagh cii sha ci na, kpa kwagh u Satan yô ngu nahan ga.
Yesu hide a Tartor ngu nan Yehova saan saan ken mbee u hemen na u anyom dubu la (Nenge ikyumhiange i sha 18)
19. Iti i Yehova la gba Yesu kwagh nan je?
19 Yehova yange kegh a kegh iyol u nan Yesu iti Na nahan lu sha inja je! Yesu yange tese Or u Ter na a lu la tsembelee. Nahan iti i Yehova la gba Yesu kwagh nan je? I gba un kwagh hemba hanma kwagh ugen cii. Yange kegh iyol u kpen sha ci u iti la, shi una va kegh iyol u hiden a hanma kwagh nan Yehova shighe u hemen na u anyom dubu ua bee la. Se dondo ikyav i Yesu la nena? Ngeren u dondon ne una na mlumun sha mpin la.
ICAM 16 Wuese Yehova Er A Ver Wan Na Tor Yô
a Ashighe agen mbatyomov yange ve lam sha ci u Yehova shighe u a tindi ve ér ve za or ma loho yô. Ka nahan ve ashighe agen yange ortyom nana lam kpa, Bibilo i kaa ér ka Yehova iyol na a lam ye. (Gen. 18:1-33) Er Bibilo i kaa ér Yehova yange na Mose Atindi nahan kpa, avur agen gema kaa ér Yehova yange tindi mbatyomov ér ve za na Mose Atindi la ken iti Na.—Lev. 27:34; Aer. 7:38, 53; Gal. 3:19; Heb. 2:2-4.
b ASEMBER A I TE IWANGER SHA MI YÔ: Inja i ishember i tsegha la yô, ka u nan or icivir shi nengen wer nan ngu a acôghor iyol ga, shin nan nan icivir tsung. Inja i ishember i kar a ilyahan kera la yô, ka u tesen wer or u i lu ôron akaa a aiegh sha iyol i nan la nan er kwagh u bo ga, akaa a nan er la ka a vough.
c Shi ku u Yesu la bugh uumace gbenda u va zuan a uma u tsôron.
d Nenge ngeren u a lu a itinekwagh ér, “Mbampin mba Mbaôron Takeda Ne Ve Pin La” ken Iyoukura i Aipor 2021, peeji 30-31.