ITYOUGH 49
U Er Nan Ve a Saan Tsombor Wou Iyolo?—Vegher 1
Ior mba ve sember eren ivese ka ve soo ér i saan ve iyol gbem sha won er lu sha iyange i ivesegh la nahan. Shi kwagh a fatyô u lun nahan kpaa. Mbakristu mba ve er ivese ica i gbe shi ve nôngo kpoghuloo ve dondon kwaghwan u Bibilo yô, fa er kwagh a fatyô u lun nahan yô.
1. Bibilo wa noov kwagh ér nyi?
Yehova tsua nom ér nana hemen tsombor. (Ôr Mbaefese 5:23.) Yehova soo ér nana tsuan akaa a aa wase tsombor u nan yô. Bibilo kaa a noov ér: “Kasev enev ve za hemen u doon ne ishima.” (Mbaefese 5:25) Inja i kwagh la ér nyi? Nom u kwase u nan a doo nan ishima yô, ka nan eren a kwase u nan kundu kundu hen ya kua shighe u ve lu vea ior kpaa. Ka nan nengen sha kwase u nan sha er kwagh a er nan ga shi a saan nan iyol yô, shi nan nôngo kpoghuloo nan kuren mbamgbe mba kwase u nan. (1 Timoteu 5:8) Kpa u hemban cii yô, ka nan wase nan u yan ijende a Yehova kôôsôô. (Mateu 4:4) Ikyav i tesen yô, ka nan eren msen shi nan ôron Bibilo vea kwase u nan. Nom ka nana nengen sha kwase u nan tsembelee yô, nan za hemen u lun ijende i Yehova.—Ôr 1 Peteru 3:7.
2. Bibilo wa kasev kwagh ér nyi?
Mkaanem ma Aôndo kaa ér kwase “nana naan nom u nan icivir tsung.” (Mbaefese 5:33) Kwase nana er kwagh ne nena? Nana fatyô u henen sha aeren a nom u nan a dedoo la, kua er ka nan nôngo kwagh kpoghuloo u nengen sha a nan kua mbayev vev la. Shi ka nan wasen nom u nan u eren akaa a ve tsough la, shi nan lamen a nan kundu kundu shi nan ôron akaa a dedoo sha iyol i nan, aluer nom shon civir Yehova ga je kpaa.
3. Nom man kwase vea er nan ve vea hemba lun kôôsôô ken ivese ve?
Bibilo ôr kwagh u nom man kwase ér: “Ve uhar cii vea hingir iyol i môm.” (Mateu 19:5) Inja na yô, gba u vea nôngo kpoghuloo vea palegh nyityôkwagh i ia na vea kera soo ayol a ve kpishi ga la cii. Vea er kwagh ne sha u lun imôngo shi lamen hanma shighe, pasen ayol a ve mbamnenge vev kua er i lu ve ken ishima la sha mimi man sha dooshima. Dugh Yehova sha yô, mba den ér kwagh môm shin orgen a hemba gban ve kwagh a nom shin kwase ve ga. Gba u vea wa ikyo sha er vea hingir u za lun kôôsôô a orgen kposo ga yô.
HEN KWAGH I ZA SHIMI
Nenge akaawan a Bibilo a aa wase u, u hemba lun kôôsôô a nomou shin kwase wou yô.
4. Noov, kasev enev ve doo ne ishima shi nengen nen sha a ve doo doo
Bibilo kaa ér, “noov kpa kasev vev ve̱ doo ve ishima er iyol ve i doo ve ishima nahan.” (Mbaefese 5:28, 29) Inja i kwagh la ér nyi? Nenge VIDIO i i lu heen ne, maa lam nen sha mpin u a dondo ne.
Ka sha igbenda i nyi nahan nom nana tese ér, kwase u nan doo nan ishima shi nan nengen sha kwase shon tsembelee?
Ôr Mbakolose 3:12, maa lam nen sha mpin ne:
Nom nana er akaa a Bibilo i ôr heen ne ken ivese i nan nena?
