Yehova Ôr Akaa a Nan Se Vangertiôr Ér Una Kure Ityendezwa i Paradiso La

1. Ka loho u nyi profeti Yesaia yange ôr ior nav Mbaiserael?

PROFETI Yesaia yange ôr kwagh u Yehova ér, ngu “Aôndo u mimi.” Ishember i ken zwa Heberu i i gem ér “mimi” la, inja na yô ér “amen.” (Yes. 65:16) Inja i ishember i “amen” la ér “i lu nahan,” shin “kpee je.” Ka a ter ishember i “amen” la ken Bibilo yô, i ôron i lu kwagh u Yehova shin Yesu, u tesen ér kwagh u i lu ôron la ka mimi. Sha nahan yô, Yesaia lu kaan a Mbaiserael wang ér: Kwagh u Yehova a tsenga ôron cii ka a va kure sha mi vough. Jighilii yô, Yehova tese ér un kur hanma ityendezwa na cii.

2. Se fatyô u nan jighjigh a akaa a Yehova a tende zwa u va eren se ken hemen la sha ci u nyi, man ka mbampin mba nyi se lu timen sha mini?

² Se fatyô u nan jighjigh a akaa a Yehova a tende zwa u va eren sha ci wase ken hemen la vangertiôr nahan kpa? Yesaia yange kpe anyom kar nôngo u kuman er 800 nahan, maa apostoli Paulu pase er i hii ve uityendezwa mba Aôndo ve gbe inya ga yô. A kaa ér: “Aôndo una fatyô u eren aie ga.” (Heb. 6:18) Hen sha kwagh ne sha gbenda ne nahan. Mngerem ma dedoo kua ma nyohon ma a fatyô u duen hen imbor i môm ga. Kape Yehova u a lu Imbor i mimi la kpa, una fatyô u eren aie ga je la. Sha nahan yô, se fatyô u nan jighjigh a hanma kwagh u Yehova a ôr yô, kua akaa a a tende za u va eren sha ci wase ken hemen la cii. Ken ngeren ne, se lu timen sha mbampin mban: Ka nyi Yehova a tôndo zwa u va nan se ken hemene? Ka akaa a nyi nahan Yehova a ôr u nan se vangertiôr ér una kure ityendezwa na keng a bunde ga?

KA NYI YEHOVA A TENDE ZWA U ERENE?

3. (a) Ka ityendezwa i han i hembe doon mbacivir Aôndo? (Mpase 21:3, 4) (b) Ka sea ôr mbagenev kwagh u ityendezwa la nahan, ve er nena?

³ Ityendezwa i se lu timen sha mi ne, ka ityendezwa i i doo mbacivir Aôndo sha tar cii yô. (Ôr Mpase 21:3, 4.) Yehova tôndo zwa ér shighe ngu van u “ku ua kera lu ga, ijungwen kpa ia kera lu ga, mliam kpa ma a kera lu ga, shi mnyoon kpa una kera lu ga” yô. Se kpishi ka se ôr avur a Bibilo ne sha u surun ior ishima shighe u se lu pasen kwagh shi tesen ve er uma a va lu ken Paradiso yô. Ka sea ôr mbagenev kwagh u ityendezwa ne nahan, ve er nena? Mbagenev ka ve kaa ér, “Kwagh la doo je, shin a va lu nahan mimi je-o?”

4. (a) Shighe u Yehova er ityendezwa i van a Paradiso la, yange fa ér ka nyi ia er sha ayange ase nee? (b) Dugh ityendezwa i Yehova a er la sha yô, ka nyi igen kpa a ere?

⁴ Shighe u Yehova kaa a apostoli Yohane ér a nger kwagh sha kwagh u ityendezwa i Paradiso ne la, yange fa je ér sha ayange a ase ne, se lu ôron ior kwagh u ishimaverenkeghen ne shighe u se lu pasen ve loho u Tartor yô. Shi Yehova tsenga fan er mbagenev kpishi a taver ve u nan jighjigh a “akaa a he” ne yô. (Yes. 42:9; 60:2; 2 Kor. 4:3, 4) Nahan se er nan ve mbagenev vea nenge ér mimi je uma a va lu er i ôr ken Mpase 21:3, 4 la nahan keng a bunde ga? Man se di se er nan ve se seer nan Yehova jighjigh kua akaa a a tende zwa u va eren laa? Yehova ôr akaa a vesen a nan se vangertiôr ér una kure ityendezwa na. A ôr ér nyi?

