Dooshima man Ieren i Mimi ken Tiônnongo u Kristu (Vegher U Sha 2 U Avegher 4)

1. Ka akaa ahar a nyi se fatyô u lun a vangertiôr sha mi?

YEHOVA AÔNDO soo mbacivir un kpen kpen. Mayange vea de u doon un ishima ga. Shi a soo kwagh u mimi. (Ps. 33:5) Sha nahan yô, se fatyô u lun a vangertiôr sha akaa ahar ne: (1) Ka a nzughul a ior mba Yehova shin a er kwagh a ve sha mimi ga yô, i vihi un kpishi. (2) A tôndo zwa ér a za hemen u nzughul a ior nav gbem sha won ga, shi una tsaha mba ve nzughul a ior nav la. Ngeren u hiihii ken ngeren mban lab yange tese se er Tindi u Yehova na sha ikyev i Mose la har sha dooshima yô. Tindi la kaa ér i eren kwagh a hanmaor sha mimi, kua mba ve lu a orjime ga kpaa. (Dut. 10:18) Tindi la tese er Yehova a we ior nav ikyo kpishi yô.

2. Ka mbampin mba nyi i gbe u se na mlumun sha mi?

² Tindi u Mose la yange kure ken inyom i 33, shighe u i ver tiônnongo u Kristu la. Nahan er kwagh u tindi la bee yô, tindi ugen kera ngu u a har sha dooshima kua ieren i mimi u Mbakristu vea zua a mtsera ker gaa? Ka nahan ga cii! Mbakristu mba a tindi u he. Se hii timen fan kwagh u tindi shon ken ngeren ne. Se been yô, se na mlumun sha mbampin mban: Er nan ve se fatyô u kaan ser tindi ne har sha dooshima? Se fatyô u kaan ser tindi ne tese ér i eren kwagh a ior sha mimi sha ci u nyi? Tindi ne tese ér mba Yehova a ne ve tahav la ve eren a mbagen nena?

“TINDI U KRISTU” LA KA NYI?

3. “Tindi u Kristu” u i ter ken Mbagalatia 6:2 la, wa nyi man nyi kere?

³ Ôr Mbagalatia 6:2. Mbakristu mba sha ikyev i “tindi u Kristu.” Yesu yange nger atindi shin inya a mbadondon un vea kuran ga, kpa gema tese ve akaa a vea eren yô, shi wa ve atindi shi kaa ér ve dondon akaawan a na ken uma ve. “Tindi u Kristu” la wa hanma kwagh u Yesu yange tese cii. De ase se time sha akaa a a wase se u seer kaven tindi ne tsembelee yô.

4-5. Ka sha igbenda i nyi nahan Yesu tesene, man ka hanma shighe yange tese?

⁴ Ka sha igbenda i nyi nahan Yesu tesene? Hiihii yô, yange a tese ior sha kwaghôron na. Akaaôron a na yange a lu a tahav sha ci u a pase mimi u sha kwagh u Aôndo, shi yange a pase ityôkyaa i se lu uma jim jim yô, shi a tese kpaa ér ka Tartor u Aôndo tseegh ua va bee a ican i uumace ve lu yan la ye. (Luka 24:19) Yesu shi yange a tese ior sha ikyav na. Gbenda u yange eren kwagh ken uma na la lu ikyav i tesen mbadondon un er i doo u vea eren kwagh ken uma ve yô.—Yoh. 13:15.

⁵ Ka hanma shighe Yesu yange tese ioro? Yange tese ior shighe u lu eren tom u pasen kwagh shin tar la. (Mat. 4:23) Shi yange tese mbadondon un shighe u i nder un shin ku kera la. Ikyav i tesen yô, yange ande hen mbahenen mba alaghga ve hemba iorov 500 nahan yô, maa wa ve tindi, kaa ér ve “za gema” ior ve “hingir mbahenen.” (Mat. 28:19, 20; 1 Kor. 15:6) Er a lu ityough ki nongo na yô, yange hide yem sha kpa za hemen u tesen mbahenen nav kwagh u vea eren yô. Ikyav i tesen yô, er ken inyom i 96 la nahan, Kristu yange kaa a apostoli Yohane ér a taver Mbakristu mba i shigh ve mkurem yô ishima shi a wa ve kwagh.—Kol. 1:18; Mpa. 1:1.