5. Kasev, noov enev ve doo ne ishima shi naan nen ve icivir
Bibilo wa kwase kwagh ér, nana naan nom u nan icivir, aluer nom la civir Yehova shin civir ga kpaa. Ôr 1 Peteru 3:1, 2, maa lam nen sha mbampin mban:
Aluer nomou civir Yehova ga yô, ka keng u soo wer nana va civir Yehova. Nahan u nenge wer hemba doon u u wase nomou nena? Ka u pasen un kwagh hanma shighe shin ka u lun kwase u injaa, eren kwagh a na kundu kundu shi nan un iciviri? U ôr nahan sha ci u nyi?
Noov man kasev vea fatyô u tsuan akaa a injaa imôngo. Nahan kpa, alaghga ashighe agen kwase nana lumun a kwagh u nom u nan a tsough u eren la ga. Shighe u kwagh a lu nahan yô, nana fatyô u pasen nom u nan mnenge u nan sha icivir, shi nana umbur kpaa ér ka nom Yehova a ver nan ér nana tsuan akaa a a hemba doon sha ci u tsombor u nan ye. Gba u nana nôngo sha afatyô u nan cii nana sue kwagh u nom u nan a tsough u eren la. Kwase ka nana eren akaa ne yô, nan wase tsombor u nan cii u lu saan saan. Ôr 1 Peteru 3:3-5, maa lam nen sha mpin ne:
Kwase ka nana naan nom u nan icivir nahan, i lu Yehova nena?
6. U fatyô u sôron mbamzeyol mba ken ivese you
Ivese i môm i lun a mbamzeyol shio kpa ngi ga. Sha nahan yô, gba u nom man kwase vea nôngo vea hemba mbamtaver mba ken ivese. Nenge VIDIO i i lu heen ne, maa lam nen sha mbampin mba ve dondo ne.
Ka nyi i tese ér nom man kwase u ken vidio la yange ve kera lu kôôsôô a ayol a ve ga?
Ka nyi yange ve er sha er vea hide a lu kôôsôô ken ivese ve?
Ôr 1 Mbakorinte 10:24 man Mbakolose 3:13. Ne ôron avur a Bibilo ne ne been yô, lam nen sha mpin ne:
Aluer u ngu dondon kwaghwan u Bibilo ne yô, una wase ivese you nena?
Bibilo kaa ér se naan mbagenev icivir. Ka se na or icivir sha u eren kwagh a nan kundu kundu shi wan nan ikyo. Ôr Mbaroma 12:10, maa lam nen sha mbampin mban:
Doo u noov shin kasev vea kegh ér nom shin kwase ve nana hii nan ve iciviri? Er nan ve u ôr nahana?
IOR MBAGENEV KA VE KAA ÉR: “Mo vea kwase wam shin nomom, se kera mba kôôsôô er yange se lu la ga.”
U pase ve er Bibilo ia wase ve nena?
KA NYI U HENE?
Aluer nom man kwase ve soo ayol a ve shi mba nan ayol a ve icivir shi dondon akaawan a Bibilo yô, a saan ve iyol.
Mbampin mba umbur kwagh u i hen yô
Nom nana er nan ve msaanyol una lu ken ivese i nana?
Kwase nana er nan ve msaanyol una lu ken ivese i nana?
Aluer u er kwase shin nom yô, ka kwaghwan u Bibilo u han nahan u nenge wer una wase ivese youwe?
SEER HENEN KWAGH
Hen fa mbamhen mba i due a mi, mba vea na a saan tsombor wou iyol yô.
Nenge vidio i atsam a ase i i tese averen a u lu dondon kwaghwan u Aôndo ken ivese you ve, u zua a mi yô.
Tôv fa er kwase nana na ian i nom a lu a mi i hemen hen tsombor la icivir yô
“Kasev, Doo U Ne Dondon Hemen sha Ci u Nyi?” (Iyoukura, Mei 15, 2010)
Orgen vea kwase na yange ve hemba mbamzeyol mba vesen mba ve tagher a mi yô, kua ivaa i yange ve pav la nena?