Mbakristu Mba A Ishimaverenkeghen I Va Lun Uma Gbem Sha Won Shin Tara?
“[Aôndo] una ese ve mliam sha ashe kera cii, ku ua kera lu ga.”—MPA. 21:4.
1, 2. Er nan se fe ser Mbayuda kpishi mba ken derianyom u hiihii mbara lu a ishimaverenkeghen i zuan a uma u tsôron shin tara?
GUMOR ugen u lun a inyaregh shi zan iti kpishi yange va ayem, va gure inya sha ishigh ki Yesu, kende pine un ér: “Ortesen u dedoo, me er nan man me zua a uma u tsôrono?” (Mar. 10:17) Gumor la lu pinen Yesu mpin sha kwagh u zuan a uma u tsôron; kpa lu shin tar soo u zuan a uma u tsôron shin lu sha? Er se vande timen ken ngeren u a kar la nahan, Aôndo yange vande pasen Mbayuda kwagh u ishimaverenkeghen i mnder u shin ku man i zuan a uma u tsôron shin tar la sha ayange a tsuaa la je. Nahan Mbayuda mba ken derianyom u hiihii mbara kpishi lu a ishimaverenkeghen la.
2 A shi nan kpa Marta u lu ijende i Yesu la lu a kwagh u mnder u shin ku la ken ishima, gadia a ôr kwagh u anngô na u saa ku la wener: “M fa, una nder sha mnder u sha iyange i masetyô la.” (Yoh.11:24) Mbasadushi mba sha ayange la na jighjigh a mnder u shin ku ga. (Mar. 12:18) Nahan kpa, George Foot Moore ôr ken takerada na u i yer ér Judaism in the First Centuries of the Christian Era la ér: “Ungeren . . . mba yange i nger ve anyom kar deri uhar shin deri môm cii ve Yesu mase van shin tar la, tese ér ior kpishi mba sha ayange la na jighjigh ér shighe ngu van u ior mba ve kpe sha ashighe a tsuaa mbara cii a va nder ve shin ku, vea hide a lu uma shin tar yô.” Nahan ornyar u va hen Yesu la yange soo u zuan a uma u tsôron shin tar.
3. Ka mbampin mba nyi se lu timen sha mi ken ngeren nee?
3 Ukwaghaôndo man mbatimen sha akaa a ken Bibilo kpishi nyian nyiman kwagh u Yesu tese ér ishimaverenkeghen ngi i zuan a uma u tsôron shin tar la. Ior kpishi mba veren ishima ér zum u vea kpe yô, vea yem vea za lu uma ken tar u ujijingi. Nahan ior ka vea ôron Ruamabera u Mbakristu u ken Zwa Grika la man vea a za duen sha ishember i “uma u tsôron” la yô, ve tôô ér ishember shon ngi ôron kwagh u uma u sha. Kpa ka nahana? Lu nyi Yesu lu ôron zum u a ôr kwagh u uma u tsôron laa? Lu nyi mbahenen nav na jighjigh a mini? Ruamabera u Mbakristu u ken Zwa Grika la tese ér se fatyô u zuan a uma u tsôron shin taraa?
Uma u Tsôron “sha Mgbe u He”
4. Kanyi ia er “sha mgbe u he” laa?
4 Bibilo tese ér a nder Mbakristu mba i shigh ve mkurem mbara shin ku, vea kôndo a yem sha, vea za tema tor sha tar ne. (Luka 12:32; Mpa. 5:9, 10; 14:1-3) Nahan kpa, yange Yesu una ôron kwagh u uma u tsôron yô, a ôr kwagh u anikyumior u kpuaa la tseegh ga. Nenge a ase kwagh u yange ôr a mbahenen nav shighe u gumor u lun a inyaregh kpishi venda u undun akaa a na cii dondon sha Kristu, gema yem kera zunguluu la. (Ôr Mateu 19:28, 29.) Yesu yange kaa a mbaapostoli nav ér mba a kwar ken mba i tsough ve u za teman tor sha, shi ôron “ijir sha ikwe i Mbaiserael i pue kar ihiar la,” inja na yô, vea a lu ator sha uumace mba sha won cii; mba vea lu ken anikyumior u kpuaa ne ga la. Shi yange kaa ér injar ngi sha ci u “hanmaor” u nana dondo un cii. Mbara nahan cii vea “zua a uma u tsôron.” Akaa ne cii aa er “sha mgbe u he” la.
