5. Hii nan ve Yesu yange ôr kwagh u seer ishiva sha ayange a uma u oro?

⁵ Ashighe kpishi Bibilo ka i tôô uma i kar sha zende. Ashighe agen ka i̱ kaa jighilii ér uma ka zende, kpa ashighe agen yô i̱ gema i̱ ôr mkaanem ma tesen ér uma ka zende. U tesen ikyav yô, ken ngeren u hiihii u ken zwa Grika la Yesu kaa ér: “Ka an wen je sha ishima i nyian i nan la, nana fatyô u seer ishiva i môm sha ayange a uma u nan ase?” (Mateu 6:27) Alaghga mkaanem man ma a taver we. Nahan ú pine wer, hii nan ve Yesu a er kwagh u seer “ishiva i môm” sha “ayange a uma” u oro? Gadia ishiva ka ikyaren i ilihen, man ka a ôron kwagh u ayange a uma u or yô ka shighe u nan tse sha won la i lu ôron ye.a A̱ shi nan kpa Yesu yange tôô uma kar sha zende heen. Alaghga tsô kwagh u lu ôron heen jighilii yô ér, aluer ishima nyian se nan nan kpa, se fatyô u seer ishiva i môm sha uma wase u a lu er ka zende la ga. Nahan ka u se kure ikyar ser se fatyô u eren kwagh môm sha kwagh u ilihen i zende ne ga shinii? Mayange ga cii! Se time ase sha mpin wase u sha uhar la hegen, a kaa ér, hii nan ve i gbe u se zenden vea Aôndo?