Kwagh u U Er Ve A Za Hemen u Saan We Iyol Shighe u U Tagher a Atsan Yô

1-2. Mateu 5:11 tese ér doo u se nengen atsan a se tagher a mi la nena?

YESU yange tôndo zwa a mbadondon un ér, a saan ve iyol sha mimi. Shi yange kaa ér, mba un doo ve ishima la cii vea tagher a atsan. (Mat. 10:22, 23; Luka 6:20-23) Saan se iyol er se lu mbadondon Kristu yô. Kpa shighe u mba hen tsombor wase ve lu nôngon ér vea yange se u civir Yehova shin gomoti a lu tôvon se a ican, gayô mba se eren tom shin se ze makeranta imôngo ve lu tuur se ér se er kwaghbo yô, ka i lu se nena? Sha mimi yô, aluer se hen sha akaa ne yô, aa fatyô u nan se ishimanyian.

² Ior kpishi nenge ér a fatyô u saan or iyol shighe u i lu tôvon nan a ican ga. Nahan kpa, Mkaanem ma Aôndo kaa a vese jighilii ér, i saan se iyol. Ikyav i tesen yô, Yakobu nger ér shighe u se tagher a mbamzeyol yô, se de nengen ser kwagh hemba se ga, kpa i saan se iyol. (Yak. 1:2, 12) Shi Yesu kaa ér, zum u i lu tôvon se a ican yô, i saan se iyol. (Ôr Mateu 5:11.) Nahan kpa, se za hemen u lun saan saan shighe u se tagher a atsan nena? Aluer se time sha washika u Yakobu nger Mbakristu mba tsuaa la yô, se hen akaa ker kpishi. De se hii ase nen sha u timen sha mbamtaver mba Mbakristu mbara yange ve tagher a mi ve gba vea wa ishima la.

KA ATSAN A NYI MBAKRISTU MBA TSUAA MBARA TAGHER A MI?

3. Lu nyi i er shighe u Yakobu hingir orhenen u Yesu ica i lu a gba ga laa?

³ Yakobu u lu anngô u Yesu la yange hingir orhenen ica i lu a gba ga maa, i hii u tôvon Mbakristu a ican ken Yerusalem. (Aer. 1:14; 5:17, 18) Shi zum u i wua orhenen Sefanu la, Mbakristu mbagenev kpishi “sambe yem ajiir wue wue hen haregh u Yudia man u Samaria.” Shighe kar yô, mbagenev yem je nyôr Shiperu kua Antioki kpaa. (Aer. 7:58–8:1; 11:19) Mbahenen mbara yange ve tagher a mbamzeyol kpishi. Nahan cii kpa, yange ve za hemen u pasen loho u dedoo hanma ijiir i yange vea za cii, nahan ior kpishi hingir Mbakristu shi atôônanongo kpaa seer ngeen. (1 Pet. 1:1) Kpa shighe kar yô, ve tagher a mbamtaver mbagen kpishi.

4. Ka atsan a nyi Mbakristu mba tsuaa mbara tagher a mini?

⁴ Mbakristu mba tsuaa mbara yange ve tagher a atsan atô kposo kposo. Ikyav i tesen yô, er ken inyom i 50 la nahan, Tor u Mbaroma u i yilan un ér Kalodio la na wada ér, Mbayuda cii ve due ken Roma kera. Nahan gba u Mbayuda mba ve hingir Mbakristu la vea undu uyaav vev, vea mough a yem ajiir agen. (Aer. 18:1-3) Apostoli Paulu yange nger kwagh er ken inyom i 61 la nahan kaa ér, ashighe agen yange i hee mba un civir Aôndo a ve imôngo yô ken igbar shin i wuhe ve ken purusu, gayô i ya ve ishar. (Heb. 10:32-34) Shi Mbakristu mbagenev yange ve kungu ican shi ve gba angev di er ior mbagenev nahan.—Rom. 15:26; Fil. 2:25-27.

5. Ka mbampin mba nyi se lu nan mlumun sha mi?

⁵ Yakobu yange nger washika na ne cii ve inyom i 62 la ye. Cii man nger washika ne yô, yange fa atsan a anmgbianev nav mba nomso man mba kasev lu yan la vindi vindi. Yehova yange mgbegha Yakobu nger Mbakristu mbara washika sha u wan ve kwagh u una wase ve, vea za hemen u lun saan saan shighe u ve tagher a atsan yô. De se time sha washika u Yakobu ne, nahan se na mlumun sha mbampin mban: Ka nyi ia na a saan Orkristu iyol shighe u nan lu yan icana? Ka nyi ia na ve a kera saan Orkristu iyol ga? Kwaghfan man jighjigh kua ishimataver vea wase se, se za hemen u lun saan saan shighe u se tagher a atsan nena?