5. Ú pase inja i ishember i “mgbe u he” la nena?
5 Lu nyi Yesu lu ôron zum u a ôr kwagh u “mgbe u he” laa? Mgem u Bibilo i i yer ér The Bible—An American Translation la gema ishember ne ér “tar u he.” Mgem u Bibilo i i yer ér The Jerusalem Bible la di gema ishember ne ér “mgbe u a gba akaa cii hegh la.” Mgem u Bibilo i i yer ér The Holy Bible—New International Version la di gema ishember ne ér “mgem u a gema akaa cii aa hingir hegh la.” Er Yesu yar tom a ishember ne kpa pase inja i i ga yô, a shi nan kpa lu ôron kwagh u Mbayuda vande lun a ishimaverenkeghen sha mi anyom uderi imôngo yô. Yange gba u a hide a sôr mbamlu mba sha tar cii sha er akaa cii aa hingir er yange vande lun ken sule u Eden, shighe u Adam man Ifa lu a gba ken isholibo ga la nahan. Mgbe u he la una kure ityendezwa i Aôndo er ér una ‘gba Usha u he man tar u he’ la.—Yes. 65:17.
6. Injakwagh i iyôngo man ivo la tese se nyi sha kwagh u ishimaverenkeghen i zuan a uma u tsôron laa?
6 Shi Yesu ôr kwagh u uma u tsôron ken kwaghôron na, zum u a lu ôron kwagh u mkurtar la. (Mat. 24:1-3) A kaa ér: “Zum u Wan u or Una va sha iengem Na a mbatyomov mba Shaav cii a Na imôngo yô, zum la Una tema sha ikônough Nagh ki torough ki engem la; á kohol akuraior cii sha ishigh Nagh, Una pav ve kposo er orkuranilev ka nan pav iyôngo a ivo nahan.” Mba ijir ia na ve ibo cii “vea kar vea yem ken mtsaha u tsôron; kpa mbaperapera yô, vea nyôr ken uma u tsôron.” “Mbaperapera” mba vea zua injar i uma u tsôron la ka mba ve sue “anmgbianev” mba Kristu mba i shigh ve mkurem sha jijingi la. (Mat. 25:31-34, 40, 41, 45, 46) Er i tsough mba i shigh ve mkurem mbara u za hemen sha Tartor u sha yô, gba u “mbaperapera” vea lu shin tar sha ikyev i Tartor la. Bibilo tsenga pasen ér: “[Tor u Yehova] una tema tor, hii hen zegemnger zan zan ar hen zegemnger, man shi hii hen Ifi zan zan ar sha akighir a tar.” (Ps. 72:8, NW ) Mba una tema tor sha a ve mban vea zua a uma u tsôron shin tar.
Ivangeli i Yohane Kaa Ér Nyi?
7, 8. Yesu ôr Nikodemu kwagh u ishimaverenkeghen sha igbenda ihiar i nyi?
7 Er i nger ken Ivangeli i Mateu man Marku kua Luka nahan, Yesu yar tom a ishember i “uma u tsôron” ne sha ashighe kposo kposo a i ter sha heen ne. Ivangeli i Yohane kimbir ôron mkaanem ma Yesu ôr sha kwagh u lun uma gbem sha won la kuma kwa 17. De se time sha ashighe shon a Yesu ôr kwagh u ishimaverenkeghen i zuan a uma u tsôron shin tar la.
8 Ken Ivangeli i Yohane la, Yesu hii ôron kwagh teren ishember i uma u tsôron la a Orfarishi u i yilan un ér Nikodemu la. A kaa a Nikodemu ér: “Saa á mar or sha mnger kua Jijingi, gayô, nana fatyô u nyôron tartor u Aôndo ga.” Mba vea nyôr Tartor u Sha cii gba u a “mar ve hegh” keng. (Yoh. 3:3-5) Heela tseegh ga, shi a ôr kwagh u ishimaverenkeghen i i lu sha ci u uumace cii yô. (Ôr Yohane 3:16.) Yesu lu ôron kwagh u ishimaverenkeghen i uma u tsôron sha ci u mba dondon un mba i shigh ve mkurem u yemen sha la kua mbaperapera mba vea lu shin tar la kpaa.
