Er Nan Ve Ka Se Wuha Iyol Tsembelee Se Za Mbamkombo Aseva?

U nenge er ufoto mba ken antakerada ne ve tese er Mbashiada mba Yehova ka ve wuha iyol tsembelee, shighe u ve lu zan mbamkombo vev mba tiônnongo la kpa? Ka se wuha iyol shi se er hwe nahan sha ci u nyi?

Ka se wuha iyol shi se er hwe tsembelee sha u nan Aôndo wase icivir. Ka mluashe wase tseegh kwagh a gbe Aôndo sha mi ga. (1 Samuel 16:7) Nahan kpa, shighe u se kohol imôngo sha u civir un yô, ka i sar se tsung u nan un icivir kua mba se civir un a ve imôngo la kpaa. Aluer gba u se za sha ishigh ki ma orjir ken atejir yô, se nenge ser mluashe wase tese icivir sha ian i nan lu sha mi la. Kape se kpa mluashe wase shighe u se ze mbamkombo la ngu a tese icivir sha “Orjirigh u tar cii,” Yehova Aôndo, kua ijiir i se civir un her la je la.—Genese 18:25.

Ka se wuha iyol shi se er hwe tsembelee sha u tesen ser se mba dondon akaawan a Bibilo ken uma wase. Bibilo wa Mbakristu kwagh ér ve wuhan iyol “sha kwaghfan man akuma akuma,” sha ci u mba ior mba “cian Aôndo.” (1 Timoteu 2:9, 10) Inja i u wuhan iyol “akuma akuma” yô, ka u palegh ikyondo i se hua ve alaghga mbagenev vea haa ashe sha a vese sha ci u i tese alegh a yolough a ase, shin i tese ér se wa ihyagh, shin ka ikyondo i ia fatyô u kende a isharen i jimbagh ken or la. Shi ieren i wuhan iyol sha “kwaghfan” la ngi i wase se, se hua ikyondo i doonashe, i i lu akuma akuma shin i lu côu côu ga yô. Nahan cii kpa, kwaghwan ne na hanmô wase ian i zeren akondo atô kposo kposo, a a doo se la. Ka sea bugh zwa sea ôr kwagh ga je kpa, mluashe wase u tsembelee man u doon tsung la, a “hingir kwagh u hweegh sha ityesen i . . .  Oryiman wase” shi a mgbegha mbagenev ve hingir u “civir Aôndo.” (Titu 2:10; 1 Peteru 2:12) Sha nahan yô, ka sea wuha iyol tsembelee shighe u se lu zan mbamkombo yô, kwagh ne a wase mbagenev u lun a mnenge u vough sha kwagh u mcivir u Yehova.

Kpa de lumun wer kwagh u ikyondo i zeren a yange u u̱ zan hen Iyou i Tartor ga. Aluer se mba a akondo a taver ishe shin a mondon ga je kpa, se fatyô u wuhan iyol sha inja shi lun sha ashe tsembelee kpaa.

• Gbenda u se wuhan iyol shi se eren hwe shighe u se civir Aôndo la, ka kwagh u hange hange sha ci u nyi?

• Ka akaawan a nyi a wasen se u wuhan iyol shi eren hwe tsembelee?