YEHOVA ÔR AKAA A NAN SE VANGERTIÔR ÉR UNA KURE ITYENDEZWA NA

5. Ka avur a Bibilo a han a ôr akaa a nan se vangertiôr ér Yehova una kure ityendezwa na i van a Paradiso laa, man avur shon ôr ér nyi?

⁵ Avur a Bibilo a a dondo ne ôr akaa a a ne ve se ne jighjigh ser Yehova una kure ityendezwa na i van a Paradiso la yô. I kaa ér: “Un u a tem sha ikyônough ki torough la kaa ér: ‘Nenge! M ngu eren akaa cii a he.’ Shi a kaa ér: ‘Nger kwagh ne, gadia mkaanem man ma kuma u nan ma jighjigh, shi ka ma mimi.’ Shi a kaa a mo ér: ‘Akaa ne hingir mimi ve! Mo m ngu Alefa man Omega, mhii man mkur.’”—Mpa. 21:5, 6a.

6. Akaa a i ôr ken Mpase 21:5, 6 la wase se u seer nan jighjigh a ityendezwa i Aôndo sha ci u nyi?

⁶ Avur ne wase se u seer nan jighjigh a kwagh u Aôndo a tende zwa u eren la nena? Kwagh u Yehova a ôr ken avur ne ér un ngu eren la, ka inja er a wa uwegh shin takeda u tesen ér mimi je una er kwagh u un tende zwa la nahan. Takeda u Revelation Climax la ôr kwagh sha kwagh u avur ne kaa ér, kwagh u Yehova a ôr la tese ér a wa uwegh shin takeda ér kwagh u un kaa ér una er la ka kwagh u bunden ga.b Nahan ken Mpase 21: 3, 4 la, Aôndo ôr kwagh u a tende zwa u eren yô. Ka ve ken ivur i sha 5 man 6 la yô, mkaanem mara tese ér Yehova wa uwegh shin takeda ér una er kwagh u un tôndo zwa la kpee a bunde ga. Nenge ase kwagh u Yehova a ôr u tesen ér a kuma u se na un jighjigh yô.

7. Ka an nan hii kwaghôron ken ivur i sha 5 laa, man kwagh la ngu a inja sha ci u nyi?

⁷ Ivur i sha 5 la hii ér: “Un u a tem sha ikyônough ki torough la kaa ér.” (Mpa. 21:5a) Mkaanem man ma kposo sha ci u, ken takeda u Mpase cii, ka hen ijiir ne kua ajiir agen ahar, Yehova iyol na a ôr kwagh ye. Ka ortyom shin Yesu a ôr mkaanem man ga, kpa ka Yehova iyol na. Mimi ne tese ér se fatyô u nan jighjigh a kwagh ugen u Yehova a ôr ne vangertiôr. Sha ci u nyi? Sha ci u Yehova “eren aie ga.” (Titu 1:2) Se fatyô u nan jighjigh ser kwagh u Mpase 21:5, 6 a ôr la ka kwagh u bunden ga.

“NENGE! M NGU EREN AKAA CII A HE”

8. Ka nyi Yehova a ôr var var i tesen ér una kure ityendezwa na kpee a bunde ga? (Yesaia 46:10)

⁸ Hegen, se lu timen sha ishember i “Nenge!” la. (Mpa. 21:5) Ishember i ken zwa Grika i i gem ér “nenge!” la, i ter i ken takeda u Mpase kwa kimbir kimbir. Takeda ugen kaa ér, ka i ter ishember ne “u kaan a or u nan lu ôron kwagh u i nger la ér, nana ver ishima sha kwagh u dondon u i nger yô.” Ka nyi igen shi Aôndo a ôrô? A kaa ér: “M ngu eren akaa cii a he.” Yehova una va er akaa ne ken hemen. Kpa er a fe ér ka u una kure ityendezwa na ne keng yô, a kaa ér un ngu eren a zan a mi ave.—Ôr Yesaia 46:10.

9. (a) Ishember i “eren akaa cii a he” la ngi ôron kwagh u nyi man nyi? (b) Ka nyi ia va er “sha” u hegen ne man “tar” u hegenee?