9. Lu ishimaverenkeghen i nyi Yesu lam a kwase Samaria sha mini?
9 Yesu kur kwaghôron na a Nikodemu ken Yerusalem yô, a mough a gba yemen ken Galilia, vegher u sha ityoughkitaregh ki gar u Yerusalem la. Za mgbôghom a gar u Shikar ken Samaria, ape ijôr i Yakob lu ikyua la yô, a zua a kwase ugen her. Tsô a kaa a kwase la ér: “Hanma or u nana ma mngerem ma Mo Me na nan yô, imura ia kera kôr nan mayange ga; kpa mngerem ma Me na nan mara, maa hingir imbormnger ken a nan, maa saar zan zan uma u tsôron.” (Yoh. 4:5, 6, 14) Mngerem man ka akaa a Aôndo a ser a ver sha ci u uumace cii ve̱ zua a uma u tsôron yô, mba vea yem sha la kua mba vea lu shin tar mbara kpaa. Takerada u Mpase ôr kwagh u Aôndo iyolna lu ôr yô, ér: “Or u imura i ker nan yô, Mo Me na nan mngerem ma imbormnger i uma la gbilin.” (Mpa. 21:5, 6; 22:17) Sha nahan yô, Yesu ôr kwase Samaria la kwagh u uma u tsôron sha ci u mba i shigh ve mkurem u za teman tor sha Tartor mbara tseegh ga, kpa a ôr kwagh u uma u tsôron ua lu sha ci u uumace mba nan jighjigh mba ve lu a ishimaverenkeghen i va lun shin tar la kpaa.
10. Lu nyi Yesu ôr a mbakwaghaôndo mba hendan kwagh a na la sha kwagh u uma u tsôron zum u a bee orgen angev hen ityungu i Beteseda laa?
10 Ka ker ken inyom igen yô, Yesu shi za ken Yerusalem, za bee orgen angev hen ityungu i Beteseda. A gema a pase Mbayuda mba ve puu ieren na ne ér: “Wan Una fatyô u gban eren ma kwagh iyol Na ga, saa kwagh u A nenge Ter A eren la.” Yesu pasen ve ér Ter na ‘ijirôron cii sha ikyev i Wan’ yô, a kaa ér: “Or u nan ongo kwaghôron Wam man nan ne Un u A tindim la jighjigh yô, nan ngu a uma u tsôron.” Yesu shi kaa ér: “Shighe ngu van u mba ve lu shin iwar cii vea ungwa imo Na, vea due kpaa; mba ve lu eren akaa a dedoo, vea za ken mnder u uma, kpa mba ve lu eren ifer yô, vea za ken mnder u ijirôron.” (Yoh. 5:1-9, 19, 22, 24-29) Yesu lu ôron a Mbayuda mba ve lu tôvon un a ican la ér ka un Aôndo a tsough sha u kuren ishimaverenkeghen i Mbayuda lu a mi sha kwagh u uma u tsôron shin tar la ye, man una er kwagh ne sha u nderen ior shin ku.
11. Er nan se fe ser Yesu ôr kwagh u ishimaverenkeghen i zuan a uma u tsôron sha tar la ken mkaanem nam ma i nger ken Yohane 6:48-51 laa?
11 Shighe u lu ken Galilia la, ior udubu imôngo mba yange ve soo u shi yan kwaghyan u Yesu na ve sha ivande la gba dondon un ijime. Nahan Yesu ôr ve kwagh u kwaghyan ugen, u a lu “kwaghyan u uma” la. (Ôr Yohane 6:40, 48-51.) A kaa ér: “Kwaghyan u Me na yô, ka iyol Yam je.” Yesu na uma na lu sha ci u mba vea za tema tor a na imôngo sha Tartor na la tseegh ga, kpa kua “sha ci u uma u tar” u uumace mba ve kom u a yima ve la cii. “Aluer anti or nana ya kwaghyan ne yô,” inja na yô, nana na nagh ku ipaan ku Yesu kura jighjigh yô, nana lu a ishimaverenkeghen i zuan a uma u tsôron. Sha kpôô yô, kwagh u i kaa ér nana “lu uma gbem sha won” la vande lun ishimaverenkeghen i Mbayuda ica i gba, ve lu veren ishima keghen ér kwagh ne una er shighe u Mesiya una tema tor la.
