ITINEKWAGH I TAMEN | KWAGH U BIBILO I ÔR SHA KWAGH U MBATYOMOV YÔ

Kwagh u Bibilo i Ôr sha Kwagh u Mbatyomov Yô

U soo u seer fan kwagh u mbatyomov, kua ape ve dugh man kwagh u ve eren yôô? Ma ijiir igen i môm i se zua a mlumun sha mbampin mban ngi ga, saa ken Bibilo i i lu Mkaanem ma Aôndo la. (2 Timoteu 3:16) Ka nyi Bibilo i tese se?

Er Aôndo kpa a lu Jijingi nahan, kape mbatyomov kpa ve lu ujijingi, i nengen a ve ga je la. Mba a “inyam man ikuhe” ga. Mbatyomov mba ve eren ishima i Aôndo la mba sha usha shi mba a ian i zan sha ishigh ki ikyônough ki torough ki Aôndo.—Luka 24:39; Mateu 18:10; Yohane 4:24.
Ashighe agen mbatyomov ka ve va ken mlu u iyol i or sha u va eren ityom i Aôndo a tindi ve u va eren shin tar la. Ka vea eren ityom la a been yô, ve hide ve yem sha ken iyol i ken jijingi.—Mbaajiriv 6:11-23; 13:15-20.
Bibilo ôr kwagh u mbatyomov er ka nomso nahan, shi hanma shighe u yange vea gema ken iyol i or cii i lu ken iyol i nomsoor. Nahan cii kpa, mkposo u nomsoor shin kwase ngu hen atô ve ga. Mba vôson kasev mba maren ônov ga. Shi yange i hii gban mbatyomov ve lu uumace, ve lu anikyundanev shin mbayev shin mbaganden shin tar cii ve, ve va yem sha ga. Yehova yange gba ve je ve lu mbatyomov; sha nahan yô, Bibilo yila ve ér “ônov mba Aôndo.”—Yobu 1:6; Pasalmi 148:2, 5.
Bibilo ôr kwagh u “ijô i ior man i mbatyomov mba Shaav,” nahan tese je ér ior mba ken jijingi mban kpa mba a zwa u ve lamen yô. Shin er Aôndo yange a lam a ior sha ikyev i mbatyomov nahan cii kpa, a na se ian i civir ve shin eren msen hen a ve ga.—1 Mbakorinte 13:1; Mpase 22:8, 9.
Mbatyomov mba je kuma dubu pue kwa dubu pue, nahan kwagh ne tese ér alaghga je yô, vea kuma ubiliôn imôngo.—Daniel 7:10; Mpase 5:11.
I yila mbatyomov ér “mbaageev,” mba a tahav hemba uumace ica je, shi mfe ve hemba u uumace. Ikyav tese ér gbenda u mbatyomov ka ve yem mape sha ayem kpishi la gande u orumace nana tôv sha mi nana fa.—Pasalmi 103:20; Daniel 9:20-23.
Shin er mbatyomov ve lu a tahav kua kwaghfan kpishi nahan kpa, akaa agen nga a ve fe ga yô.—Mateu 24:36; 1 Peteru 1:12.
I gba mbatyomov mba a anza kposo kposo shi mba a aeren a Aôndo, shi i na ve ian i tsuan kwagh u ve soo u eren yô. Sha nahan yô, mba a ian i tsuan u eren kwagh u dedoo shin u bo, er uumace nahan. Kwagh er vihi yô, mbatyomov mbagenev yange ve tsua u hemban Aôndo ato.—Yuda 6.

Mbatyomov Mba Aôndo Mba Eren Ityom Ve Nena?

Ortyom u sha u tamen ka Mikael, hemba ngun a agee man tahav a mbatyomov mbagen cii. Bibilo pase wang ér Mikael ka iti i Yesu Kristu igen. —1 Mbatesalonika 4:16; Yuda 9.

Userafim ka mbatyomov mbagenev mba ve lu a ityom i civirigh shi ve lu sha aan a civirigh tsung yô. Ka ve kase ikyônough ki torough ki Aôndo.—Yesaia 6:1-3.

Ucerubi kpa mba sha ian i civirigh tsung shi mba eren ityom i civirigh i i gbe i zough kôôsôô a iengem i Orhembanagee la yô. Ashighe kpishi ka a nenge a ve ken mpase yô, ve lu sha ishigh ki Aôndo ve eren un tom.—Genese 3:24; Esekiel 9:3; 11:22.

Ikpela i mbatyomov mbagenev di ka mba zan Aôndo Uhembansha ityom man mba wasen un tom, mba ve eren ishima na yô.a—Mbaheberu 1:7, 14.

a Wea soo u seer fan kwagh u mbatyomov yô, nenge ityough 10 ki takerada u Bibilo Tese Se Nyi? la, kua ngeren u seer tan iwanger u sha 8 u a lu sha peeji 210 la. Ka Mbashiada mba Yehova ve gber u ye. Ngu sha Intanet hen ijiir i www.jw.org/tiv la kpaa.