Ресулларың ишлери
21 Биз олар билен зордан айрылышдык, соңра деңзе чыкып, угурдаш елиң көмеги билен Коса барып етдик. Эртеси гүн Родоса, ондан соң Патара бардык. 2 Финикия гидйән гәмини тапанымызда, оңа мүнүп, ёлумызы довам этдик. 3 Кипр адасына голайланымызда, онуң гәми дуралгасы тарапындан гечдик-де, Сирия тарап гитдик ве Сурда дүшледик. Ол ерде гәминиң йүкүни дүшүрдилер. 4 Биз шол ерде шәгиртлери гөзләп тапдык-да, оларда еди гүн галдык. Мукаддес рух Павлуса Иерусалимде нәме болҗакдыгыны аян эдендиги себәпли, доганлар оңа ол ере гитмезлиги гайта-гайта айдярдылар. 5 Гайтмалы вагтымыз геленде, ёла дүшдүк. Оларың әхлиси, шол санда аяллар ве чагалар шәхерден чыкянчак, бизи угратдылар. Кенара баранымызда, биз дыза чөкүп дога этдик. 6 Бири-биримиз билен хошлашып, гәмә мүндүк, олар болса өйлерине гайтдылар.
7 Биз Сурдан гайдып, гәмиде сыяхатымызы тамамладык-да, Птолемее гелдик. Ол ерде доганлар билен гөршүп, янларында бир гүн галдык. 8 Эртеси гүн ол ерден гайтдык-да, Кайсария гелип, хош хабарың вагызчысы болан Филипусың өйүне бардык (ол Иерусалимде ресуллар тарапындан сайланан еди доганың бириди). Биз онуң өйүнде галдык. 9 Филипусың дурмуша чыкмадык ве пыгамберлик эдйән дөрт гызы барды. 10 Биз онуң өйүнде энчеме гүн боланымыздан соң, Яхудадан Агабус атлы пыгамбер гелди. 11 Ол янымыза гелип, Павлусың гушагыны алды-да, өз аякларыны ве эллерини даңып: «Мукаддес рух шейле диййәр: „Шу гушагың эесини-де Иерусалимде ехудылар шейдип даңарлар ве башга халкларың элине табшырарлар“» дийди. 12 Муны эшидип, әхлимиз Павлуса Иерусалиме гитмезлиги ялбарып башладык. 13 Шонда Павлус: «Сиз нәме үчин аглап, мени гынандырярсыңыз?* Мен диңе бир даңылмага дәл, эйсем, Иерусалимде Халыпамыз Исаның адының хатырасына өлмәге-де тайын» дийди. 14 Биз оны ырып билмәнимизден соң: «Гой, Ехованың* ислейши ялы болсун» дийип, гаршы чыкмагымызы бес этдик*.
15 Соңра биз Иерусалиме гитмек үчин тайярландык-да, ёла дүшдүк. 16 Кайсариядан гелен кәбир шәгиртлер хем бизиң билен гайтдылар. Олар бизи ирки шәгиртлериң бири болан кипрли Минасоның өйүне алып бардылар. Ол бизи өйүне мыхман алды. 17 Иерусалиме геленимизде, доганлар бизи шатлык билен гаршы алдылар. 18 Эртеси гүн Павлус бизиң билен Якубың янына гитди ве ол ере әхли яшулулар йыгнанды. 19 Павлус олар билен саламлашып, Худайың ол аркалы вагызда башга халкларың арасында эден ишлерини җикме-җик гүррүң берди.