12. Lu ishimaverenkeghen i nyi Yesu ôr kwagh u i zum a kaa a mba hendan kwagh a na mbara ér ‘una na iyôngo na uma u tsôron’ laa?
12 Shighe kar yô, Yesu za Iniongo i Mtsegh u Tempel ken Yerusalem, tsô a kaa a mba hendan kwagh a na mbara ér: “Ne na jighjigh ga, sha ci u ne lu ken iyôngo Yam ga yô. Iyôngo Yam ngi ongo imo Yam, Mo kpaa M fa i, ngi dondon sha a Mo kpaa. Mo M ne i uma u tsôron.” (Yoh. 10:26-28) Yesu lu ôron kwagh u uma u tsôron sha Tartor tseegh shin lu ôron kwagh u uma u tsôron ken paradiso shin tar kpaa? Yesu sur mbadondon un asema sha mkaanem man ica i lu a gba ga. A kaa a ve ér: “Ne anikumuile u kpeghee ne, de cie nen ga! Gadia i doo Ter wen u nan ne tartor la.” (Luka 12:32) Nahan kpa, sha shighe u Iniongo i Mtsegh u Tempel shon la je, Yesu kaa ér: “M ngu a iyôngo igen i i lu hen ityôr ne ga yô, i kpaa Me va a i keng.” (Yoh. 10:16) Sha nahan yô, zum u Yesu lu lamen a mba hendan kwagh a na mbara la, a lu ôron kwagh u ishimaverenkeghen i zuan a uma u tsôron sha Tartor sha ci u “anikumuile u kpeghee” la man ishimaverenkeghen i zuan a uma u tsôron shin tar sha ci u “iyôngo igen” i i lu umiliôn imôngo la.
Ishimaverenkeghen i Yange Gba u Yesu Una Pase Inja i I̱ Keng Ga Yô
13. Lu nyi Yesu lu ôron zum a kaa ér: “Ú lu a Mo imôngo ken Paradiso” laa?
13 Zum u Yesu lu ken ican tsung sha kon u mtsaha la, a ôr kwagh u tesen ér ishimaverenkeghen ngi sha ci u uumace je anyiman nga sha mi ga. Iferor u i mande un a Yesu imôngo la kaa a na ér: “Yesu, umbur mo zum u Wea nyôr sha tartor Wou yô.” Yesu gema tôndo zwa a na ér: “Mimi je M kaan we nyian ne, ú lu a Mo imôngo ken Paradiso.” (Luka 23:42, 43, NW ) A shi nan kpa or ne lu Oryuda, nahan lu u saa a pase un a pase kwagh u Paradiso keng ga. Yange fa kwagh u ishimaverenkeghen i va lun uma gbem sha won shin tar la.
14. (a) Kanyi i tese ér kwagh u Yesu ôr a mbaapostoli sha kwagh u ishimaverenkeghen i yemen sha la taver ve u kavena? (b) Lu hanma shighe mbadondon mba Yesu kav kwagh u ishimaverenkeghen i yemen sha la wang-na?
14 Nahan kpa, kwagh u gema gba u a pase inja na yô, lu ishimaverenkeghen i yemen sha la. Shighe u a kaa a mbahenen nav ér un ngu yemen sha una za sôr ve ijiir la, ve kav inja i kwagh u lu ôron ve la ga. (Ôr Yohane 14:2-5.) Shighe kar yô, a kaa a ve ér: “Akaa shim kpishi a ma M er ne yô, kpa ne kôr a cio hegen ga. Kpa zum u Un, Jijingi u mimi la, Una va va yô, Una hemen ne Una za a ven ken mimi cii.” (Yoh. 16:12, 13) Nahan lu zum u i shighe mbadondon mba Yesu mkurem sha jijingi u Aôndo sha iyange i Pentekosti ér ve va lu ator ken hemen la ve, mase wanger ve er mkônom vem ma torom ma lu sha ye. (1 Kor. 15:49; Kol. 1:5; 1 Pet. 1:3, 4) Ishimaverenkeghen i yemen sha la lu kwagh u i va mase pasen yô, nahan ishimaverenkeghen ne hingir kwagh u uwashika mba i nger ken Ruamabera u Mbakristu u ken Zwa Grika la cii har sha mi je la. Kpa uwashika mban ve seer taver ishimaverenkeghen i uumace i zuan a uma u tsôron shin tar laa?
