• U Ngu Nengen a “U I Nengen a Na Ga la” Kpa?
    Iyoukura—2014 | Aipor 15

    • 10. (a) Lu nyi Yehova kaa a Mbaiserael ér ve er ken uwer u Nisan, inyom i 1513 cii man Kristu laa? (b) Mose yange er kwagh u Yehova kaa la sha ci u nyi?

      10 Ken uwer u Nisan inyom i 1513 cii man Kristu la, Yehova kaa a Mose man Aron ér ve za ôr Mbaiserael ve sôngo nomiyôngo shin kpev u lun iyol gbur gbur, ve haa awambe sha ikpandehunda. (Eks. 12:3-7) Nahan Mose er nena? Apostoli Paulu yange va nger kwagh sha kwagh ne kaa ér: “Ka sha jighjigh u nan man a ver Paseka kua awambe a mishin la ye, sha u ortimin ônov mba iundav la a̱ de benden ve ave ga yô.” (Heb. 11:28) Mose yange fa er Yehova a er ie ga yô, nahan a na jighjigh ér Yehova una wua ônov mba iundav mba ken Igipiti er tôndo zwa nahan.

      11. Mose yange ta mbagenev icin sha ci nyi?

      11 A̱ shi nan kpa ônov mba Mose lu ken Midian, ica a “ortimin ônov mba iundav” la.a (Eks. 18:1-6) Nahan kpa, a ungwa imo i Aôndo, a ôr icombor igen ken Iserael, i kwaghbo a fatyô u tseren ônov mbaiundav mba ken icombor shon la. Uuma u ônov vev lu sha zongo, man Mose gema soo mbawan ndor a na tsung. Bibilo kaa ér fese je Mose “yila mbatamen mba Iserael cii, a kaa a ve er: . . . sôngo nen Paseka.”—Eks. 12:21.

      12. Yehova kaa ér se̱ pase ior loho u hange hange u nyi?

      12 Mbatyomov mba wasen ior mba Yehova u pasen loho u injaa la kaan ér: “Cia nen Aôndo, na nen Un icivir gadia shighe Na u ôron ijir kuma ve, civir nen Un u A er Sha man tar man zegemnger man amboramnger kpaa la.” (Mpa. 14:7) Ka shighe u pasen loho shon je ne. Gba kpee u se ta mbawanndor a vese icin ser ve due ken Zegebabilon kera, sha er vea “nyôr nongo sha asorabo a na ga” yô. (Mpa. 18:4) Mba ve lu “iyôngo igen” la kohol Mbakristu mba i shigh ve mkurem la mba zamber a mba ve gbe ica a Aôndo la ér ve “hime” a na.—Yoh. 10:16; 2 Kor. 5:20.

      Kwaseshiade ugen ngu wan iyol u duen kwaghpasen, er a te ashe ken ishima na a nenge er mbatyomov ve ker ahumbe a mtim yô

      Aluer u na uityendezwa mba Yehova mbara jighjigh yô, a sar ú u pasen loho u dedoo (Nenge ikyumhiange i sha 13 la)

      13. Ka nyi ia na ve a hemba saren we u pasen loho u dedoo?

      13 Se na jighjigh ser ‘shighe u ôron ijir’ la kuma. Shi se na jighjigh ser tom u pasen kwagh shi geman ior hingir mbahenen la ka tom u eren torough torough, er Yehova a kaa nahan. Ken mpase u sha mnenge u apostoli Yohane la, a “nenge mbatyomov mba Shaav unyiin tile sha azongo a tar a anyiin la, ve kôr ahumbe a anyiin a sha tar la.” (Mpa. 7:1) Jighjigh u nan wou wasen u u nengen ken ishima you er mbatyomov mbara ve we iyol u pasen ahumbe a mtim a zegecan una va a mi sha tar ne la kpa? Aluer u ngu nengen a mbatyomov mbara ken ishima yô, u fatyô u pasen loho u dedoo la vangertiôr.