Nenge er yange pase mluainja u m-mar u he la wang ken iliam na vea Nikodemu yô. A kaa ér: ‘Saa á mar or hegh, gayô, nana fatyô u nengen tartor u Aôndo ga.’ (Yohane 3:⁠3) Ishember i “saa” man i “fatyô . . . ga” la tese ér m-mar u he la ngu hange hange. U tesen ikyav yô, aluer or kaa ér, “saa iyange ia due, gayô sev mbua fatyô u wanger ga” yô, nan ngu kaan ér gba kpee u iyange ia due ve sev mbua av ye. Nahan Yesu kpa lu kaan ér saa a mar or hegh ve nana nenge a tartor u Aôndo ye.

Aluer se ôr mkaanem ma Yesu mara zulee yô, ma tese ér Yesu yange lu ôron ér or nana fatyô u tsuan iyol i nan ér i mar nan hegh ga. Se ôr nahan sha ci u nyi? Ishember i ken zwa Grika i i gem ér “á mar or hegh” la a fatyô u shi geman i ér “saa á mar or sha.”a Mgem u sha uhar u ishember ne tese ér, m-mar u he la due ka “sha,” shin “hen Ter.” (Yohane 19:11; Yakobu 1:17) Nahan, ka Aôndo a ne i maren or hegh ye.​—⁠1 Yohane 3:⁠9.