Uwashika Mba Jijingi Mgbegha Mbaapostoli Nger la Kaa Ér Nyi?
15, 16. Washika u jijingi mgbegha Paulu nger hen Mbaheberu, man mkaanem ma Peteru la tese kwagh u ishimaverenkeghen i uma u tsôron shin tar nena?
15 Ken washika u apostoli Paulu nger Mbaheberu mba nan jighjigh a na imôngo la, a yila ve ker ér “uicighananmgbianev mba ne lu a kwar sha myer u a dugh Sha” la. Nahan kpa, shi a kaa ér Aôndo ‘na tar u u lu van, u se lu ôron kwagh u u la sha ikyev’ i Yesu. (Heb. 2:3, 5; 3:1) Ken Ruamabera u Mbakristu u ken Zwa Grika la, ishember i i gem ér “tar u u lu van” la ngi ôron kwagh u tar u uumace ve tem sha u yô. Sha ityôkyaa ne yô, “tar u u lu van” la ka tar u he u ua lu sha ikyev i mtemtor u Yesu Kristu la. Hen shighe la Yesu una kure ityendezwa i Aôndo a er wener: “Mbaperapera vea ya dyako u tar, vea lu ken u gbem” la.—Ps. 37:29.
16 Shi jijingi mgbegha apostoli Peteru nger kwagh sha kwagh u mlu u uumace u ken hemen. A nger ér: “Usha mba ve lu hegen kua tar cii, ka sha imo la i môm i môm man i ver shi i kuran ve sha ci u usu, zan zan á va kuma sha iyange i ijirigh man mtim u mba ve vende Aôndo la ye.” (2 Pet. 3:7) Kanyi ia tile sha ityough ki ugomoti man tar u ifer u hegen ne? (Ôr 2 Peteru 3:13.) A lu “Usha mba hev,” ka Tartor u Aôndo sha ikyev i Mesiya je la, man “tar u he,” ka tar u perapera u uumace mba civir Aôndo sha mimi vea tema ker yô.
17. I pase kwagh u ishimaverenkeghen i uumace la ken Mpase 21:1-4 nena?
17 Takerada u masetyô ken Bibilo na mpase u sha mnenge u sagher iyol, u a tese ér a va hide a uumace cii sha mlu u vough yô. (Ôr Mpase 21:1-4.) Hii shighe u Adam gba ken isholibo ken sule u Eden la je, ka ishimaverenkeghen i uumace mba nan jighjigh cii ve lu a mi je ne. Mbaperapera vea lu ken Paradiso shin tar gbem sha won aa iyolbeen shio. Ishimaverenkeghen ne i har sha Ruamabera u ken Zwa Heberu man u ken Zwa Grika la, man zan zan nyian kpa ngi taver mbatomov mba Yehova mbajighjigh ishima her.—Mpa. 22:1, 2.
Ú Fatyô u Pasen Kpa?
• Lu nyi Yesu lu ôron zum u a ter ishember i “mgbe u he” laa?
• Yesu lam a Nikodemu sha kwagh u nyi?
• Yesu yange tôndo zwa a iferor u i mande un sha kon u mtsaha a na imôngo la ér nyi?
• Washika u jijingi mgbegha Paulu nger hen Mbaheberu, man mkaanem ma Peteru la tese kwagh u ishimaverenkeghen i uma u tsôron shin tar nena?
[Foto u sha peeji 8]
Mba ve lu iyôngo i Yesu la vea zua a uma u tsôron shin tar
[Foto u sha peeji 10]
Yesu ôr mbagenev kwagh u uma u tsôron