Ior mba a mbamnenge kposo kposo sha kwagh u msôr sha tar. Mbagen ka ve tsua u man msôrom shighe u ve lu vea azende a ve imôngo yô. Mbagenev yô tsua ér vea ma msôrom ga kuaa. Mbagen di yô, ka ve ma zan zan ve hunde. Kpa ka nyi Bibilo i ôr sha kwagh u msôrô?

1. Ka kwaghbo u man ikyôhôô?

Bibilo yange ikyôhô i man ga. Jighilii je yô, Bibilo kaa ér msôrom ka iyua igen i Aôndo a ne se yô. I kaa ér Aôndo er “zar u wain sha u nan or msaanyol.” (Pasalmi 104:14, 15) Nomso man kasev mbajighjigh mbagen mba Bibilo i ôr kwagh ve kpa yange ve ma msôrom.—1 Timoteu 5:23.

2. Ka kwaghwan u nyi Bibilo i we mba ve tsua u man msôromo?

Yehova venda msôrom ma man karen ikyaa inya kua msôrom ma hunden. (Mbagalatia 5:21) Mkaanem nam kaa ér: ‘De luun a mbamanmsôrom [karen ikyaa inya] imôngo ga.’ (Anzaakaa 23:20) Sha nahan yô, aluer se tsua u man msôrom shighe u se lu vea ior shin se lu se tseegh kpa, doo u se ma msôrom je, se kera lu henen kwagh sha inja ga, shin se hii u lamen shin eren kwagh sha inja ga, shin se hingir u gban angev ga. Kpa aluer se mba fantyô u kôron iyol tsaha sha u man msôrom akuma akuma ga yô, a gba u se de a de u man msôrom kuaa.

3. Se tese ser se na kwagh u mbagen ve tsough sha kwagh u msôrom la icivir nena?

Gba u hanma or nana tsua u man ikyôhô iyol i nan shin man ga. Aluer or tsua u man msôrom a kuma akuma yô, gba u se puu nan ga shi aluer or soo u man msôrom ga yô, gba u se zer zan nan iyol ser nana ma ga. (Mbaroma 14:10) Shi ka se palegh u man msôrom zum u se nenge ser aluer se ma yô, kwagh shon una na mbagen gbev mbu nôngon la. (Ôr Mbaroma 14:21.) Doo u se keren ‘kwagh u una lu mbagenev a iwasen yô, i̱ de lu sha ci u iwasen i yase ga.’—Ôr 1 Mbakorinte 10:23, 24.

HEN KWAGH I ZA SHIMI

4. Aluer u tsua u man msôrom yô

Yesu yange nenge msôrom ma man nena? Wea soo u fan yô, nenge ase ivande i hiihii i yange hii eren ne. Ôr Yohane 2:1-11, maa lam nen sha mbampin mban:

• Ivande ne i wase se u fan gbenda u Yesu a nengen msôrom ma man kua ior mba ve me la nena?

• Er Yesu a yange msôrom ma man ga yô, doo u Orkristu nana nenge or u nan tsough u man msôrom la nena?

Er i yange Orkristu u man msôrom ga nahan kpa, kwagh la maa tese ér gba u nana maan msôrom hanma shighe ga. Ôr Anzaakaa 22:3, maa nenge er atôakyaa a a dondo ne aa wase u u nengen aluer ka u u ma msôrom shin u ma ga yô:

• Gba u u naha mato shin u er tom a mashini?

• U ngu iyava?

• Ortwer kaa a we ér u de me msôrom gaa?

• U fetyô u kôron iyol tsaha man msôrom akuma akuma gaa?

• Tindi u tar wou venda ér u de me msôrom gaa?

• U ngu vea or u nan de msôrom sha ci u yange i taver nan kpishi u kôron iyol tsaha man msôrom akuma akuma yôô?

Aluer u ngu henen sha kwagh u nan ior msôrom hen iniongo i ivesegh shin ma iniongo igen yô, nenge ase kwagh u una wase u u fan kwagh u u er ne, Nenge VIDIO i i lu heen ne.

VIDIO: M Na Ior Msôromo? (2:41)

Ôr Mbaroma 13:13 man 1 Mbakorinte 10:31, 32. Ne ôron avur ne ne been yô, lam nen sha mpin ne:

• U dondo kwaghwan ne sha er u tsua kwagh u una doo Yehova nena?

5. Fa er u ma msôrom ve a lu akuma akuma yô

Aluer u tsua u man msôrom yô, umbur kwagh ne: Er Yehova a yange msôrom ma man ga nahan kpa, a gema a venda msôrom ma man karen ikyaa inya la. Er nan a vende? Ôr Hosea 4:11, 18, maa lam nen sha mpin ne:

• Aluer or ma msôrom kar ikyaa inya yô, ka nyi ia fatyô u erene?