6-7. (a) Ka han i nger atesen a Yesu? (b) Ka se dondo tindi u Kristu la nena?

⁶ I nger atesen a Yesu la hana? I nger akaa kpishi a Yesu yange ôr shi er shighe u lu shin tar la ken ityakerada i Ivangeli i inyiin la. Ityakerada igen i ken Ruamabera u Mbakristu u ken Zwa Grika la di wase se u kaven gbenda u Yesu henen sha akaa la, sha ci u ka ior mba lun a “mhen u Kristu,” icighan jijingi yange mgbegha ve u ngeren ityakerada ne ye.—1 Kor. 2:16.

⁷ Akaa a se hen ken kwagh ne yô: Atesen a Yesu kôr sha hanma vegher u uma wase. Nahan gba u se dondon tindi u Kristu la ken hanma kwagh u se lu eren hen ya shin ken makeranta shin hen ijiirtom gayô ken tiônnongo cii. Ka se hen tindi ne sha u ôron Ruamabera u Mbakristu u ken Zwa Grika la shi gbidyen kwar sha mi. Ka se dondo tindi ne sha u eren akaa a i tese ken ityakerada i Bibilo ne shi dondon atindi kua akaawan a a lu ker la. Aluer se dondo tindi u Kristu la yô, se mba ungwan imo i Yehova, Aôndo wase u dooshima la, sha ci u hanma kwagh u Yesu tesen cii due hen a Na.—Yoh. 8:28.

TINDI U A HAR SHA DOOSHIMA YÔ

8. Ka nyi i lu imaagh ki tindi u Kristu laa?

⁸ Ka a maa iyou sha inja shi a wa i imaagh ki taver yô, ior mba ve lu ker la mba cie ga. Kape tindi u injaa u i we un imaagh tsembelee kpa mba ve dondon un la ve cie ga shi ka a wase ve u fan ér mba ken mkor je la. I wa tindi u Kristu la imaagh ki hemban doon cii, ka dooshima je la. Hii nan se fatyô u ôron nahana?

9-10. Ka akav a nyi nahan a tese ér ka dooshima yange a mgbegha Yesu u eren hanma kwagha, man se fatyô u dondon ikyav na la nena?

⁹ Hiihii yô, ka dooshima yange a mgbegha Yesu u eren hanma kwagh ye. Kunya shin mhôônom ma zungwen kpa ka gbenda u tesen dooshima. Yange kunya kôr Yesu a ior, nahan tese ve shi bee ve angev shi na ve kwaghyan shi nder mbakpenev kpaa. (Mat. 14:14; 15:32-38; Mar. 6:34; Luka 7:11-15) Er akaa ne yange a tôô un shighe shi a na a vôr nahan kpa, Yesu a ver mbamgbe mba ior mbagen hiihii. U hemban cii yô, yange tese dooshima u vesen sha u nan uma na sha ci u mbagen.—Yoh. 15:13.

¹⁰ Akaa a se hen ken kwagh ne yô: Se fatyô u dondon ikyav i Yesu la sha u veren mgbe u mbagen hiihii cii ve u wase ye. Shi se fatyô u dondon ikyav na la sha u seer tesen ser mhôônom kôr se a ior mba ve lu hen haregh u se pasen kwagh la. Mhôônom ka ma a kôr se a ior man kwagh la una mgbegha se u pasen ve loho u dedoo shi tesen ve yô, i tese ér se mba dondon tindi u Kristu.

11-12. (a) Ka nyi i tese ér Yehova we se ikyo tsung-nu? (b) Se fatyô u dondon ikyav i dooshima u Yehova la nena?

¹¹ Sha uhar yô, Yesu yange tese dooshima u Ter na la. Shighe u Yesu lu eren tom na u pasen kwagh la, yange a tese er Yehova a we mbacivir un ikyo tsung yô. Ka akaa agen a Yesu yange tese je ne. A tese ér hanmô wase yô, nan gba Ter wase u Sha la kwagh shi nan doo un ishima kpaa (Mat. 10:31) Yehova kegh a kegh iyol u ngohol hanma iyôngo i i saa, kpa i gem ishima shi i hide ken tiônnongo la cii. (Luka 15:7, 10) Yehova tese ér se doo un ishima sha u nan Wan na ér a va paa se.—Yoh. 3:16.