KWAGH U KA A NA VE I SAAN ORKRISTU IYOL YÔ

6. Sha kwagh u Luka 6:22, 23 a ôr yô, Orkristu nana lu yan ican kpa a saan nan iyol sha ci u nyi?

⁶ Alaghga ior kpishi vea hen ér, aluer mba gbang gbang shi mba a inyaregh kpishi shi tsombor ve ngu ken mkpeyol yô, a saan ve iyol. Kpa msaanyol u Yakobu yange nger kwagh sha mi la ka vegher u ityamegh ki jijingi u Aôndo. A har sha mlu u or shin akaa a a lu zan hemen ken uma u nan la ga. (Gal. 5:22) Orkristu ka nan zua a iember shin i saan nan iyol sha mimi shighe u nan fe ér nan ngu eren kwagh u doon Yehova shi dondon ikyav i Yesu yô. (Ôr Luka 6:22, 23; Kol. 1:10, 11) Iember yase la ngi er usu u imenger u ka i wa gelase u lu ken atô la nahan. Hanma shighe yô, ngi i yeghen Orkristu ken ishima, ngi pirin ga. Ka sea gba angev shin sea kera lu a kwagh ave kpishi ga kpa, iember yase ngi been ga. Shi shighe u ior ve lu lahan se shin mba hen tsombor wase gayô mbagenev ve lu hendan a vese je kpa, iember yase ka i lu her. Hanma kwa u ior ve nôngo ér vea na i de kera saan se iyol ga cii yô, ka i hemba saan se iyol cii. Atsan a ka se ya sha ci u jighjigh wase la ka a tese wang ér se mba mbadondon Kristu mba mimi. (Mat. 10:22; 24:9; Yoh. 15:20) Ka nahan ve Yakobu nger wener: “Anmgbianev av, shighe u ne tagher a atsan atô kposo kposo yô, i̱ lu kwagh u saan ne iyol tsung” ye.—Yak. 1:2.

7-8. Zum u se tagher a atsan yô, kwagh la ka a wase jighjigh wase nena?

⁷ Yakobu shi nger ityôkyaa igen i i ne ve Mbakristu ka ve kegh iyol u yan atsan a vihin tsung yô. A kaa wener: “Jighjigh u nan wen u i kar un nahan la una na ne lu a ishimawan.” (Yak. 1:3) Atsan a se tagher a mi la nga inja er ka usu u ken ateiwa, u ka i wa iyôugh ker ki nyian ve i dugh i cagh la nahan. Shighe u iyôugh kira ka ki a va sule yô, ki hemba taver cii. Se kpa ka sea wa ishima a atsan yô, jighjigh wase a seer taver. Ka nahan ve Yakobu nger wener: “Ishimawan la i̱ er tom u i̱ vindi vindi, sha er ne lu vough sha hanma gbenda cii, a acôghor iyol shio” ye. (Yak. 1:4) Ka sea nenge er atsan a se ye la nga a na jighjigh wase a seer taver yô, kwagh la a wase se u wan ishima a mi saan saan.

⁸ Shi Yakobu yange nger akaa agen a aa na ve a kera saan se iyol ga yô ken washika na la. Akaa shon ka nyi, man se hemba a nena?

KWAGH U SE ER VE A ZA HEMEN U SAAN SE IYOL YÔ

9. Kwaghfan una wase se nena?

⁹ Mtaver: Zum u se fe kwagh u se er ga yô. Shighe u se tagher a mbamzeyol yô, ka se soo ser se suur sha Yehova a wase se, se tsua akaa aa a lu sha ishima na yô, shi se soo ser se taver anmgbianev asev mba nomso man mba kasev asema shi se ayol a ase kpaa se za hemen u civir Yehova sha mimi. (Yer. 10:23) Ka i gba u se lu a kwaghfan ve se fa kwagh u se er man kwagh u se ôr a mbara mba ve hendan a vese la ye. Zum u se fe kwagh u se er ga yô alaghga iyol ia kpe se, nahan fese je kwagh la una na a kera saan se iyol ga.

10. Ka nyi Yakobu 1:5 a kaa ér se er sha er se zua a kwaghfana?

¹⁰ Kwagh u u er yô: Sôn Yehova a na u kwaghfan. Gba hange hange u se hii eren msen sônon Yehova ser a na se kwaghfan sha er se tsua akaa sha inja yô. Aluer se er nahan yô, se fatyô u wan ishima aa atsan saan saan. (Ôr Yakobu 1:5.) Shighe u i lu se inja er Yehova ungwa msen wase ave ave ga yô, doo u se er nena? Yakobu kaa ér, se “de gbe uwer u sônon” Aôndo ga. Ka sea sôn Yehova kwaghfan kwa kimbir kimbir kpa, vihin ishima a vese ga. Mayange una nyoon ishima a vese ga. Ka sea sôn Ter wase u sha la kwaghfan u una wase se u wan ishima a atsan yô, ka a ‘na se mgbeghaa’ je. (Ps. 25:12, 13) A fa mbamzeyol asev shi ka una nenge sea yaan ican yô, ishima i vihi un ker, shi ka a kegh a kegh iyol u wasen se. Sha kpôô yô, kwagh ne ka a na i saan se iyol! Nahan kpa, Yehova ka a na se kwaghfan nena?

