Er Nan ve i Gbe u a Mar Ior Heghe?

IOR kpishi na jighjigh ér saa a mar or hegh keng ve nana zua a uma u tsôron ye. Ungwa ase kwagh u Yesu yange ôr ér ka ityôkyaa i maren or hegh ne. A kaa ér: “Saa á mar or hegh, gayô, nana fatyô u nengen tartor u Aôndo ga.” (Yohane 3:⁠3) Nahan gba u a mar or hegh sha er nana nyôr Tartor u Aôndo yô, ka u nana zua a myom ga. ‘Kpa,’ alaghga mbagenev vea pine ér, asember a ahar ne, ‘ishember i nyôron Tartor man i zuan a myom la, nga ôron kwagh u injar i môm ga zee?’ Ei, nga ôron kwagh u injar i môm ga. Cii man se fa mkposo u asember a ahar ne yô, de se vande timen sha inja i ishember i “tartor u Aôndo” la ve.

Tartor ka gomoti. Nahan inja i ishember i “tartor u Aôndo” la yô, ka “gomoti u Aôndo.” Bibilo tese ér ka Yesu Kristu, u a lu “wan u or” la a lu Tor u Tartor u Aôndo ye, shi ngu a ior mba vea tema tor a na imôngo kpaa. (Daniel 7:​1, 13, 14; Mateu 26:​63, 64) Heela tseegh ga, mpase ugen u Yohane nenge a mi yô tese ér i tsua mba vea tema tor a Kristu imôngo la “ken hanma nongo man hanma zwa man hanma nongoior man hanma ikyurior,” man ka u “vea tema tor sha tar.” (Mpase 5:​9, 10; 20:⁠6) Mkaanem ma Aôndo shi pase ér mba vea tema tor la mba “anikumuile u kpeghee” u kuman iorov 144,000 “mba i paa ve shin tar la.”​—⁠Luka 12:32; Mpase 14:​1, 3.

Tartor u Aôndo ngu hana? I yila “Tartor u Aôndo” ér “tartor u Sha.” Kwagh ne tese ér Yesu man atiator a na la vea hemen sha. (Luka 8:10; Mateu 13:11) Nahan Tartor u Aôndo ka gomoti u sha, u Yesu Kristu una hemen vea ior mba i tsough ve ken uumace yô.

Nahan yô, zum u Yesu kaa ér saa a mar or hegh ve nana “nyôr tartor u Aôndo” la, lu ôron ér nyi? Yange lu ôron ér saa a mar or hegh ve nana kuma u hemen sha tartor u sha vea Kristu imôngo ye. U kera ngeen kwagh ga yô, gba u a mar iorov kpuaa hegh sha er a wa ve agoyol u za teman tor sha yô.

Nahan se fa hegen ser m-mar u he la ka kwagh u hange hange, man ka Aôndo a maren ior hegh ye, shi ngu wan uumace kpuaa agoyol u za hemen sha. Kpa mba maren or hegh nena?

[Mkaanem ma sha peeji 7]

Awashima u m-mar u he la yô, ka u wan uumace kpuaa agoyol u za hemen sha

[Foto u sha peeji 7]

Ka Yesu Kristu man uumace mba vea tema tor a na imôngo mbara ve zom ve lu Tartor u Aôndo ye