¹² Akaa a se hen ken kwagh ne yô: Se fatyô u dondon ikyav i dooshima u Yehova la nena? (Ef. 5:1, 2) Se er kwagh ne sha u nengen anmgbianev asev mba nomso man mba kasev ser ve gba kwagh, shi gba u vea doo se ishima, shi se ngohol “iyôngo i i saa” kpa i hidi hen Yehova la sar sar. (Ps. 119:176) Ka se tese ser anmgbianev asev mba nomso man mba kasev doo se ishima sha u nan ayol a ase kua shighe wase u wasen ve, hemban je yô, zum u i gbe u a wase ve yô. (1 Yoh. 3:17) Ka sea eren kwagh a mbagen sha dooshima yô, se mba kuran tindi u Kristu la.

13-14. (a) Er i nger ken Yohane 13:34, 35 nahan, Yesu yange wa mbadondon un tindi ér ve eren nyi, man kwagh ne ka tindi u he sha ci u nyi? (b) Ka se kura tindi u he ne nena?

¹³ Sha utar yô, Yesu yange wa mbadondon un tindi ér ve tesen dooshima u tangen iyol ga la. (Ôr Yohane 13:34, 35.) Tindi u Yesu ne lu u he sha ci u tindi la kaa ér i tesen dooshima sha gbenda u tindi u Aôndo na Mbaiserael la ôr ga yô. Gba u mbadondon mbagen vea doo u ishima vough er Yesu kpa u doo un ishima nahan. Kwagh la tese ér gba u ú lu a dooshima u tangen iyol ga la.c Gba u anmgbianev asev mba nomso man mba kasev vea doo se ishima a hemba er se soo iyol yase la. Gba u vea doo se ishima je se kegh a kegh iyol u kpen sha ci ve er Yesu kpa kpe sha ci wase nahan.

¹⁴ Akaa a se hen ken kwagh ne yô: Ka se kura tindi u he ne nena? U ngeen kwagh ga yô, ka sha u den ser kwagh a kar se sha ci u anmgbianev asev mba nomso man mba kasev. Ve doo se ishima je se fatyô u kpen sha ci ve. Kpa ka cii la ga, shi ka se kegh iyol u den akaa a kiriki kpaa ser a kar se sha ci ve. U tesen ikyav yô, aluer hanma shighe ka se nôngo kpoghuloo se za tôô anmgbian u beenyol se za mkombo a nan, shin se de ma kwagh u doon se a kar se sha er i doo ma or wase, shin se tôô memyol sha tom se za wase ior mba aahe a bende a ve yô, se mba kuran tindi u Kristu la. Heela tseegh ga se lu wasen u geman tiônnongo hingir ijiir i hanmaor nana nenge ér nan ngu ken mkor yô.

TINDI U A TESE ÉR I EREN KWAGH SHA MIMI YÔ

15-17. (a) Akaa a Yesu eren la tese ieren i mimi nena? (b) Se fatyô u kaven Yesu nena?

¹⁵ “Ieren i mimi” i i ter kwagh u i ken Bibilo la, inja na yô ka u eren kwagh u Aôndo a kaa ér ka u vough la, man shi eren un a hanmaor cii, sangen a sange ga. Er nan ve se fatyô u kaan ser tindi u Kristu la tese ér i eren kwagh sha mimi?