Se er nan ve se palegh u man msôrom karen ikyaa inya? Gba u se eren kwagh akuma akuma shi se fa ikighir yase. Ôr Anzaakaa 11:2, maa lam nen sha mpin ne:

• Er nan ve i doo u u man msôrom a karen ikyaa inya ga?

6. Kwagh u una wase or nana de u man msôrom karen ikyaa inya yô

VIDIO: ‘M Vôr a Uma u M Lu Eren La’ (6:32)

• Vidio ne tese ér Dmitry yange una ma msôrom yô, a eren kwagh nena?

• Yange de msôrom ma man ave ave jee?

• Yange er nan ve va de u man msôrom karen ikyaa inyaa?

Ôr 1 Mbakorinte 6:10, 11, maa lam nen sha mbampin mban:

• Er nan ve i gbe u se nenge msôrom ma hunden beelee ga?

• Ka nyi i tese ér or u nan hunden msôrom shin nan man msôrom i karen ikyaa inya nana fatyô u gemana?

Ôr Mateu 5:30, maa lam nen sha mpin ne:

• Shighe u Yesu ôr injakwagh sha kwagh u tôndon uwegh la, lu kaan ér a gba u se de kwagh a kar se sha er se er ishima i Yehova yô. Aluer u ngu nôngon wer u de u man msôrom kpishi shin u de u hunden msôrom yô, u fatyô u eren nyi?a

Ôr 1 Mbakorinte 15:33, maa lam nen sha mpin ne:

• Azende a ou aa na u fatyô u man msôrom akuma akuma shin man karen ikyaa inya nena?

KA NYI U HENE?

Yehova na se msôrom sha er se maan, i saan se iyol yô. Kpa a gema a venda msôrom ma man karen ikyaa inya kua msôrom ma hunden.

Mbampin mba umbur kwagh u i hen yô

• Bibilo ôr ér nyi sha kwagh u man msôromo?

• Aluer or ngu man msôrom karen ikyaa inya yô, ka akaabo a nyi aa fatyô u duen kere?

• Aluer mbagen tsua u man msôrom shin man ga yô, se tese ser se na kwagh u ve tsough la icivir nena?

SEER HENEN KWAGH

Agumaior a a er kwagh sha inja sha gbar u man msôrom nena?

Hen sha Akaabo a Msôrom Ma Ve a Mi la Cii u Ma Ye (2:31)

Nenge akaa a u fatyô u eren sha er u de u man msôrom karen ikyaa inya shin hunden msôrom yô.

“Maan Msôrom Akuma Akuma” (Iyoukura, Janawari 1, 2010)

Doo u Orkristu nana er kwagh u ka i kende a kôôpu u msôr sha i kuma sha kôôpu orgen laa?

“Mbampin mba Mbaôron Takeda Ne Ve Pin La” (Iyoukura, Febewari 15, 2007)

Ôr ngeren u “Yange M Ma Msôrom Vough Er mba Haan shin Drôm u Peven Nahan” la, nahan nenge er orgen yange de msôrom ma man kpishi yô.

“Bibilo Gem Ior” (Iyoukura, Mei 1, 2012)

Hanma wase yô, nan ngu a gbenda u ka nan soo ér nana wuha iyol yô, man er nana lu sha ashe la. Aluer se mba dondon akaawan kpuaa a Bibilo i we sha ikyaa ne shi a taver ga la yô, se fa er se wuha iyol ve a doo se tseegh ga, kpa a doo Yehova kpaa yô. De se time ase nen sha akaawan ne agen.

1. Ka akaawan a nyi nahan i doo u aa wase se u fan iyol i se wuha shin hwe u se ere?

Gba u se “wuhan iyol sha inja, akuma akuma man sha kwaghfan,” shi se luun tsembelee sha er ior vea nenge er se lu “mba civir Aôndo” yô. (1 Timoteu 2:9, 10) Nenge ase akaawan a anyiin ne: (1) Gba u se “wuhan iyol sha inja.” Er u nenge ken mbamkombo asev nahan, ior mba Yehova ka ve wuha iyol sha igbenda kposo kposo. Nahan kpa, iyolwuhan yase kua gbenda u se eren ityough shin se hondon ityough la cii, ka u tese ér se mba ne Aôndo wase icivir. (2) Gba u iyolwuhan yase ia lu “akuma akuma,” inja na yô, doo u se wuha iyol sha gbenda u ua kende isharen i idyaa ken or shin ape se kar cii ior vea haa ashe sha vese ga yô. (3) Se er kwagh “sha kwaghfan,” ka hanma ityô ikyondo shin ma gbenda u he u wuhan iyol u u za dugh cii, se yem zendan ga. (4) Gba u hanma shighe cii yô, mluashe wase una tesen ior wang ér se mba ior “mba civir Aôndo” shi se mba civir Aôndo u mimi.—1 Mbakorinte 10:31.

