Филипилилер
1 Месих Исаның гуллары Павлус билен Тимотеос Месихиң Филипидәки шәгиртлерине, ягны әхли мукаддеслере, йыгнагың гөзегчилерине ве хызматчыларына хат язяр.
2 Ата Худайымыздан ве Халыпамыз Иса Месихден сизе мерхемет хем парахатлык болсун.
3 Мен хер гезек сизи ятланымда, элмыдама Худая миннетдарлык айдярын. 4 Сизиң хер бириңиз үчин ялбарып, шатлык билен дога эдйәрин. 5 Себәби сиз илкинҗи гүнден тә шу вагта ченли хош хабарың яйрамагына гошандыңызы гошярсыңыз. 6 Мен Худайың сизиң араңызда башлан ягшы ишини Месих Исаның гүнүне ченли тамамламага сизе көмек этҗекдигине долы ынанярын. 7 Сиз хакда шейле пикирде болмагым ерликлидир, себәби сиз мениң йүрегимдесиңиз. Түрмедекәм, хош хабары горап, канун тайдан вагыз этмек хукугыны газанмакда мени голдапдыңыз. Шейлеликде, сиз хем мениң билен биле Худайың мерхеметини алдыңыз.
8 Сизи җуда гөресим гелйәндигине Худайым шаятдыр, себәби мен сизи Месих Исаның сөйши ялы сөййәрин. 9 Ине, шол себәпли мен сөйгиңизиң артмагы, догры билимде өсмегиңиз ве Худайың ислегине долы дүшүнмегиңиз үчин элмыдама дога эдйәрин. 10 Шейле-де Месихиң гүнүне ченли айыпсыз галып, хич кимиң бүдремегине себәп болмаз ялы, иң ваҗып затлара дүшүнмегиңизи дилейәрин. 11 Иса Месих аркалы хас көп догры ишлери этмегиңиз* үчин хем дога эдйәрин. Шонда Худай шөхратланар, оңа алкыш айдылар.
12 Доганлар, сизиң шуны билмегиңизи ислейәрин: мениң билен болуп гечен затлар хош хабарың яйрамагына ярдам этди. 13 Месихе иман эдйәндигим үчин зынҗыра багланып, түрмә дүшендигим көшк горагчыларына* ве хеммелере мәлим болды. 14 Мениң түрмә басылмагым Халыпамыза гуллук эдйән доганларың көпүсини беркитди ве олар Худайың сөзүни горкман, хас-да батыргай вагыз этмәге хөвеслендилер.
15 Хава, кәбир доганлар Месих хакда гөриплик ве бәсдешлик эдип вагыз этсе, башгалары муны ягшы ниет билен эдйәрлер. 16 Ягшы ниет билен вагыз эдйәнлер Месихи сөййәндиклери үчин эдйәрлер. Себәби олар мениң хош хабары горамак үчин белленендигими билйәрлер. 17 Йөне бәсдешлик эдйәнлер эрбет ниет билен вагыз эдйәрлер, себәби олар мениң түрмеде эҗир чекмегими ислейәрлер. 18 Бу нәхили нетиҗе берйәр? Ягшы ниет билен вагыз эдилсин, эрбет ниет билен эдилсин, хер нәме-де болса, Месих хакда вагыз эдилйәр, мен муңа бегенйәрин. Аслында, мен муңа хемише-де бегенерин. 19 Себәби сизиң догаларыңыз ве Иса Месихиң берйән мукаддес рухуның көмеги аркалы алнып барылян ишлер мени халас эдер. 20 Мен хич бир ягдайда утанҗа галмаҗакдыгыма ынанярын ве муңа умыт эдйәрин. Гайтам, Месих хакда өң батыргайлык* билен гүррүң беришим ялы, хәзир хем оны бейгелдйәрин. Хава, мен яшасам-да, өлсем-де Месихи бейгелдерин*.
21 Себәби мен яшасам, Месих үчин яшаярын, эгер өлсем, бу мениң үчин газанчдыр. 22 Мен ынсан беденинде яшасам, эдйән ишим хас көп миве берер; йөне өзүм сайламалы болсам, хайсысыны сайлаҗакдыгымы билмейәрин. 23 Мен бу ики задың арасында нәме этҗегими билмейәрин. Себәби азат болуп, Месихиң янында болмак ислейәрин. Элбетде, бу хас говусыдыр. 24 Йөне сизиң үчин ынсан беденинде галмагым хас зерурдыр. 25 Шонуң үчин мен энтек дири галҗакдыгыма ынанярын. Сизиң Худая гуллук этмекде үстүнлик газанмагыңыз ве иманда шатланмагыңыз үчин яныңызда боларын. 26 Себәби яныңызда ене-де болсам, сизиң Месих Исаның шәгиртлери хөкмүнде шатлыгыңыз хас-да артар.
27 Өзүңизи* Месих барадакы хош хабара мынасып алып барың. Шонда мен яныңыза барып, сизи гөрсем-де я-да барып билмесем-де, берк дурандыгыңызы, бир пикирде болуп, агзыбирликде эгинме-эгин ишлешйәндигиңизи ве хош хабара болан иманыңыз үчин гөрешйәндигиңизи эшидип билерин. 28 Шейле-де душманларыңыздан хич бир ягдайда горкмаяндыгыңызы билерин. Бу оларың хеләк болҗакдыгыны, сизиң болса халас болҗакдыгыңызы субут эдйәр. Муны Худай аян эдйәндир. 29 Себәби сизе диңе бир Месихе иман этмек дәл, эйсем, онуң үчин эҗир чекмек хорматы хем берлендир. 30 Себәби сиз хем мениң ялы гөреш алып барярсыңыз ве мениң хенизем гөрешйәндигим хакда эшидйәнсиңиз.