¹⁶ Hiihii yô, nenge er akaa a Yesu eren la tese ieren i mimi yô. Sha ayange na la, mbahemenev mba kwaghaôndo u Mbayuda kôr hanmaor u nan lu Oryuda ga cii ihyom, shi ve nenge ér ve hemba Mbayuda mba ve ze imakeranta i kwaghaôndo u Mbayuda ga la, shi ve naan kasev icivir kpaa ga. Kpa Yesu yô, nyaghen ior ga, shi sangen ior sha dooshima ga. Yange lumun ior mba ve lu Mbayuda ga kpa ve na un jighjigh la ér ve dondo un. (Mat. 8:5-10, 13) Yesu sangen a sange ior mba una pase ve kwagh ga; yange a pase mbaatsanev kua mbainyarev cii kwagh. (Mat. 11:5; Luka 19:2, 9) Mayange eren a kasev nyaghen nyaghen shin nzughul a ve ga. Kpa eren a kasev sha icivir man sha mhôôn, kua kasev mba ior mbagen nengen ér ve gba kwagh ga la je kpaa.—Luka 7:37-39, 44-50.

¹⁷ Akaa a se hen ken kwagh ne yô: Se fatyô u dondon ikyav i Yesu la sha u eren kwagh a hanmaor cii kwaghmôm shi pasen hanmaor u nan kegh ato cii loho u dedoo, aluer nan ngu orinyar shin nan gba ican shin nan ngu ken nyityô kwaghaôndo je kpaa. Nomso mba ve lu Mbakristu la kpa ka ve dondo ikyav na la sha u eren a kasev sha icivir. Aluer se mba eren ambaakaa ne yô, se mba kuran tindi u Kristu la.

18-19. Ka nyi Yesu yange tese sha kwagh u ieren i mimi, man ka nyi se hen ken ityesen na laa?

¹⁸ Sha uhar yô, nenge ase kwagh u Yesu yange tese sha kwagh u ieren i mimi yô. Yange tese mbadondon un akaawan a a wase ve u eren kwagh a mbagen sha mimi yô. U tesen ikyav yô, nenge ase kwagh u Tindi u Vesen la. (Mat. 7:12) Se cii se soo ser i eren kwagh a vese sha mimi. Nahan yô, gba u se eren kwagh a mbagen sha mimi. Aluer se er nahan yô, kwagh la una mgbegha ve u eren kwagh a vese sha mimi. Kpa aluer i er kwagh a vese sha mimi ga shin i nzughul a vese di ye? Yesu shi yange tese mbadondon un wener ve lu a vangertiôr ér Yehova una “kure ijir sha ci u . . . mba ve ve a mliam hen Na tugh man tetan” la. (Luka 18:6, 7) Mkaanem mara ka ityendezwa jighilii. Inja na yô, Aôndo wase fa mbamtaver mba se lu tagher a mi ken ayange a masejime ne yô, man una kure ijir sha ci wase sha shighe u i kom un yô.—2 Tes. 1:6.

¹⁹ Akaa a se hen ken kwagh ne yô: Aluer se dondo akaawan a Yesu yange tese la yô, se eren kwagh a ior mbagen sha mimi. Man aluer i er kwagh a vese sha mimi ga ken tar u Satan ne yô, se fatyô u zuan a msurshima sha u fan ser Yehova una va kure ijir sha ci wase.

GBA U MBA VE LU A TAHAV LA VEA EREN A MBAGEN NENA?

20-21. (a) Gba u mba ve lu a tahav la vea eren a mbagen nena? (b) Nom nana fatyô u tesen dooshima u tangen iyol ga la nena, man gba u ter nana eren a ônov mba nan nena?

²⁰ Sha tindi u Kristu ne yô, gba u mba ve lu a tahav la vea eren a ior mbagen nena? Er i we imaagh ki tindi ne sha dooshima yô, gba u mba ve lu a tahav la vea eren kwagh a mba i we ve sha ikyev la sha icivir man sha dooshima. Gba u vea umbur ér gbenda u Kristu ka gbenda u dooshima.

²¹ Hen tsombor. Gba u kwase nana doo nom u nan ishima “er Kristu kpaa, nongo Na u doo Un ishima” nahan. (Ef. 5:25, 28, 29) Gba u nom nana kav dooshima u tangen iyol ga u Kristu la sha u veren mbamgbe mba kwase u nan hiihii cii ve mba nan ye. Nomso mbagen ka i taver ve u tesen dooshima, alaghga a lu sha ci u yange ve vese hen ijiir i kwagh a gbe ior u eren kwagh a mbagen sha mimi man sha dooshima ga yô. Alaghga a taver ve u den anza a bo ne, kpa gba u vea er akaa ne sha er vea dondo tindi u Kristu la yô. Nom ka nana tesen dooshima u tangen iyol ga yô, kwase u nan a na nan icivir. Ter u ônov nav ve doo un ishima yô, mayange una nzughul a ve sha kwaghôron shin ieren na ga. (Ef. 4:31) Kpa ngu a tese ve dooshima sha igbenda i ia na ônov nav vea nenge ér mba ken mkor yô. Imba ter ne ka i doo ônov mba nan ishima shi ve na nan jighjigh kpaa.

22. Er i pase ken 1 Peteru 5:1-3 nahan, iyôngo la ka i ana, man gba u a eren a i nena?

²² Ken tiônnongo. Gba u mbatamen vea umbur ér “iyôngo” la ka iyôngo ve ga. (Yoh. 10:16; ôr 1 Peteru 5:1-3.) Asember a i ter ken ivur la ér “ikyumuile i Aôndo” man “sha ci u Aôndo” kua “kwagh u i we ne sha ikyev” shin dyako u Aôndo la umbur mbatamen je ér iyôngo la ka i Yehova. A soo ér i eren a iyôngo na sha dooshima man sha ue. (1 Tes. 2:7, 8) Mbatamen mba ve eren tom u orkuranilev sha dooshima la ka ve doo Yehova ishima. Shi anmgbianev mba nomso man mba kasev ka ve soo mbatamen mban shi ve naan ve icivir kpaa.

23-24. (a) Aluer or u ken tiônnongo er isholibo i vesen yô, ka nyi i gbe u mbatamen vea ere? (b) Kanyi i gbe u mbatamen vea umbur shighe u ve lu nengen sha imbakwagh laa?

²³ Ka nyi i gbe u mbatamen vea er shighe u or u ken tiônnongo nan er isholibo i vesene? Tom ve kaha a tom u mbaajiriv man mbatamen eren ken Tindi u Aôndo na Mbaiserael la. Sha shighe u Tindi la yô, yange i gba u mbatamen vea nenge sha akaa a a gbe a zough a mcivir u Yehova kua akaa a a gbe a zough a mcivir u Yehova jighilii ga kpaa. Kpa ken tindi u Kristu ne yô, gba u mbatamen vea nenge sha akaabo a a gbe a zough a mcivir u Yehova jighilii la tseegh. Ve fa je ér Aôndo na gomoti tahav mbu nengen sha afer shin akaabo agen a ior vea er la. Kwagh ne kua u yan or zwa ijirigh shin wuhen nan ken purusu la cii.—Rom. 13:1-4.

²⁴ Nahan or ka nana er isholibo i vesen i i bende a mcivir u Yehova nahan, mbatamen ve er nena? Ka ve er tom a Ruamabera u tôvon sha ikyaa la shi tsuan kwagh u vea er yô. Ka ve umbur je ér ka dooshima a lu imaagh ki tindi u Kristu la ye. Nahan dooshima la ka a mgbegha ve u tôvon sha ambaakaa ne nahan: Ka nyi i gbe u a er sha er a wase or u ken tiônnongo u kwaghbo ne a bende a nan jighilii laa? Sha kwagh u or u nan er kwaghbo la di, mbatamen shi ka ve gbidye kwar nahan: Or shon nan gema ishima? Se fatyô u wasen nan u hiden yan ikyar a Yehova?

25. Ka nyi ngeren u dondon ne una lam sha mi?

²⁵ Doo se kpishi er se lu ken tindi u Kristu ne yô! Se cii ka sea nôngo kpoghuloo sea kuran tindi ne yô, se na tiônnongo a lu ijiir i hanmaor nan nenge ér i soo nan shi nan gba kwagh shi nan ngu ken mkor yô. Nahan kpa, se mba ken tar u “udangmbaiorov” ve lu hemban “vihin a vihi kwagh” yô. (2 Tim. 3:13) Gba u se haa iyol inya ga. Tiônnongo u Kristu una fatyô u dondon ikyav i ijirôron i mimi i Yehova la shighe u i lu nengen sha ifer i yaven a wanye u kiriki la nena? Ngeren u a dondo ne una na ikyar sha mpin la.