⁹ De se time sha kwagh ugen u i ôr ken Mpase 21:5 la. Yehova kaa ér: “M ngu eren akaa cii a he.” Inja i mkaanem man ér nyi? Ityough ki Bibilo kin ôr akaa ahar a Yehova una er yô. Hiihii yô, una tim tar u tse ne kera. Sha uhar yô, una er tar ua hingir u he. Mpase 21:1 kaa ér: “Sha u tse man tar u tse la kar kera.” “Sha u tse,” u i ôr kwagh na heen la, mba ôron ka kwagh u ugomoti mba Satan vea azôv a na ve lu hemen la. (Mat. 4:8, 9; 1 Yoh. 5:19) Ishember i “tar” i i ter ken Bibilo la, ashighe agen ka i ôron i lu kwagh u uumace mba ve tem sha tar la. (Gen. 11:1; Ps. 96:1) Sha nahan yô, ishember i “tar u tse” la, ngi ôron kwagh u uumace mba wan afer mba ve lu shin tar nyian ne. Yehova una sôr a sôr “sha” man “tar” ga, kpa una tim ve kera vindi vindi. Una er sha u hegen man tar u hegen ne a hingir “sha u he man tar u he,” ka gomoti u he man uumace mbaperapera je la.

10. Ka akaa a nyi nahan Yehova una va er a hingir a he?

¹⁰ Shi ka sha gbenda ugen u nyi Yehova una er akaa cii a he? (Mpa. 21:5) Yehova una va sôr akaa a i vihi shin tar ne la, shi una sôr mlu u uumace mba perapera, vea kera lu a myen môm môm ga. Yehova una er tar cii ua hingir ijiir i doonashe, er sule u Eden nahan, u kuren kwagh u Yesaia tsenga ôron la. Shi una er hanma wase cii nana hingir hegh; mba gban awan man mbapirinashe man mbakondonato cii, una er vea hingir dedoo. Mba ve kpe la je kpaa, una nder ve, vea hide a lu uma.—Yes. 25:8; 35:1-7.

“MKAANEM MAN MA KUMA U NAN MA JIGHJIGH, SHI KA MA MIMI. . . . AKAA NE HINGIR MIMI VE!”

11. Ka nyi Yehova yange kaa ér Yohane a ere, man lu sha ci u nyi?

¹¹ Ka nyi igen kpa Yehova a ôr i nan se vangertiôr ér una kure ityendezwa naa? Yehova yange kaa a Yohane ér: “Nger kwagh ne, gadia mkaanem man ma kuma u nan ma jighjigh, shi ka ma mimi.” (Mpa. 21:5) Yehova yange gba kaan a Yohane tsô ér a “nger” ga, kpa pase un ityôkyaa. A kaa ér: “Gadia mkaanem man ma kuma u nan ma jighjigh, shi ka ma mimi.” Inja na yô, mkaanem ma Aôndo man kuma u nan ma jighjigh, shi mshi môm ngu sha mi ga. Se wuese kpishi er Yohane yange nger kwagh u i kaa ér a “nger” la yô. Sha nahan yô, se fatyô u ôron kwagh u ityendezwa i Aôndo a er u van a Paradiso la, shi henen sha averen a kpilighyol a se va zua a mi la.

12. Er nan ve Yehova yange kaa ér: “Akaa ne hingir mimi ve!”?

¹² Shi ka nyi igen kpa Aôndo a ôrô? A kaa ér: “Akaa ne hingir mimi ve!” (Mpa. 21:6) Er nan ve Yehova a ôr kwagh inja ér ityendezwa i Paradiso la kure kera kpaa nahana? A ôr nahan sha ci u kwagh môm kpa una fatyô u yangen un u kuren awashima na ga. Yehova shi ôr kwagh ugen u a ne se vangertiôr ér una kure ityendezwa na keng a bunde ga yô. A ôr ér nyi?

