Якуп

5 Эй байлар, диңләң. Үстүңизе абанып гелйән хасрат себәпли аглаң, дады-перят эдиң. 2 Сизиң байлыгыңыз чүйреди, эгин-эшиклериңизи гүе ийди. 3 Сизиң алтындыр күмшүңиз послады, оларың посы сизе гаршы шаят болар ве бедениңизи иер. Сизиң йыгнан затларыңыз соңкы гүнлерде янып дуран от кимин болар. 4 Ине, меллегиңизде ишледип, хакыны бермедик ишчилериңиз аглашяр, оракчыларың агы сеси гошунлар Худайы Ехованың* гулагына барып етди. 5 Сиз ер йүзүнде болчулыкда ве айшы-эшретде яшадыңыз. Сиз семрәп*, мал кимин союлҗак гүнүңизе тайярландыңыз. 6 Сиз догры адама хөкүм чыкардыңыз; оны өлүме табшырдыңыз. Эйсем, ол сизе нәдип гаршылык гөркезмесин?

7 Доганлар, шол себәпли Халыпамызың гелҗек* вагтына ченли сабырлы болуң. Дайхан хем ерден арзылы хасылыны алмак үчин гүйз ве яз ягшына сабырлы гарашяр. 8 Сиз хем сабырлы ве догумлы болуң*. Себәби Халыпамызың гелҗек* вагты якынлашды.

9 Доганларым, үстүңизден хөкүм чыкарылмаз ялы, бир-бириңизе игенмәң*. Ине, Казы гапының агзында дурандыр. 10 Доганларым, кынчылыклара дөз гелип, сабырлы болмакда Ехованың* адындан геплән пыгамберлериң гөрелдесине эериң. 11 Биз кынчылыклара чыдаян адамлары багтлы сайярыс. Сиз Эйюбың чыдамлылыгы ве Ехованың* оңа пата берендиги хакда эшиденсиңиз. Хава, Ехова* мәхирли ве рехимдардыр.

12 Галыберсе-де, доганларым, ант ичмегиңизи бес эдиң: не гөкден, не ерден, не-де башга затдан. Сизиң «хава» диениңиз «хава», «ёк» диениңиз «ёк» болсун. Шонда үстүңизден хөкүм чыкарылмаз.

13 Араңызда бири кынчылык чекйәрми? Гой, ол дога этсин. Гөвни хошмы? Гой, Худайы шөхратландырян айдымлар* айтсын. 14 Араңызда бири сыркавмы?* Гой, ол йыгнак яшулуларыны чагырсын. Олар дога эдип, оңа Ехованың* адындан яг чалсынлар. 15 Иман билен эдилен дога сыркавы сагалдар, Ехова* хем оны дикелдер. Эгер гүнә эден болса, Худай оны багышлар.

16 Шейлеликде, сагалмак үчин гүнәлериңизи бир-бириңизиң өңүңизде ачык боюн алың, бир-бириңиз барада дога эдиң. Догры адамың догасы гүйчлүдир, ол, хакыкатдан-да, көмек эдип билйәндир. 17 Ыляс хем бизиң ялы адамды, онуң бизиңки ялы дуйгулары барды. Ол ягыш ягмасын дийип гызгын дога эденде, ер йүзүне үч ярым йыллап ягыш ягманды. 18 Соңра ол ене-де дога этди, шонда гөкден ягыш ягып, топрак хасылыны берди.

19 Доганларым, араңызда бири хакыкатдан дашлашса ве башга бири хем оны ызына гайтарса, 20 онда шуны билиң: гүнәкәре эрбет ишлерден эл чекмәге көмек эден адам оны* өлүмден халас эдйәндир, Худай хем гүнәкәриң әхли этмишлерини багышлар.