“Tom Wen Ngu Gbilin Ga”
1 Kwagh la ka u nan ishimataver tsôô! Tom u ú eren Yehova la ka gbilin ú eren ú ga. (1 Kor. 15:58) Kpa gema ke’ vegher ugen yô, hen ase sha iniôngon i ior ka ve zer nôngon taveraa ér mlu u uma ve ma á lu guda, shin ma ve zough a inyaregh ma ve seer la yôô. Alaghga vea za imakeranta i vesen anyom imôngo, shin vea eren tom taveraa ér ma ve hingir mbainyarev. Nahan kpa, alaghga “shighe man aikor” vea na yô, kpám u ve keren la kpa vea kera zua a mi ga, ga yô alaghga tar a hóghur ve vea kera lu a kwagh a ve er i sar ve la nahan ga. Iniôngon ve la cii hingir gbilinkwagh, inja vough er “ka u zendan ahumbe ityô” nahan. (Orpa. 1:14; 9:11) Sha ityôkyaa ne yô, ka hange hange u se lu eren tom u i lu ú tseegh ú lu gbilinkwagh ga ne ngegh, gadia ka ú tseegh ú lu a mtsera u gbem sha won ye!
2 Tom u Ú Gbe Kwagh Jim La: Tom u pasen loho u dedoo u Tartor u Aôndo la ka tom u ú hembe lun a inja shin tar je la. Ka tom u i gbe u á er ú keng yô, aluer ior vea ungwa shin vea ungwa ga kpaa. Se soo ser se fatyô u ôron kwagh er Paulu kpa yange ôr nahan, ser: “Mo m ngu a ishô sha awambe a ior cii. Gadia ityough yuhwam sha u pasen ne awashima u Aôndo ci ca cii ga.”—Aer. 20:26, 27.
3 Zum u ior ve kegh ato ve ongo loho u Tartor la shi ve yar tom sha ú yô, iember ka i ngee kpishi! Yange anmgbian u ngô u gumkwase ugenegh u kwase kpe. Taver gumkwase la u fan hen ape anngô u ngô na la a yem yô—yem lu sha shinii lu ke’ hel? A er msen a sôn Aôndo ér a wase un, a yila sha iti i Yehova, di vough er anngô na u kwase yange tese un ér a eren nahan. Ica gba ga je tsô maa a hii u henen Bibilo shi zan mbamkombo mba Mbakristu. A hingir u nengen uma sha gbenda ugen kposo, shi a pav a ior mba sha godobi mba yange ya ijende a ve la kpaa. Gumkwase la de taav u man shi de u man icimbiv mbi bov, shi de iv mbu iin kpaa. A kaa nahan wener: “Ka mdoo u Yehova a doom ishima la tseegh yange nam m de u eren imba uma i dang la nahan ye. Ka Yehova tseegh una fatyô u nan mo ishimaverenkeghen i zuan a uma u tsôron sha mhôônom nam ma zungwen tsung mara ye.” Kera ngu vihin uma na sha u zendan agbilinakaa ga.
4 Zum u ior ve vende u keghen ato je kpaa, ka ú er kwagh u injaa. Ka ve fa je ér Mbashiada mba Yehova va ve inya. Perapera wou man jighjigh u nan wou man dooshima wou la kpa ka a kera lu kwagh u henen a hen ga. Nahan, tom wou u ken Ter la shi ngu gbilin he? Mayange ga!