ITYOUGH 53
Er Kwagh u Una Doo Yehova Shighe u U Lu Eren Kwagh u Nan We Msaanyol Yô
Yehova ka “Aôndo u sar sar.” (1 Timoteu 1:11) A soo ér i saan se iyol shi i kpe se iyol. Ka sea ver ishima sha kwagh u tom tseegh ga kpa sea ver shighe u memen shi sea eren kwagh u nan se msaanyol nahan i doo un kpen kpen. Ken ityough kin, se lu henen kwagh u se er shighe u se lu memen ve, a saan se iyol shi Yehova kpa a lu sha ishima na yô.
1. Ka nyi i gbe u se umbur shighe u se lu tsuan kwagh u nan se msaanyol u se ere?
Ka nyi ka i doo u u eren shighe u u lu memene? Mbagen mba hembe soon u lun hen ya memen, ka i doo ve u teman ving ôron takeda gayô ungwan ityogholough shin nengen fiim gayô keren akaa sha Intanet. Mbagen di ka ve hemba soon u tôôn shighe ve u memen la eren akaa imôngo vea azende a ve, er u zenden nengen ajiir shin za gban iyol gayô gbidyen gyeem nahan. A lu nyityôkwagh je se tsough u eren cii kpa, gba u ia lu sha “ishima i Ter.” (Mbaefese 5:10) Gba hange hange u se fa kwagh ne sha ci u akaa a ior ve nengen shin ve ungwan sha u zuan a msaanyol la kpishi ka a tese ipila man idya shin akaa a mbaimegh, man akaa ne cii Yehova kôr a ihyom. (Ôr Pasalmi 11:5.) Ka nyi ia wase se u tsuan akaa a nan se msaanyol sha injaa?
Aluer se kôr ijende a ior mba Yehova a doo ve ishima yô, vea wase se u lun a aeren a dedoo shi se tsuan akaa a nan se msaanyol sha inja. Er yange se hen ken ityough ki sha 48 la nahan, or u nan ‘zenden a mbafankwagh imôngo’ yô, nana ‘hingir orfankwagh.’ Nahan kpa, aluer hanma shighe se mba lun imôngo vea ior mba atindi a Yehova a doo ve ishima ga yô, se “zua a ican.”—Anzaakaa 13:20.
2. Er nan ve i doo u se wa ikyo sha shighe u ka se tôô u eren akaa a nan se msaanyol laa?
Aluer akaa a nan se msaanyol a se tsough u eren la ka a Yehova a vende ga je kpa, doo u se wa ikyo sha er aa ya se shighe kpishi ga yô. Sha ci u kwagh la una na se kera lu a shighe kpishi u eren akaa a a hembe lun a inja la ga. Bibilo wa se kwagh ér se eren kwagh “a shighe [wase] sha inja.”—Ôr Mbaefese 5:15, 16.
HEN KWAGH I ZA SHIMI
Hen fa er u tsua akaa a nan we msaanyol sha inja yô.
3. Palegh akaa a ior ve eren u zuan a msaanyol a a doo ga la
Er nan ve i doo u se tsuan akaa a nan se msaanyol sha injaa? Nenge VIDIO i i lu heen ne, maa lam nen sha mbampin mba ve dondo ne.
Anumbe a ngise i eren ken Roma la, nôngo u lun kwaghmôm a akaa agen a ior ve eren nyian sha u zuan a msaanyol la nena?
Ken vidio la, ka nyi Danny a hen sha kwagh u akaa a nan msaanyolo?
Ôr Mbaroma 12:9, maa lam nen sha mpin ne:
Doo u ivur ne ia wase se u tsuan akaa a nan se msaanyol nena?
Ka akaa a nyi nahan Yehova a kôr a ihyomo? Ôr Anzaakaa 6:16, 17 man Mbagalatia 5:19-21. Ne ôron avur ne ne been yô, lam nen sha mpin ne:
Ka akaa a i ter ken avur ne a nyi u nenge ior ve hembe eren nyian sha u zuan a msaanyolo?
Er u tsua akaa a nan we msaanyol sha inja yô
Pine iyol you wer:
Kwagh u m soo u eren u zuan a msaanyol ne tese ma kwagh u Yehova a ker un ihyom yô kere?
Kwagh u m soo u eren u zuan a msaanyol ne, una yam shighe u eren akaa a a hembe lun a inja laa?
Kwagh u m soo u eren u zuan a msaanyol ne, una na me hingir u lun imôngo vea ior mba Yehova a doo ve ishima ga yôô?
Hemba doon u u nôngo sha afatyô wou cii u palegh kwaghbo. Ka nahan ve i doo u se palegh nyityôkwagh i nan msaanyol i se nenge ser ia doo sha ci wase ga cii ye
4. Eren kwagh a shighe wou sha inja
Nenge VIDIO i i lu heen ne, maa lam nen sha mpin u a dondo ne.
Er akaa a anmgbian u ken vidio la a lu nengen la i lu a bo ga nahan kpa, kwagh la va un a zayol u nyi?
Ôr Mbafilipi 1:10, maa lam nen sha mpin ne:
Ivur ne ia wase se u fan shighe u i doo u se tôô u eren akaa a nan se msaanyol la nena?
5. Tsua akaa a nan msaanyol a a doo sha ci wou yô
Er akaa a nan msaanyol agen a doo Yehova ga nahan kpa, agen nga kpishi a a doo shi a lu sha ishima na, a u fatyô u eren yô. Ôr Orpasenkwagh 8:15 man Mbafilipi 4:8, maa lam nen sha mpin ne:
Ka akaa a nan msaanyol a dedoo a nyi nahan ka a doo u we?
U fatyô u eren akaa a nan we msaanyol a a doo yô
IOR MBAGENEV KA VE KAA ÉR: “Aluer m ngu nengen shin ungwan akaa a nan msaanyol a a tese ipila man ijimba kua akaa a mbaimev, kpa er m lu eren a kpôô kpôô ga je, ka kwaghbo ga.”
We u kaa wer nyi?
KA NYI U HENE?
Yehova soo ér se tsua akaa a nan se msaanyol a a doo yô.
Mbampin mba umbur kwagh u i hen yô
Ka akaa a nan msaanyol a nyi i gbe u Mbakristu vea palegha?
Er nan i doo u se wa ikyo sha shighe u ka se tôô u eren akaa a nan se msaanyol laa?
Er nan u soo u tsuan akaa a nan we msaanyol a a doo Yehova?
SEER HENEN KWAGH
Hen fa or u i gbe u nana tsua akaa a nan msaanyol sha ci wase la.
Nenge er u tsua akaa a nan we msaanyol a u er shighe u lu memen la sha inja yô.
“Iemberyolough You Ngi Wasen We Kpa?” (Iyoukura, Oktoba 15, 2011)
Nenge er yange hii ve orgen de akaa a ngise eren u zuan a msaanyol la, ken ngeren u “M De Ihyom i Kôron” la.
Nenge er kwase ugen yange er kwagh sha inja zum u asegh sha fiim i i tese kwagh u mbaimegh yô.
Palegh Akaa A Nan Msaanyol A a Tese Kwagh u Mbaimegh Yô (2:02)