Ka Unô Ve Lu Pasen Loho u Dedoo Shono?

“ . . . á ôr u á tser tar.”—MATEU 24:14.

MBASHIADA mba Yehova mba pasen loho u dedoo ne tar sha won cii. Mba pasen u sha igbenda kposo kposo. Gbenda môm u ve lu samber a loho ne yô, ka sha . . .

U Lamen a Ior. Mbashiada mba Yehova mba ze a loho u dedoo ne hen ior, er Yesu kua mbahenen nav kpa yange ve eren nahan. (Luka 8:1; 10:1) Mba veren ishima ér ior ve vaan a va hen a ve ga. Tom u eren shiada hen ior sha kwagh u Tartor u Aôndo la ka tom u Mbashiada mba Yehova, mba ve hembe iyenge umiliôn utaankaruhar la cica cii, ve eren yô. Mba pasen ior kwaghaôndo sha uya uya, man sha ugodobi, man sha telefon kua sha igbenda igen kpaa. Ken inyom i i kar la, Mbashiada mban er tom ne hemba ahwa biliôn môm man tiôn.

Mba tesen ior kwagh u Tartor u Aôndo tseegh ga, shi mba tesen ve ‘akaa a Yesu wa kwagh sha mi la cii.’ (Mateu 28:20) Mba henen Bibilo a iorov mba hemban iyenge miliôn anigheni sha uya vev a u pinen ve inyaregh shio.

Mbashiada mban mba pasen kwaghaôndo tar sha won cii, ken ityar 236. Mba pasen ior mba sha ajiir kposo kposo kwaghaôndo. Mba pasen kwaghaôndo ken agar a kiriki man ken ugeri mba vesen man ken ikyôngough ki Amazon la man hen haregh u ndôhôr kpishi u i yer ér Siberia la man ken deserti u ken Afrika kua sha Iwo i Himalaya la kpaa. Mba kimbin ve sha tom ne ga; ka inyaregh vev man shighe ve ve lu tôôn eren tom ne a mi ye, man ka mdoo u Aôndo a doo ve ishima kua mbawanndor a ve la a mgbegh ve u eren nahan ye. Shi mba samber a loho u dedoo ne sha gbenda ugen kpaa, u yô ka sha . . .

U Gberen Ityakerada. Iti i Magazin ne jighilii ér Iyoukura U Yôôn Tartor u Yehova; mba gberen un ken ijô 185 hegen, man shi hanma mgber na cii ka i samber a mi je i hemba ukôpi miliôn 42. Magazin ugen kpa ngu u i gberen un vea ngun imôngo yô, un kpa ka sha u yôôn kwagh u Tartor a mi, mba yer un ér Awake!; mba gberen un ken ijô 83, shi hanma mgber na cii ka i samber a mi je i kuma er ukôpi miliôn 40 nahan sha tar.

I gber ityakerada i vesen man i kiriki man ikyatakerada, shi i er icer i CD man MP3 kua icer i DVD cii ken ijô i kuman er 540 nahan, sha u tan iwanger sha atesen a Bibilo. Ken anyom pue a a sember karen ne, Mbashiada mban samber a akaa ne je hemba ukôpi ubiliôn 20 nahan; aluer i kar kwar u vough yô, hanmaor sha tar nana nôngo u zuan a akaa ne je er ukôpi utar utar nahan!

Shi Mbashiada mba Yehova gber mbamgem mba Bibilo kposo kposo ayol a ve shin ve goho ior ér ve gber sha ci ve. Mgem u Bibilo i i yer ér New World Translation of the Holy Scriptures la ka Mbashiada mba Yehova ve gber un, shi ve lu samber a mi kpaa ye, man i gema Bibilo ne jimin cii shin avegher a i̱ ken ijô 96. I samber a ukôpi mba Bibilo ne hemba umiliôn 166 sha tar jimin cii. Mbashiada mba Yehova shi mba er ior loho u dedoo u Tartor ne . . .

Ken Mbamkombo Vev Mba Mbakristu. Mbamkombo mba ka i zaan ken Ayou a Tartor a Mbashiada mba Yehova hanma kasua la ka i lu di u za pasen mbaadua tsô ga; mba eren mbamkombo mban sha gbenda u a tsaase ior yô. Ka i na akaaôron sha atineakaa a ken Bibilo, shi i hen magazin u Iyoukura man shi ityakerada igen i i te iwanger sha akaa a ken Bibilo yô. Shi Mbashiada ka ve hen ve seer fan u pasen loho u dedoo ne tsema tsema ken mbamkombo vev mban.

Kwagh u Mbashiada ve henen ken iniongo i Kristu ve i i hembe iyenge 107,000 sha tar la ngu môm tsô, nahan kwagh ne ngu a seer wasen ve u lun ken mzough. Hanmaor ngu a ian i zan mbamkombo mban. Mba kighir or ér nana er iwua ga. Sha mimi je, luun er Mbashiada mba eren sha kwagh u ve pasen la ga yô, akaa a ve eren ne cii ma a lu a inja ga. Sha nahan yô, mba ve a iwuese sha tom ve u pasen loho u dedoo ne sha u . . .

Veren Ikyav i Dedoo. Mba eren aeren a dedoo a Mbakristu la, nahan mba nôngon sha afatyô ve cii sha u eren a ior sha gbenda u ve kpa ve soon ér ior ve eren a ve la. (Mateu 7:12) Shin er ve kpa ashighe agen ka ve er kwagh a za kpe sha ci u ve yina nahan kpa, sar ve tsung u eren kwagh a ior cii sha dooshima sha u ôron ve loho u dedoo tseegh ga, kpa kua sha u wasen ve sha igbenda igen er ve fetyô la cii.

Mbashiada mba Yehova mba nôngon ér vea gema ior mba sha tar cii sha kwaghaôndo ve u pasen keng ga. Kpa, er Yesu tsengaôron nahan, a eren tom ne a kuman er Yehova a soo la je, maa mkur una va. Mkur ne una va a nyi sha tar kua ior mba ve lu sha u laa?

[Foto u sha peeji 7]

Mbashiada mba Yehova mba pasen loho u dedoo tar sha won cii

Kanyi I̱ Lu ‘Mkuru’?

“. . . ka zum la man mkur una kuma ye.”—MATEU 24:14.

AKAAÔRON a sha kwagh u mkurtar ngee nyian kpen kpen. Ufiim man umagazin man ityakerada, hii sha i i er kwagh u kwaghfan u mbatôvonakaa zan zan za ar sha i i er kwagh u anumbegh cii, i ôr akaa a cieryol wue wue sha kwagh u iyange i mkurtar la. Akaaôron ne pase ér a va ta bom sha tar ne maa ua tim, shin tar ua za kema vea tar ugen ken iamegh gayô bouange una tim ior shin tar ua hia kera sha mtsee gayô mbautyaav vea yem ken iamegh vea za ta ityav sha tar ne.

Ukwaghaôndo kpa mba a mbamnenge kposo kposo; ukwaghaôndo kpishi mba tesen ér sha shighe u “mkur” la a tim hanma kwagh u uma sha tar cii kera. Zum u ortimen sha akaa a kwaghaôndo ugen lu ôron kwagh sha ivur i Mateu 24:14 ne yô, a nger mkaanem ma tesen kwaghtseren u a lu van yô, ér: “Ivur ne ngi môm ken avur a hemban lun a inja cii ken Mkaanem ma Aôndo . . . Kov wase ne ver ishigh ken mtim u gburu gburu je, man ka se ior kpuaa tseegh ka se nôngo u henen sha kwagh u tan ishima kwe ne ye.”

Mbamnenge mban nahan nôngo u miren a mimi u injaa ne: Yehova Aôndo ua “ver” tar la “a gba u er u̱ lu gbilin dang ga, [kpa] a maa u er ior ve̱ tema sha u.” (Yesaia 45:18) Sha nahan yô, shighe u Yesu lu ôron kwagh u “mkur” la, lu veren ishigh ér ka u a va tim tar ne kpôô kpôô ga; shin a va tim uumace mba ve lu sha u la cii eleghee ga. Kpa lu ôron wener ka mbaaferev, inja na yô ka mba ve nômbo ikyôr, ve vende sha apera u eren sha kwaghwan u Yehova a we se sha dooshima la, ka ve a va tim ve kera ye.

Nenge ase ikyav i tesen ne. Tôô wer u maa ya u doonashe tsembelee shi u na ior ya ne wer ve tsaan her gbilin. Mbagenev ken mba ve nyer ya ne mba bem bem ayolave shi ve ver ishima sha ya wou ne kpaa. Kpa mbagenev yô, gema soo ayôôso kpishi, ka ve nôngon num ayolave, shi ve nzughul a mba ve lu veren we ishima sha ya la kpaa. Ve vihi akaa hen ya wou kaca kaca, ka wea venda a ve kpa kwagh a gba ve sha mi ga.

Nahan kanyi u er ve zayol ne una bee? U hembe ya wou la u har kera shinii? U er nahan keng ga. Alaghga ishima a vihi u ker u zenda udangmbaiorov mban hen ya wou kera shi u hide u sôr akaa a ve vihi la kpaa.

Ka kwagh u Yehova kpa una va er vough je la. Jijingi na yange mgbegha orpasalmi ugen nger wener: “Á va tim aferaior kera; kpa mba ve veren ashe hen TER yô, ka ve vea ya dyako u tar ye. Gadia shi côhin tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem.”—Pasalmi 37:9-11.

Apostoli Peteru kpa yange ôr kwagh sha kwagh u mkur ne. Jijingi u Aôndo mgbegha un nger ér: “Sha imo i Aôndo yô, Usha lu tsuaa je kua tar kpaa u u dugh shin mnger man i er u sha mnger kpaa. Ka sha ve kpaa man tar u u lu hen shighe la, mngerem uve u, u tim kera ye.” (2 Peteru 3:5, 6) Heen ne apostoli ne lu ôron kwagh u Mngerem ma Deemee ma sha ayange a Noa la. Ior mba vendan Aôndo mba ve lu sha tar hen shighe la yange ve tim, kpa tar iyol i u yô tim ga. Kwagh u Mngerem ma Deemee ma ma va sha tar cii la hingir “ikyav [“i akaa a a lu van la,” NW] hen mba vea va venda Aôndo la cii.”—2 Peteru 2:6.

Shi Peteru za hemen kaa ér: “Usha mba ve lu hegen kua tar cii . . . , i ver [ve] sha ci u usu.” Aluer se ôr ivur ne se kighir heen tseegh yô, kwagh ne una tsume se. Nahan kpa, nenge ase, ivur ne za hemen kaa ér: “Man mtim u mba ve vende Aôndo la.” Mtim la ka u tar u kpôô kpôô ne ga, kpa ka u mba ve vende Aôndo la. Kanyi ia dondo? Peteru nger ér: “Se mba keghen Usha mba hev je [Tartor u Aôndo sha ikyev i Mesiya] man tar u he [mzough u uumace mba mimi] u perapera una tema ker yô, sha ityendezwa Na la.”—2 Peteru 3:7, 13.

Shi kwaghôron u profeti u ken Bibilo tese ér shighe u “mkur” shon una va la mgbôghom. Ôr Mateu 24:3-14 man 2 Timoteu 3:1-5 tsô u nenge akav aa a tese ér kwagh ne ka mimi yô.a

Kpiligh we iyol kpishi er ivur i Mateu 24:14 i wanye u kpuaa je kpa nana ôr nana kav ne nahan, i gem i lu tsumen ior kpishi yôô? Atôakyaa nga aa a ne ve kwagh a lu nahan yô. Satan pir ior ashe a ishima u nengen a mimi u doon tsung u a lu ken Mkaanem ma Aôndo la. (2 Mbakorinte 4:4) Heela tseegh ga, Aôndo yer mba moron iyol mbaawashima nav kpa a gema a pase mbahiden a iyol ijime mbaawashima mban. Yesu yange ôr kwagh sha gbaa ne kaa ér: “M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikyundanev a yô.” (Mateu 11:25) Mimi je, ka kwagh u civirigh u lun môm ken mbahiden a iyol ijime mba ve fe kwagh u a lu Tartor u Aôndo jim jim, shi ve lu veren ashe keghen averen a ua va a mi hen mba ve lu suen u cica cii la!