ITYOUGH 03
U Fatyô u Nan Jighjigh a Kwagh u Bibilo I̱ Ôr Kpa?
Bibilo tôndo zwa a vese sha akaa kpishi, shi i̱ wa se kwagh sha akaa kpishi. A̱ shi nan kpa, sar u u fan kwagh u Bibilo i̱ tese yô, kpa u gema u soo wer u gba hiin u henen i gagher ga. Doo u u na jighjigh a uityendezwa man akaawan a a lu ken takeda u u tse yum nee? Akaa a Bibilo i ôr la nga a inja nyianaa? Se fatyô u nan jighjigh a kwagh u Bibilo i kaa ér a saan se iyol hegen kua ken hemen laa? Ior umiliôn imôngo na jighjigh. De ase se nenge, aluer ka u we kpa u fatyô u nan jighjigh yô.
1. Akaa a i ôr ken Bibilo la yange er mimii?
Bibilo kaa ér ngi takeda shin ‘kwagh u i nger jighilii, u a lu akaaôron a mimi yô.’ (Orpasenkwagh 12:10) Bibilo pase akaa a yange er kpôô kpôô yô, kua ior mba akaa shon er ve la jighilii. (Ôr Luka 1:3; 3:1, 2.) Mbatimen sha akaa a mbayiase kua mbadughun akaa shin inya lumun ér, hanma werayange u akaa a vesen a yange er i nger ken Bibilo la, man ior mba sha shighe shon, kua ajiir a i ter la cii, lu nahan vough.
2. Er Bibilo i tse kpishi nahan kpa, se fatyô u kaan ser Bibilo ngi a inja nyian kpaa sha ci u nyi?
Bibilo ôr akaa kpishi a yange i fa sha ayange a i lu ngeren i̱ la ga yô. Ikyav i tesen yô, Bibilo ter akaa a sha kwagh u sainsi kpaa. Kpa jighilii yô, ior mba sha ayange la kpishi na jighjigh a akaa shon ga. Nahan kpa, mbasainsi mba sha ayange ne lumun ér akaa a sha kwagh u sainsi a Bibilo i ôr la cii ka nahan vough. Akaa shon ‘ka a mimi man a vough kpaa, gbem’ je.—Pasalmi 111:7, 8.
3. Se fatyô u nan jighjigh a kwagh u Bibilo i ôr sha kwagh u akaa a ken hemen la sha ci u nyi?
Bibilo ngi a akaaôron a profetia a a tsenga pasen “akaa a a lu a vande eren ga” yô. (Yesaia 46:10) Bibilo tsenga ôron akaa agen kpishi ica i gba, man akaa shon va er nahan vough. Shi Bibilo vande pasen mlu u tar u lu hegen ne vighe vighe. Ken ityough kin, se lu timen sha akaaôron a profeti agen a Bibilo i̱ ôr la. Gbenda u akaaôron a profeti shon a kure sha mi vough la kpilighyol!
HEN KWAGH I ZA SHIMI
Nenge er mbasainsi mba sha ayange ne ve lumun a kwagh u Bibilo i ôr yô, shi time sha akaaôron a profeti agen a doon ken Bibilo.
4. Mbasainsi lumun a kwagh u Bibilo i ôr yô
Sha ayange a tsuaa la, ior kpishi na jighjigh ér kwagh ngu u tar u tem sha mi yô. Nenge VIDIO i i lu heen ne.
Nenge ase kwagh u i nger ken takeda u Yobu anyom a kar hegen er 3,500 nahan ne. Ôr Yobu 26:7, maa lam nen sha mpin ne:
Er nan ve kwagh u i kaa ér i har tar “sha ma kwagh ga” la i lu kwagh u kpilighyol yumu?
Gbenda u tar u sôron mngerem la kpa yange i fa ga zan zan i va mase fan, er anyom 200 nahan ken ijime. Kpa nenge ase kwagh u Bibilo i̱ ôr anyom a kar hegen er 3,500 nahan ne. Ôr Yobu 36:27, 28, maa lam nen sha mbampin mban:
Gbenda u taver ga, u Bibilo i pase ér tar ngu sôron mngerem la doo u sha ci u nyi?
