Adrián yange hii u henen Bibilo shighe u lu anyom 16 la. Shi a kaa ér: “Yange m gbe henen Bibilo yemen yô, m va nenge mer gba u me de uma u m lu eren la.” Yange gba u una de u kôron ior ihyom shi una de u tswamen ve. Kwagh u yange hemba wasen un yô, ka kwagh u Bibilo i ôr ken Mbaroma 12:17-19 sha kwagh u iyev i oron la. A kaa ér: “Yange m va hingir u nan jighjigh mer Yehova una va er kwagh sha afer a i eren mbagenev la, er a nenge i doo un la, man hen shighe u a soo la. Nahan kure kure tsô, m va de u tswamen ior.”
Sha iyange igen la aikighe, agumaior a Adrián yange nôngon num a ve kpa va de yô, va ta num sha a na. Maa wannomso u lu hemen annongo shon la gba ngoron kaan ér: “Nôngo ase kwagh a vese!” Adrián kaa ér: “Yange usam ken ishima er m or iyev, m nôngo num a ve nahan, kpa m gema m er msen hen Yehova shin ishima tiônôô, maa m kar hen ijiir la kera.”
Adrián shi kaa ér: “Mba ker ken sev mbugen yô, m za nenge a wannomso shon u hemen annongo u mbawan tswam la un tswen. Yange ishima usam ker er m nôngo num a na nahan. Kwa ne kpa, m er msen hen Yehova ving ving, m zamber a na mer a wasem me kôr iyol yam tsaha. Yange m hen mer wannomso la una vihi ishima a mo, kpa gema er kwagh u kpiligh mo iyol; a va jighilii a va kaa a mo ér: ‘Yam anyi sha kwagh u nyen m er a we tugh la. Jighilii yô, m soo u lun er we nahan.’ Yange saan mo iyol kpishi er m fatyô u kighir ishimanyoon yam la yô. Kwagh ne na yô, m hii u henen Bibilo a na.”