11. Ka nyi igen kpa i gbe hange hange u se er sha er se zua a kwaghfana?

¹¹ Yehova ne se kwaghfan ken Mkaanem nam. (Anz. 2:6) Saa se henen Mkaanem ma Aôndo kua ityakeda yase i pasen Bibilo la ve, se zua a kwaghfan la ye. Kpa gba u se er kwagh a hemba u henen kwagh tseegh tsô la. Gba u se eren tom a kwaghfan u Aôndo la ken uma wase ayange ayange sha u eren hanma kwagh u a kaa ér se er cii. Yakobu nger ér: “Hingir nen mba eren sha mkaanem mara, de lu nen mbaungwan tseegh” ga. (Yak. 1:22) Ka sea ungwa kwaghwan u Aôndo shi sea eren sha mi yô, se lu a bemshima shi se eren kwagh sha mkav shi se iv a mhôônom ma zungwen kpaa. (Yak. 3:17) Aeren ne ka a wase se u wan ishima a nyityô ican i se tagher a mi cii saan saan.

12. Er nan i gbe hange hange u se fa Bibilo tsembelee?

¹² Mkaanem ma Aôndo ma er ka ijingi nahan. Ka ma tese se ajiir a i gbe u se sôr sha er mlu wase una hemba doon la, shi ma tese se er se sôr la kpaa. (Yak. 1:23-25) Ikyav i tesen yô, alaghga zum u se hen Mkaanem ma Aôndo yô se nenge ser, gba u se pande ishimanyoon. Sha iwasen i Yehova yô, se fatyô u henen u eren kwagh a ior kundu kundu zum u mbagenev ve ne ishima i vihi se ker shin mbamzeyol ve ne ishima i lu vihin se yô. Ka sea eren kwagh kundu kundu yô, se hemba eren kwagh sha inja shighe u se tagher a mbamzeyol yô. Shi ka se hemba henen kwagh tsembelee, nahan se tsua kwagh u se er la sha inja. (Yak. 3:13) Sha mimi yô doo u se fa Bibilo tsema tsema!

13. Er nan ve i doo u se hen kwagh ken ikyav i ior mba i er kwagh ve ken Bibilo laa?

¹³ Ashighe agen ka se er kwagh shami ga cii ve se hen u palegh kwagh shon ye. Kpa ka gbenda u dedoo u henen kwagh la ga. Gbenda u hemban doon u zuan a kwaghfan yô, ka u henen kwagh ken akaa a yange mbagenev er ve kwagh za a ve doo la, kua ken akaa a mbagenev yange ve er shami ga la. Ka nahan ve Yakobu a taver se ishima ér se hen kwagh ken ikyav i ior mba i er kwagh ve ken Bibilo la ye, er Aberaham man Rahabi man Yobu man Eliya nahan. (Yak. 2:21-26; 5:10, 11, 17, 18) Ior mba civir Yehova sha mimi mban yange ve wa ishima a atsan a yange ma na ma kera saan ve iyol ga yô. Ishimawan ve la tese ér, sha iwasen i Yehova yô, se kpa se fatyô u eren nahan.

14-15. Er nan ve i gbe hange hange u se wa ikyo a akperan a ka se lu a mi ken ishima laa?

¹⁴ Mtaver: Akperan a tan. Ashighe agen alaghga a taver se u kaven ma kwagh u se ôr ken Bibilo yô. Gayô alaghga Yehova ungwa mbamsen asev er se ver ishima la ga. Kwagh la una na se hingir u tan akperan. Aluer se wa ikyo ga yô, akperan la aa na jighjigh wase a kera taver ga, nahan se vihi ijende i se ye vea Yehova la. (Yak. 1:7, 8) U hemban vihin je yô, aa na se kera lu a ishimaverenkeghen sha kwagh u ken hemen ga.