Avur a Bibilo a u sember ôron ne wase u u seer nan jighjigh wer kwagh u Bibilo i ôr cii ka u mimii?
5. Bibilo yange i ôr akaa a vesen agen, shighe karen yô, akaa shon er
Ôr Yesaia 44:27–45:2, maa lam nen sha mpin ne:
Ka nyi Bibilo yange i̱ tsenga ôron vighe vighe sha kwagh u Babilon anyom kar 200 cii i va mase timin unu?
Yiase tese ér Shirushi, tor u Pershia vea ushoja nav, yange ve ngohol gar u Babilon shighe u shi anyom 539 u a mar Yesu la. Yange ve time akpa, nahan ifi u ta agbaa ningir wa gar u Babilon atô, ve mbaihyomov faantyô u nyôron ker ga la, lu kuwan va goom shin akpa shon yemen pegen. Maa ve nyôr ken gar shon shighe u i undu ihinda na ivegher yô, ve ngohol gar la a u nôngon ityav shio. Kwagh ne er anyom kar hegen hemba 2,500, kpa Babilon ngu ice her. Nenge ase er yange Bibilo tsenga ôron kwagh ne yô.
Ôr Yesaia 13:19, 20, maa lam nen sha mpin u a dondo ne:
Kwagh u yange er gar u Babilon la tese ér kwaghôron u profeti ne kure sha mi nena?
Alôgh a gar u Babilon ken tar u Iraq sha ayange ne
6. Bibilo tsenga ôron akaa a se nenge a lu eren nyian ne
Bibilo yila shighe wase ne ér “ayange a masejime.” (2 Timoteu 3:1) Nenge kwagh u Bibilo i tsenga ôron sha kwagh u shighe ne yô.
Ôr Mateu 24:6, 7, maa lam nen sha mpin ne:
Ka akaa a vesen a nyi nahan Bibilo i tsenga ôron ér aa er ken ayange a masejime?
Ôr 2 Timoteu 3:1-5, maa lam nen sha mbampin mban:
Ka aeren a nyi nahan Bibilo i tsenga ôron ér ior kpishi vea lu a mi ken ayange a masejime nee?
Ka ieren i nyi man nyi nahan ken aeren shon u nenge ior ve lu a mi nyiana?
IOR MBAGENEV KA VE KAA ÉR: “Bibilo ka takeda u ukwaghhir shi u ya tsegh.”
Sha mnenge wou yô, ka nyi i hembe tesen ér kwagh u Bibilo i̱ ôr cii ka mimi?
KA NYI U HENE?
Akaa a Bibilo i ôr, a yiase man mbasainsi kpa ve lumun a mi la, kua akaaôron a profeti cii tese ér u fatyô u nan jighjigh a kwagh u Bibilo i ôr yô.
Mbampin mba umbur kwagh u i hen yô
Akaa a Bibilo i ôr la yange er mimii?
Ka akaa a nyi nahan mbasainsi ve lumun ér Bibilo ôr ka shami voughlo?
U nenge wer Bibilo ka i tsenga ôron kwagh u una va er ken hemene? Er nan u ôr nahana?
SEER HENEN KWAGH
U nenge wer akaa agen a Bibilo i ôr sha kwagh u sainsi la ka a mimi gaa?
“Kwaghfan u Sainsi Lumun a Kwagh u Bibilo I̱ Er Laa?” (Ngeren u sha Intanet)
Ka akaa a nyi nahan Bibilo i ôr sha kwagh u “ayange a masejime” shi a lu erene?
“Akaaôron a Profeti 6 A A Lu Kuren Nyian Yô” (Iyoukura, Mei 1, 2011)
Fa er akaaôron a profeti a Bibilo i ôr sha kwagh u Tartor u Grika la yange kure sha mi la.
Nenge er akaaôron a profeti a Bibilo i̱ ôr la yange na orgen gema gbenda u nengen Bibilo la yô.
“Yange M Na Jighjigh Mer Aôndo Ngu Ga” (Iyoukura Namba 5 2017)
a Akaaôron a profeti ka ilyoho i Aôndo yange a tindi hen ior sha u pasen ve akaa a aa va er ken hemen yô.