Филипилилер
2 Сиз Месих билен бирликде болсаңыз, башгалары рухландырып, олара сөйги билен теселли берйән болсаңыз, мәхир билен аладасыны эдип, дуйгудашлык билдирйән болсаңыз, 2 онда бир гарайышда болуп, бир-бириңизи сөйүп, долы агзыбирлиги саклап ве бир пикирде болуп, мениң шатлыгымы артдырың. 3 Хич зады дава-җенҗел я-да улумсылык билен этмәң, гайтам, песгөвүнли* болуң ве башгалары өзүңизден ёкары сайың. 4 Диңе өз бәхбидиңизи гөзлемән, башгаларыңкыны хем агтарың.
5 Месих Исаныңкы ялы пикирде ве гарайышда болуң. 6 Ол Худайың кешбинде болса-да, ыгтыяры эле алмак, ягны өзүни Худай билен деңемек хакда пикир хем этмейәрди. 7 Гайтам, ол хемме затдан гечди, өзүни гул эдип, ынсан болды*. 8 Галыберсе-де, ол ынсан болуп геленде, өзүни кичелдип, өлүминиң ахырына ченли, хава, җебир пүрсүнде* өлйәнчә гулак асды. 9 Шол себәпли Худай оны җуда бейгелдип, әхли атлардан-да иң улы ады берди. 10 Ол муны гөкдәкилериң, ердәкилериң, ериң астындакыларың хер бириниң Исаның адының өңүнде дыз эпмеги үчин этди 11 ве хер кес Халыпамыз Иса Месихи Ата Худайың шөхраты үчин ачык кабул этсин дийип этди.
12 Шейлеликде, эй эзиз доганларым, яныңыздакам Худая элмыдама гулак асышыңыз ялы, ёк вагтым хем горкы ве титреме билен халас болмак үчин тагалла эдиң. 13 Себәби Худай өз ислегине гөрә сизи хөвеслендирип, херекет этмегиңиз үчин хем ислег, хем гүйч берйәр. 14 Хич зады игенҗеңлик ве дава-җенҗел билен этмәң. 15 Шонда сиз айыпсыз, хилесиз ве шу залым хем-де догрулык этмейән неслиң арасында Худайың чирксиз чагалары боларсыңыз. Сиз оларың арасында яшап, шу дүнйәде ышык кимин нур сачярсыңыз 16 ве яшайыш сөзүне берк япышярсыңыз. Мен хем бидерек ылгамандыгымы ве бош ере зәхмет чекмәндигими билип, Месихиң гүнүнде шатланарын. 17 Эмма мен ичги гурбаны кимин гурбанлык сыпасына дөкүлип, өзүми мукаддес гуллуга, ягны сизиң иман этмегиңизе гетирен гуллуга бермели болсам-да, мен муңа бегенерин, сизиң әхлиңиз үчин шатланарын. 18 Шонуң үчин сиз хем мениң билен шатланып, бегенмелисиңиз.
19 Эгер Халыпамыз Иса ислесе, мен тизден яныңыза Тимотеосы иберерин. Ол сизден хабар гетирсе, мен рухланып билерин. 20 Себәби сиз хакда онуң ялы йүрекден алада этҗек башга адам ёкдур. 21 Башгалар Иса Месихиң дәл-де, өз бәхбидини гөзлейәрлер. 22 Эмма сиз онуң хош хабары яйратмакда мениң янымда болуп, какасының янындакы чага кимин гуллук эдендигини билйәнсиңиз. 23 Хава, ишлеримиң нәхили болҗакдыгы белли боланда, оны яныңыза иберерин. 24 Халыпамыз ислесе, өзүм хем тизден яныңыза барарын.
25 Эмма хәзир яныңыза доганымыз ве Месихиң эсгери болан Эпафродити ибермеги ерликли хасаплаярын. Ол сизиң векилиңиз болуп, мениң зерурлыкларымың аладасыны этмек үчин иберилен гуллукчыдыр. 26 Ол сизи җуда гөреси гелйәр. Онуң сыркавландыгыны эшидендигиңизи билип, гаты биынҗалык болды. 27 Догрудан-да, ол сыркавланда, өлүмиң бәри янындан гайтды. Эмма Худай рехим этди, йөне диңе оңа дәл, эйсем, өңкүден-де бетер хасрат чекмезлигим үчин маңа-да рехим этди. 28 Шол себәпли сиз оны гөрүп, ене-де бегенип билер ялы, мен хем ченденаша биынҗалык болмаз ялы, оны яныңыза хаял этмән иберйәрин. 29 Оны Халыпамызың шәгирди хөкмүнде шатлык билен мынасып тәрде кабул эдиң; шейле доганлары гыммат сайың. 30 Ол Месихиң* иши үчин өлүмиң бәри янындан гайтды, сизиң ёклугыңызы билдирмеди, маңа хызмат этмек үчин җаныны ховп астына салды.