20 Павлусың гүррүңини диңләп, олар Худайы шөхратландырып башладылар. Соңра оңа шейле дийдилер: «Гөрйәңми, доган, ехудыларың арасында мүңлерчелери Исаның шәгирди болдулар, олар Кануны ыхласлы берҗай эдйәрлер. 21 Эмма олар сениң башга халкларың арасында яшаян ехудылара Мусаның канунына гаршы гелйән затлары өвредйәрсиң дийип эшитдилер. Сен хамала олара чагаларыны сүннетлемели дәл я-да дәп-дессурлара эермели дәл диенмишиң. 22 Онда биз нәме этсек болар? Себәби олар сениң гелениңи хөкман эшидерлер. 23 Говусы, сен бизиң айданларымызы эт: арамызда Худайың өңүнде ант ичен дөрт адам бар. 24 Ол адамлары яныңа ал-да, Кануна гөрә олар билен билеликде өзүңи тәмизле. Олар сачыны алдырып билер ялы, чыкдаҗыларыны хем өз үстүңе ал. Шонда хеммелер сен барада айдылян гүррүңлериң нәдогрудыгына, гайтам, рухуң гөркезмесине эерип, Кануны берҗай эдйәндигиңе гөз етирерлер. 25 Башга халкларың арасында Исаның шәгирди болан адамлара болса, биз гелен карарымыз барада хат язып, олара бутлара гурбан эдилен затлардан, гандан, боглан* хайванларың этинден ве ахлаксызлыкдан* гача дурмагы табшырыпдык».
26 Эртеси гүн Павлус шол адамлары алып, Кануна гөрә олар билен билеликде өзүни тәмизледи. Соңра ол тәмизленме гүнлериниң хачан тамамланҗакдыгыны хабар этмек үчин ыбадатхана гирди. Себәби шол гүнлер тамамлананда, руханы оларың херси үчин гурбанлык гетирмелиди.
27 Еди гүн, ягны тәмизленме гүнлери тамамланып барярка, Азиядан гелен ехудылар Павлусың ыбадатхана барандыгыны гөрүп, бүтин мәрекәни оңа гаршы өҗүкдирдилер. Олар оны тутдулар-да, 28 батлы сес билен гыгырып: «Эй ысрайыл халкы, бизе көмек эдиң! Бу адам әхли ерде хеммелере бизиң халкымыза, Канунымыза ве шу ере гаршы гелйән затлары өвредйәр. Ол хатда ыбадатхана греклери гетирип, мукаддес ери хапалаяр» дийдилер. 29 Муны диймеклериниң себәби, олар шәхерде Павлусың янында эфесли Трофими гөрдүлер ве оны ыбадатхана-да гетирендир өйтдүлер. 30 Шонда бүтин шәхер галагоплыга дүшди. Адамлар ыбадатхана ылгашып гелдилер-де, Павлусы тутуп, оны дашарык сүйрәп чыкардылар, гапылары хем дессине япдылар. 31 Олар Павлусы өлдүрҗек болуп дуркалар, гошун серкердесине тутуш Иерусалимиң ховсала дүшендигини хабар бердилер. 32 Ол деррев янына эсгерлери билен йүзбашылары алды-да, олара тарап ылгады. Адамлар гошун серкердесини ве эсгерлери гөренлеринде, Павлусы урмакларыны бес этдилер.
33 Гошун серкердеси голай гелди-де, Павлусы туссаг этди ве оны ики зынҗыр билен багламагы буюрды. Соңра онуң кимдигини ве нәме эдендигини сорап башлады. 34 Кәбир адамлар бир зат дийсе, бейлекилер башга зат дийип гыгырярды. Гошун серкердеси гох-галмагал себәпли хич зада дүшүнип билмеди. Шонуң үчин ол Павлусы эсгерлериң болян җайына алып гитмеги буюрды. 35 Эмма Павлус басганчага етенде, мәрекәниң газапланандыгы себәпли, эсгерлер онуң голундан тутуп алып гитдилер. 36 Мәреке болса ызларына дүшүп: «Оны өлүме табшыр!» дийип гыгырярды.
37 Олар эсгерлериң җайына етип баряркалар, Павлус гошун серкердесине: «Саңа бир зат айтсам болармы?» дийип сорады. Шонда ол: «Сен асыл грекче билйәрмиң? 38 Диймек, сен өңрәк гозгалаң турзуп, 4 мүң саны гылычлы* адамы чөле чыкаран мүсүрли дәл-дә?» дийди. 39 Павлус оңа: «Аслында, мен ехуды. Өзүмем Киликияның ады белли Тарсус шәхеринден. Маңа халка сөз айтмага ругсат бермегиңи хайыш эдйәрин» дийди. 40 Гошун серкердеси Павлуса ругсат беренде, ол басганчакда дурды-да, адамлара эли билен ышарат этди. Мәреке сесини гоянда, Павлус халка еврей дилинде йүзленип, шейле дийди: