U Kegh Iyol u Nyôôso Kpa?
1. Er tar ne u lu geman sha igbenda kposo kposo yô, gba u se kpa se nyôôso nyi?
1 Bibilo ôr kwagh u tar ne ken 1 Mbakorinte 7:31 vough er mba eren iniumbe ka ve geman iyol kua aaven a iniumbe nahan. Er tar ne u lu geman sha igbenda kposo kposo yô, gba u se kpa se nyôôso ashighe a se duen kwaghpasen la, man igbenda i se pasen kwagh la, kua igbenda i se hiin iliam a ior la sha ashighe ashighe. U kegh iyol u nyôôso kpa?
2. Gba hange hange u se nyôôso igbenda i pasen kwagh ser se zaan a nongo u Yehova ityô sha ci u nyi?
2 Igbenda i U Pasen Kwagh La: Tiônnongo u Kristu nyôôso igbenda na hanma shighe cii. Shighe u Yesu hii tindin mbahenen nav ér ve za pase kwagh la, a kaa a ve ér ve de tee akpa sha ci u kwaghyan shin inyaregh ken akpa a ve ga. (Mat. 10:9, 10) Nahan kpa, shi va ngur tindin ve kwagen yô, a nyôôso kwaghwan ne, sha ci u a fa er ior vea va tswam mbahenen nav ken hemen shi tom u pasen kwagh kpa ua lu samber aren ken ityar igen yô. (Luka 22:36) Ken anyom deri a karen la, nongo u Yehova pase kwagh sha igbenda kposo kposo. U tesen ikyav yô, ve pase kwagh a ukaade shi ve pase sha rediô kua sha umato mba yôôn akaa, er gba u a pase kwagh sha igbenda ne sha shighe shon la yô. Nyian ne, er sha ajiir kpishi ior ve fe lun hen uya vev ga yô, se hemba veren ishima u seer eren tom wase u pasen kwagh la sha ajiir a ior ve hembe lun la man sha uya uya man sha hanma shighe u ian i dugh cii. Shi mba taver se ishima ér aluer ior yar tom yô, se due kwaghpasen u sha uya uya aikighe, shighe u se kohol ve hen ya la. Er ikyekyeutya i Yehova la i lu geman yemen hemen hemen nahan, u ngu zan a i ityô kpa?—Esek. 1:20, 21.
3. Aluer se mba nyôôso iliam yase yô, kwaghpasen wase una hemba wasen ior mba hen haregh wase nena?
3 Gbenda u U Lam a Or Yô: Ka nyi ishima i ze ior iyol sha mi hen ijiir you hegene? Ka sha kwagh u inyar shin tsômbor shin u kuran uma ve shin ka ityava? Doo u se fa mbamzeyol mba ior kpishi hen haregh wase ve tagher a mi la ve se wa iyol sha kwagh u se lam a ve sha mi a kôr ve ken ishima ye. (1 Kor. 9:20-23) Zum u or pase se zayol u nan yô, doo u se na nan imo sha mi daalaa tsô maa se za hemen a kwaghôron u se vande wan iyol sha mi la ga, hemba doon u se nyôôso kwaghôron wase, se hide se lam a nan sha zayol u nan la sha gbenda u a wase nan yô.
4. Er nan ve i gbe u se timbir u nyôôso igbenda i se pasen kwagh la ga?
4 Ica ia kera gba ga tsô, “mluashe” u tar ne, u a a lu er ka iaven i masetyô ken iniumbe ne una kure, maa zegecan ia hii. “Shighe kera vese ga.” (1 Kor. 7:29) Sha nahan yô, gba hange hange u se nyôôso igbenda i se pasen kwagh la a atimbir shio, sha er se hemba pasen kwagh hen anshighe u a shi her ne yô!