2. Er nan i doo u se hen sha kwagh u anmgbianev asev mba nomso man mba kasev shighe u se lu wuhan iyolo?

Er se lu a ian i tsuan ikyondo i se soo u huan cii nahan kpa, doo u se nenge aluer ka u iyolwuhan yase la ia za mbagen iyol yô. Ka se nôngo sha afatyô wase sha er se er kwagh u vihin mbagen ga, kpa se ‘er kwagh u doon mbawanndor a vese sha u taver ve ishima’ yô.—Ôr Mbaroma 15:1, 2.

3. Gbenda u se wuhan iyol la ua na a sar mbagen u va civir Yehova nena?

Er ka se nôngo ser se wuha iyol sha inja hanma shighe nahan kpa, se mba hembe veren ishima sha iyol wuhan yase shighe u se lu zan mbamkombo mba tiônnongo shin se lu duen kwaghpasen yô. Se mba wuhan iyol sha gbenda u ua na ior vea kera soo u keghen ato a loho wase ga ze. Kpa ka se wuha iyol sha gbenda u ua na a sar mbagenev u va civir Aôndo shi ‘ityesen i Oryiman wase, ia seer doon ve ishima’ yô.—Titu 2:10.

HEN KWAGH I ZA SHIMI

4. Ka sea luun sha ashe tsembelee yô, se naan Yehova icivir

Ka ityôkyaa i vesen i nyi i ne ve i doo u se luun sha ashe tsembelee? Ôr Pasalmi 47:2, maa lam nen sha mbampin mban:

• Aluer se umbur ser mba yer se sha iti i Yehova yô, kwagh la una na se wuha iyol nena?

• U nenge wer doo u se ver ishima sha iyolwuhan yase shighe u se lu zan mbamkombo shin se lu duen kwaghpasen yôô? Er nan u ôr nahana?

5. Er se wuha iyol shi se er hwe ve a doo yô

Nenge VIDIO i i lu heen ne.

VIDIO: “Eren Nen Akaa Cii sha Ci u Icivir i Aôndo” (10:18)

Aluer akondo a ase taver ishe shin a taver ishe ga kpa, doo u aa lu sha ashe tsembelee shi aa kuma vough sha kwagh u se lu eren la. Ôr 1 Mbakorinte 10:24 man 1 Timoteu 2:9, 10. Maa lam nen sha ityôkyaa i i ne ve i doo u se palegh u huan akondo a a . . .

• lu côu côu shin a lu a injaa ga yô.

• tsule shin a nenge tsula shin a kenden or a isharen i ijimbagh yô.

Er Mbakristu ve dondon Tindi u Mose la nyian ga nahan kpa, vea fatyô u henen akaa ker kpishi sha gbenda u Yehova a henen kwagh la. Ôr Duteronomi 22:5, maa lam nen sha mpin ne:

• Er nan ve i doo u se palegh iyolwuhan shin hwe u ka a na nomso ve lu er ka kasev shin kasev ve lu er nomso laa?

Ôr 1 Mbakorinte 10:32, 33 man 1 Yohane 2:15, 16, maa lam nen sha mbampin mban:

• Er nan ve i doo u se wa ikyo sha er iyolwuhan yase ia na ishima ia vihi mbagenev hen ijiir i se lu la, shin ken tiônnongo ga?

• Ka igbenda i nyi nahan i hembe wuhan iyol shin i eren hwe hen ijiir i u lu laa?

• U nenge wer ka hanma gbenda u i wuhan iyol cii i doo u Orkristu nana dondo yee? Er nan ve u ôr nahana?

KA NYI U HENE?

Ka sea wuhan iyol sha inja shi sea luun sha ashe tsembelee yô, se tese ser se mba ne Yehova kua mbagenev icivir.

Mbampin mba umbur kwagh u i hen yô

• Er nan ve iyol wuhan yase kua hwe u se eren la a gbe Yehova kwagh yumu?

• Ka akaawan a nyi i doo u se dondo shighe u se lu wuhan iyolo?

• Gbenda u se wuhan iyol la alaghga ua na ior vea soo u civir Yehova shin vea soo u civir un ga sha ci u nyi?

SEER HENEN KWAGH

Nenge kwagh u akondo a ou aa na ior vea hen sha a we la.

“Iyolwuhan Yam Ngi Nena?” (Ngeren u sha Intanet)

Hen fa er i hii ve i doo u u hen sha kwagh u gberen ikyav iyol la cii ve u gber yô.

“Bibilo Ôr Ér Nyi sha Kwagh u Gberen Ikyav Iyolo?” (Ngeren u sha Intanet)

Shi nenge akaawan agen a aa wase se se tsua akaa sha inja yô.

“Gbenda u U Wuhu Iyol la Ngu Ve Aôndo a Civir Kpa?” (Iyoukura, Setemba 2016)

Kwase ugen u sar un u eren ishima i Aôndo yô, yange de u gban ahon sha gbenda u ior mbagen ve wuhu iyol la nena?

“Iyolwuhan Yange i Lu Kwagh u Nan Mo Gbeev mbu Nôngon” (Awake!, Disemba 22, 2003)