Римлилер
15 Биз, иманы гүйчлүлер, диңе өз аладамызы этмән, гайтам, иманы говшаклара кынчылыклара дөз гелмәге көмек этмели. 2 Гелиң, хер биримиз якынымыза пейдалы болҗак затлары эделиң ве ягшы ишлеримиз билен олары абатлалың. 3 Хатда Месих хем өз аладасыны этмеди, гайтам: «Мен сени масгаралаянларың кемситмелерине дучар болдум» дийип язылгыдыр. 4 Себәби өңки язылан затларың әхлиси бизе гөркезме үчин язылыпдыр. Олар бизе умыт берйәр, чүнки Язгылардакы затлар чыдамлы болмага көмек эдйәр ве теселли берйәр. 5 Гой, чыдамлылык ве теселли берйән Худай сизе Месих Исаныңкы ялы пикирде болмага ярдам этсин. 6 Шонда сиз Худайы, Халыпамыз Иса Месихиң Атасыны бирагыздан агзыбир шөхратландырып билерсиңиз.
7 Месихиң сизи кабул эдиши ялы, сиз-де бир-бириңизи кабул эдиң. Шонда сиз Худайы шөхратландырарсыңыз. 8 Мен сизе хакыкаты айдярын. Месих сүннетленен адамларың гуллукчысы болды. Шейлеликде, Худайың догручылдыгы ве оларың ата-бабаларына берен вадаларының хакыкатдыгы тассыкланылды. 9 Шейдип, башга халклар Худайы рехимдарлыгы үчин шөхратландырып билйәрлер. Себәби: «Ине, шонуң үчин мен сени халкларың арасында шөхратландырарын ве сениң адыңа нагма айдарын» дийип язылгыдыр. 10 Шейле-де Худай: «Эй халклар, онуң халкы билен шатланың» диййәр. 11 Язгыларың башга бир еринде болса: «Әхли халклар, Ехованы* шөхратландырың. Гой, әхли халклар оны шөхратландырсын» дийилйәр. 12 Ишая пыгамбер башга бир аятда шейле диййәр: «Ессәниң машгаласындан бири гелер, ол көп халклара ёлбашчылык эдер. Халклар онуң адына умыт багларлар». 13 Гой, умыт берйән Худай сизе чәксиз шатлык ве парахатлык берсин. Шонда сиз мукаддес рухуң берйән гүйҗи билен умытдан долы* боларсыңыз.
14 Доганларым, мен сизиң хем ягшылык* этмәге тайындыгыңыза, билимден бүтинлей долудыгыңыза ве бир-бириңизе өвүт-үндев* бермеги башаряндыгыңыза ынанярын. 15 Эмма мен Худайың берен мерхемети аркалы сизе башга затлары хем ятлатмак үчин кәбир пикирлери хас ачык айдыпдым. 16 Мен Худайың хош хабарыны өзге миллетлере ыглан этмек үчин Месих Исаның гуллукчысы эдип беллендим. Худай өзге миллетлери кабул эдер ялы, мен шу мукаддес иши ерине етирйәрин. Олар мукаддес рух аркалы мукаддес эдилен ярамлы гурбан киминдир.
17 Шейлеликде, мен Месих Исаның шәгирди хөкмүнде Худайың ишини берҗай эдйәндигиме бегенйәрин. 18 Мен өз эден ишлерим хакда дәл-де, Месихиң мен аркалы эден ишлери хакда айдарын. Мен муны айдян сөзлерим ве ишлерим аркалы башга халкларың гулак асмаклары үчин эдйәрин. 19 Мен Худайың гүйҗи аркалы гөркезилйән аламатлар ве гудратлар билен Иерусалимден тә Иллирия ченли ёл бойы Месих барадакы хош хабары биркемсиз вагыз этдим. 20 Аслында, мен башга бириниң башлан задының үстүнде гурмаз ялы, Месихиң ады барада вагыз эдилен ерлерде хош хабары ыглан этмезлиги йүрегиме дүвдүм. 21 Себәби шейле язылгыдыр: «Ол хакда хабары болмадыклар билерлер, эшитмедиклер дүшүнерлер».
22 Ине, шонуң үчин хем мен сизиң яныңыза энчеме сапар бармакчыдым, эмма барып билмедим. 23 Инди мениң бу ерлерде вагыз этмедик ерим галмады. Мен сизиң яныңыза көп* йыл бәри бармак ислейәрин. 24 Шол себәпли Испания баранымда, сизи гөрерин ве сизиң яныңызда боланымдан соң, мени бираз уградарсыңыз дийип умыт эдйәрин. 25 Хәзир болса мукаддеслере хызмат этмек үчин Иерусалиме гитмекчи болярын. 26 Себәби Македонияда ве Ахаяда яшаян доганлар Иерусалимдәки мукаддеслериң арасындакы гарыплара совгатлар ибермек ислейәрлер. 27 Догрудан-да, олар мукаддеслериң бергидарлары болсалар-да, совгатлары хөвес билен бермек ислейәрлер. Эгер Иерусалимдәки мукаддеслер рухы затларыны башга халклар билен пайлашян болсалар, онда башга халклар хем мадды затларыны олар билен пайлашмага борчлудырлар. 28 Мен совгатлары* элтип, оларың аландыкларына гөз етиренимден соң, Испания баряркам, сизе совларын. 29 Галыберсе-де, яныңыза Месихден алан бол берекетлерим билен барҗакдыгымы билйәрин.
30 Доганлар, мен сизи Халыпамыз Иса Месих аркалы ве мукаддес рухуң берйән сөйгүси билен хөвеслендирйәрин: мениң үчин ве мениң билен биле Худая дога эдиң. 31 Мен Яхудада Месихе иман этмейәнлериң элинден халас болуп билер ялы ве Иерусалимде этҗек хызматым мукаддеслере ярар ялы, дога эдиң. 32 Шонда Худайың ислегине гөрә яныңыза шатлык билен барып, сиз билен биле рухланарын. 33 Гой, парахатлык берйән Худай сизиң хеммәңиз билен болсун. Омын.