“MO M NGU ALEFA MAN OMEGA”

13. Er nan ve Yehova yange kaa ér: “Mo m ngu Alefa man Omega”?

¹³ Er se vande ôron nahan, Yehova iyol na ôr kwagh a Yohane ken mpase u sha mnenge kwa tar. (Mpa. 1:8; 21:5, 6; 22:13) Man hanma kwa yô, Yehova kimbir mkaanem man ér: “Mo m ngu Alefa man Omega.” Ishember i alefa la, ka ishangebaacaa i hiihii ken asangaabaacaa a Mbagrika. Ishember i omega la di gema ka ishangebaacaa i masetyô. Er Yehova a kaa ér un ngu “Alefa man Omega” yô, ngu wasen se u kaven ér, ka una hii kwagh yô, un kure un keng.

14. (a) Tese ikyav sha kwagh u shighe u Yehova yange ôr sha injakwagh ér “Alefa” yô, man shighe u una va ôr sha injakwagh ér “Omega” yô. (b) Kwagh u i ôr ken Genese 2:1-3 la na se vangertiôr ér nyi?

¹⁴ Yehova yange gbe Adam man Ifa kera yô, a pase awashima u lu a mi ve gba uumace kua tar la. Bibilo kaa ér: “Aôndo ver ve doo doo; Aôndo kaa a ve ér: Mar nen kpishi, seer nen ngeen, iv nen tar, gema nen u, u̱ lu sha ikyev yen.” (Gen. 1:28) Hen shighe la, Yehova kaa ér “Alefa,” inja na yô, un hii. Yange pase awashima na wang. Awashima na shon yô, ka un ne: Shighe ngu van u uumace mba lun a myen môm môm ga, mba ungwan imo i Aôndo mba vea due ken tsombor u Adam man Ifa la vea iv tar, shi vea gema u ua hingir paradiso yô. Hen shighe u awashima u Yehova ne una va kure sha mi la, a lu inja er Yehova kaa ér “Omega” nahan. Yehova yange gbe “sha man tar, kua akum a ve cii” been yô, a ôr kwagh u a tese ér awashima na una kure sha mi keng a bunde ga yô. A ôr kwagh ne ken Genese 2:1-3. (Ôr.) Yehova yange tsegha iyange i sha utaankaruhar la. Inja i kwagh ne ér nyi? Yehova lu kaan ér una kure awashima na u un lu a mi ve un gbe uumace kua tar la keng a bunde ga. Una va kure awashima na la vindi vindi ken mbee u iyange i sha utaankaruhar la.

15. Alaghga tsô Satan yange hen ér un yange Yehova u kuren awashima na sha ci u nyi?

¹⁵ Yange Adam vea Ifa mba hembe Yehova ato yô, ve hingir mbaasorabo. Nahan ônov mba ve due ken a ve la kpa hingir mbaasorabo, shi hingir u vea kpeen. (Rom. 5:12) Kwagh ne na yô, lu inja er uumace mba lun a myen môm môm ga, mba ungwan imo i Yehova vea fatyô u ngeen ivin tar ga nahan. Lu inja er Satan na yô, ka u mayange Yehova una fatyô u kaan ér “Omega” ga nahan. Alaghga tsô Satan hen ér Yehova una fatyô u kuren awashima na la ga. Adooga yange hen ér Aôndo una wua Adam man Ifa kera, una hide a gba nomsoor man kwase, uumace mbagen mba lun a myen môm môm ga, mba vea kure awashima na la yô. Kpa luun er Aôndo er nahala yô, Diabolo ma kaa ér Aôndo er aie. Sha ci u nyi? Er Genese 1:28 a ôr nahan, Yehova yange tôndo zwa a Adam man Ifa ér ônov vev vea iv tar.

16. Satan yange una hen ér kwagh u un kaa ér Yehova a fatyô u kuren ityendezwa na ga la ka mimi sha ci u nyi?

¹⁶ Ka nyi igen kpa alaghga Satan hen ér Aôndo una ere? Alaghga tsô Satan hen ér Yehova una de Adam man Ifa vea mar ônov mbaasorabo, mba a tsa sha won kpa vea ban a myen ga yô. (Orpa. 7:20; Rom. 3:23) Kwagh a luun nahan yô, Diabolo maa una kaa je ér Yehova kanshio u kuren awashima na. Sha ci u nyi? Sha ci u tar fatyô u ivin a ônov mba Adam mba lun a myen shio la ga.

17. Satan kua uumace mba hiihii mbara yange ve hendan a Yehova nahan, Yehova nenge sha zayol la nena, man ikyaa shon ia va kure nena? (Shi nenge foto kpaa.)

