Еврейлер
6 Шонуң үчин, гелиң, диңе бир Месих хакдакы эсасы таглыматлары өвренмек билен чәкленмән, эйсем, рухы тайдан етишен адам болмага ымтылалың. Шейле-де эсасы таглыматлары, ягны өли ишлерден йүз өвүрмек, Худая иман этмек, 2 сува чүмдүрилмек, бириниң үстүне эл гоймак, өлүлериң дирелмеги ве эбеди хөкүм барада гайта-гайта өвренмеги бес эделиң. 3 Хава, Худай ёл берсе, рухы тайдан етишен адам болмага ымтыларыс.
4 Себәби кәбирлери өң ягтылыгы кабул эдип, Худайың сылагыны* ве мукаддес рухы алдылар. 5 Худайың ягшы сөзүни дадып, гелҗекки дүнйәниң* берекетлерине* эе болдулар. 6 Муңа гарамаздан, олар имандан йүз өвүрдилер, тоба эдип, ызына доланмаклык олара мүмкин хем дәл. Себәби олар Худайың Оглуны, гөрәймәге, ене-де пүрсе чүйләп, оны адамларың өңүнде масгара эдйәрлер. 7 Топрак хем көпленч ягшың сувуны иченде, Худайың берекеди билен дайхан үчин пейдалы хасыл берйәндир. 8 Эгер топракдан тикенек ве гарамандалак* өсүп чыкса, дайхан ондан йүз өврүп нәлетлейәндир. Иң соңунда болса экин мейданыны отлаяндыр.
9 Эмма биз бу затлар хакда айтсак-да, эзиз доганлар, сизиң ягдайыңызың имандан йүз өврен адамлара гаранда хас говудыгына ынанярыс. Шу ягдай сизи гутулыша алып баряндыр. 10 Себәби Худай сизиң эдйән ишлериңизи ве мукаддеслере хызмат эдип хем-де этмеги довам этмек билен, онуң адына гөркезйән сөйгиңизи унудар ялы, адалатсыз дәлдир. 11 Эмма биз сизиң мундан бейләк-де шейле ыхласлы болмагыңызы ислейәрис, шонда сиз умыдыңызы соңуна ченли саклап билерсиңиз. 12 Шонуң үчин ялта болмаң-да, иман ве сабырлылык билен вадалары мирас алан адамлардан гөрелде алың.
13 Худай Ыбрайыма вада беренде, башга хич бир бейик атдан ант ичмән, өз адындан ант ичипди. 14 Шонда ол: «Мен сени хөкман паталарын ве неслиңи көпелдерин» дийипди. 15 Ыбрайым сабырлы болуп гарашансоң, вада эдилен зады алды. 16 Адамлар хем бир зады сөз беренде, өзүнден бейик бириниң адындан ант ичйәндир. Бу ислендик җеделиң өңүни алып, берлен сөзүң хакыкатдыгына кепил гечйәндир. 17 Худай хем берен вадасына кепил гечмек* үчин ант ичди. Шейдип, ол мирас алҗак адамлара ниетиниң үйтгемеҗекдигини хас-да айдың гөркезди. 18 Шейлеликде, Худай бу үйтгемейән ики зат аркалы өзүниң ялан сөзләп билмейәндигини гөркезди. Булар Худайың гачыбаталгасында гизленен* адамлары, ягны бизи беркидип, өңүмизде гойлан умыда берк япышмага көмек эдйәр. 19 Бу умыт бизиң яшайшымыз үчин гәмини саклаян лабыр киминдир. Ол бизи тутының аңырсына гирмәге ынамлы эдйәр ве беркидйәр. 20 Оңа бизиң үчин илкинҗи болуп гирен Исадыр. Ол Мелкиседек ялы эбеди баш руханы боландыр.