• Hen Kwagh ken Ieren i Anmgbian u Yesu u Kiriki
    Iyoukura (I Henen)—2022 | Janawari

    • LU OR U HIDEN A IYOL IJIME ER YAKOBU NAHAN

      Yakobu ngu eren tom kapinta, maa Yesu ngu va lamen a na.

      Yesu yange anden hen Yakobu yô, Yakobu hide a iyol ijime, lumun ér ngu Mesiya, nahan maa hingir orhenen u Kristu a uma na cii (Nenge ikyumhiange i sha 5-7)

      5. Yesu yange ande hen Yakobu shighe u i nder un shin kua la nahan, Yakobu er nena?

      5 Lu hanma shighe Yakobu hingir u dondon Yesu sha mimi? Yange mba nderen Yesu shin ku yô, “a ande hen Yakobu, maa shi a ande hen mbaapostoli cii.” (1 Kor. 15:7) Yesu anden hen Yakobu yô, Yakobu maa hingir orhenen na. Shighe u mbaapostoli lu keghen icighan jijingi sha ruumyou u sha, ken Yerusalem la, Yakobu kpa lu vea ve. (Aer. 1:13, 14) Shighe karen yô, Yakobu va hingir u lun ken mbahemenev mba shin itine mba sha ayange a mbaapostoli la. (Aer. 15:6, 13-22; Gal. 2:9) Yange nger washika hen Mbakristu mba i shighe ve mkurem la, ôr ve akaa a Aôndo ôr un yô, cii man inyom i 62 la ye. Washika la ngu a iwasen sha ci wase nyian, sea lu a ishimaverenkeghen i yemen sha, shin va lun uma gbem sha won shin tar kpaa. (Yak. 1:1) Orgen u yange timen sha akaa sha shighe u mbaapostoli, u i yilan un ér Josephus la kaa ér, yange i wua Yakobu sha iniezwa i Anania, wan u Anasi, u lu Pristi u Vesen u Mbayuda la. Yakobu yange civir Yehova sha mimi zan zan kar kuren tom na shin tar.