¹⁵ Apostoli Paulu yange tôô ishimaveren yase i sha kwagh u ken hemen la kar sha imandetso. (Heb. 6:19) Imandetso ka i wase tso a tile sha zarmnger jighjigh shighe u uraahumbe u lu eren yô, shi a yange un u kuan za tan ken avande. Nahan kpa imandetso ka i wase tso shighe u ishiligh ku i te sha mi la ku tende ga tseegh. Shi er ishiligh ka ku a ta nduran ve ku kera taver ga nahan, ka kwagh u akperan kpa ka a er a jighjigh wase vough je la, ka a na un a kera taver ga. Zum u kwagh a lu nahan je, ka sea tagher a mbamzeyol yô, se kera na jighjigh ser Yehova una kure uityendezwa nav ga. Man ka sea kera luun a jighjigh u nan ga yô, se kera lu a ishimaverenkeghen kpaa ga. Man er Yakobu a ôr nahan, or u tan akperan “nan ngu er agôndo a zegemnger, a ahumbe a lu daase a mi, a lu kpianger nahan.” (Yak. 1:6) Or u kwagh u nan a lu nahan cii a taver u i saan nan iyol!

16. Shighe u se lu a akperan yô, ka nyi i doo u se ere?

¹⁶ Kwagh u u er yô: Bee a akperan ken ishima you kera, gema taver jighjigh wou. Er kwagh fese. Sha ayange a profeti Eliya la, ior mba Yehova hingir ta ta ta. Nahan Eliya kaa a ve ér: “Shi nan je, man né de u lun asema ahara? Aluer TER A lu Aôndo yô, dondo nen Un; a lu Baal yô, dondo nen un. Kpa ior bugh zwa a na ga.” (1 Utor 18:21) Nyian ne, se kpa gba u se er kwagh fese. Doo u se tôv se fa er Yehova a lu Aôndo u mimi tswen, shi Bibilo i lu Mkaanem nam man er Mbashiada mba Yehova ve lu ior nav yô. (1 Tes. 5:21) Aluer se er akaa ne cii yô, se kera lu a akperan ken ishima ga, shi jighjigh wase una taver. Se fatyô u pinen iwasen hen mbatamen sha er vea wase se u been a akperan ken ishima yase kera yô. Gba hange hange u se er kwagh fese sha er se za hemen u civir Yehova saan saan yô.

17. Aluer iyol kpe se yô, ka nyi ia er se?

¹⁷ Mtaver: Shighe u iyol i kpe se yô. Mkaanem ma Aôndo kaa ér: “Aluer ú gba uwer sha iyange i ican yô, agee ou vese ga.” (Anz. 24:10) Ishember i ken zwa Heberu i i gem ér, “gba uwer” la a fatyô u lun, u “iyol kpen or.” Aluer iyol kpe u yô, fese je a kera saan we iyol ga.

18. Inja i u wan ishima la ér nyi?

¹⁸ Kwagh u u er yô: Suur sha Yehova a na u ishimataver sha er u wa ishima yô. Kwagh u una wase se u wan ishima a atsan yô, ka ishimataver. (Yak. 5:11) Ishember i “ishimataver” i Yakobu ôr kwagh ter la ngi ôron kwagh u or u nan til ijiir i môm, nan ze mape ga yô. Alaghga se hen sha kwagh u orshoja u nan taver ishima nan til ijiir i môm, zum u mbaihyomov ve ve num sha a nan je kpa nan yevese ga yô.

19. Ka nyi se fatyô u henen ken kwagh u apostoli Paulu laa?

¹⁹ Apostoli Paulu ver se ikyav i dedoo sha kwagh u ishimataver man ishimawan. Ashighe agen yange iyol i kpe un. Kpa yange a wa ishima, sha ci u suur sha Yehova nahan Yehova na un tahav mbu kwagh gba un a mi la. (2 Kor. 12:8-10; Fil. 4:13) Aluer se soo u zuan a imba utaha man ishimataver la yô, saa se hide a iyol ijime, se suur sha Yehova ser a wase se.—Yak. 4:10.

KPOROM HEN AÔNDO NAHAN A ZA HEMEN U SAAN WE IYOL

20-21. U fatyô u lun a vangertiôr wer nyi?

²⁰ Se na jighjigh ser, atsan a se lu yan ne ka Yehova a lu tsahan se ga. Yakobu kaa a vese ér: “Shighe u ican i tser ma or yô, nana̱ de kaan ér: ‘Aôndo ngu karen mo’ ga. Gadia mba karen Aôndo sha ma kwagh u ifer ga, shi un iyol na karen ma or ga.” (Yak. 1:13) Aluer se na jighjigh ser kwagh ne ka mimi yô, se hemba lun kôôsôô a Ter wase u sha u se doo un ishima la.—Yak. 4:8.

²¹ Yehova “kahan kposo shin gem er ka mure nahan ga.” (Yak. 1:17) Yange wase Mbakristu mba tsuaa mbara shighe u ve lu yan atsan la man kape una wase hanma wase nyian kpaa je la. Er msen a ishima i môm sôn Yehova a wase u, a na u kwaghfan man ishimataver shi a taver jighjigh wou. Una ungwa mbamsen ou keng a bunde ga. U er nahan yô, u fatyô u lun a vangertiôr wer, una wase u u wan ishima a atsan saan saan!