¹⁷ Satan yange fa kwagh u Yehova wa ishima u eren sha ikyaa ne la cuku tsô kpaa ga. Yehova lu a gbenda u hemban doon u kuren awashima na, shin er Satan vea Adam man Ifa ve hendan a na nahan kpaa. (Ps. 92:5) Yehova yange de Adam man Ifa ve mar ônov, nahan kwagh u Yehova ôr la kure sha mi vough. Yehova eren aie ga. Shi Yehova tese ér aluer un tôndo zwa u eren ma kwagh yô, kwagh môm u una yange un u kuren ityendezwa na la je kpa ngu ga. Yehova yange tindi “vor” u ua va yima ior mba ken tsombor u Adam mba ve ungwan imo na la, sha er ityendezwa na la ia kure sha mi yô. (Gen. 3:15; 22:18) Ka keng yange a kpiligh Satan iyol a kwagh u Yehova er sha u yiman tsombor u uumace ne! Sha ci u nyi? Sha ci u uumace doo Yehova ishima kpishi, ka nahan ve yange tange iyol ga, tsua u yiman ve sha imba gbenda la ye. (Mat. 20:28; Yoh. 3:16) Satan yô ngu a ieren ne ga, a soo iyol na tseegh. Nahan nagh ku ipaan kun na yô, ka nyi ia va ere? Hemen u Kristu u Anyom Dubu la ua been yô, uumace mba ken tsombor u Adam, mba ve lu a myen môm môm ga shi ve ongo imo i Aôndo la, vea lu ken paradiso shin tar, er sha hiihii la je Yehova wa ishima ér i lu nahan. Hen shighe la, Yehova una ôr sha injakwagh ér “Omega.”

KWAGH U SE ER VE SE SEER NAN JIGHJIGH A ITYENDEZWA I YEHOVA I VAN A PARADISO LA YÔ

18. Ka akaa atar a nyi Yehova a ôr u nan se vangertiôrô? (Shi nenge ngeren u kiriki u a lu a itinekwagh ér, “Atôakyaa Atar a Nan Jighjigh a Ityendezwa i Yehova” la.)

¹⁸ Ken ngeren ne, se time sha atôakyaa a se fatyô u nan jighjigh a ityendezwa i Aôndo a er u van a Paradiso la yô. Nahan ka nyi se ôr a mbagenev ve vea na jighjigh ér mimi je kwagh ne una ere? Hiihii yô, ka Yehova iyol na a er ityendezwa la ye. Takeda u Mpase kaa ér: “Un u a tem sha ikyônough ki torough la kaa ér: ‘Nenge! M ngu eren akaa cii a he.’” Yehova ngu a kwaghfan man tahav kua isharen i eren kwagh u a tende zwa ne. Sha uhar yô, Yehova fa ér kwagh u un tende zwa u eren yô, una kure kpee je a bunde ga. A kaa ér: “Mkaanem man ma kuma u nan ma jighjigh, shi ka ma mimi. . . . Akaa ne hingir mimi ve!” Sha utar yô, kwagh môm kpa una fatyô u yangen Yehova u kuren kwagh u a hii u eren ga. Ka nahan ve a kaa ér: “Mo m ngu Alefa man Omega” ye. Yehova una tese ér Satan ka oraie, shi Satan una fatyô u yangen un u kuren awashima na ga.

19. Aluer or kaa a we ér taver nan u nan jighjigh a ityendezwa i Yehova a er u van a Paradiso la nahan, u er nena?

¹⁹ Umbur wer, hanma shighe u u pase mbagenev kwagh u Yehova a ôr u nan se vangertiôr ér uityendezwa nav vea kure sha mi keng la yô, u seer nan un jighjigh. Nahan aluer u ôr or kwagh u ityendezwa i Yehova i doon tsung, i eren tar hingir u he, i i nger ken Mpase 21:4 la, man nan kaa ér, “Kwagh la doo je, shin a va lu nahan mimi je-o?” nahan, u kaa a nan wer nyi? U fatyô u ôron nan Mpase 21 ivur i sha 5 man 6 la. Tese nan akaa a Yehova a ôr a nan se vangertiôr ér una kure ityendezwa na kpee a bunde ga, man er a we uwegh shin takeda ér una er kwagh shon yô.—Yes. 65:16.