2 Коринфлилер

1 Худайың ислеги билен Месих Исаның ресулы болан мен Павлус, доганымыз Тимотеос билен Коринфдәки Худайың йыгнагына ве бүтин Ахаядакы мукаддеслериң әхлисине хат язярын.

2 Ата Худайымыздан ве Халыпамыз Иса Месихден сизе мерхемет хем парахатлык болсун.

3 Худайымыз ве Халыпамыз Иса Месихиң Атасына шөхрат болсун. Ол рехимдарлар Атасы ве бүтин теселлилер Худайыдыр. 4 Биз Худайдан алан теселлимиз аркалы башгалара-да хер хили кынчылыкларында теселли берип билер ялы, Ол бизе әхли кынчылыкларымызда теселли берйәр. 5 Биз Месихиң шәгиртлери хөкмүнде көп хорлуклары чекишимиз ялы, Месих аркалы-да көп теселли аляндырыс. 6 Биз хәзир кынчылык чексек-де, бу сизиң теселли тапып, гутулыш алмагыңыз үчиндир; эгер теселли алян болсак, сизиң теселли алмагыңыз үчиндир. Бу теселли сизе бизиңки ялы хорлуклара дөз гелмәге көмек эдер. 7 Сиз бизиңки ялы хорлуклары чекйән болсаңыз, бизиңки ялы-да теселли тапҗакдыгыңыза долы умыт эдйәрис.

8 Доганлар, биз Азияда* җуда агыр кынчылыклары гөрдүк. Ол кынчылыклар гүйҗүмизден артык боландыгы үчин, биз хатда дири галарыс хем өйтмәндик. 9 Догрудан-да, биз өзүмизи өлүме хөкүм эдилен ялы дуйдук. Шол ягдай өзүмизе дәл-де, өлүлери дирелдйән Худая бил багламагымыз үчин болды. 10 Ол бизи өлүм ховпундан халас этди ве ене-де халас эдер. Биз онуң мундан бейләк-де халас этҗекдигине ынанярыс. 11 Сиз хем бизиң үчин йүрекден дога эдип, көмек эдип билерсиңиз. Шонда Худай догаларыңыза җогап берип, бизе ягшылык эдер ве башга-да көп адамлар Худайың эден ягшылыгы үчин оңа миннетдарлык айдарлар.

12 Биз ынсабымызың пәкдигине буйсанярыс, себәби шу дүнйәде ынсан акылдарлыгына дәл-де, Худайың мерхеметине бил баглап, эсасан-да, сизиң араңызда догручыл ве мукаддес яшайшы алып барярыс. 13 Аслында, мен сизе окап* ве дүшүнип билйән затларыңыз хакда язярын, йөне олара мундан бейләк-де долы* дүшүнерсиңиз дийип умыт эдйәрин. 14 Биз сизиң белли бир дереҗеде дүшүнип билйәндигиңизе буйсанярыс. Сиз Халыпамыз Исаның гүнүнде-де бизиң гуванҗымыз боларсыңыз.

15 Мен шейле ынам билен сизиң яныңыза өң бармакчыдым. Шонда сиз икиленч шатланып* билердиңиз. 16 Себәби мен Македония баряркам хем, Македониядан гайдып гелйәркәм хем яныңыза бармак иследим. Шондан соң сиз мени Яхуда ченли бираз уградып билердиңиз. 17 Эйсем, мен муны максат эденимде, ойланышыксыз херекет этдимми? Я-да «Хава, хава» дийип-де, соңра «Ёк, ёк» болар ялы, мен тен хөвеслерине эерип, өз максадымы ерине етирҗек болярынмы? 18 Худайың ынамдар болшы ялы, бизиң хем айдян сөзлеримиз хакыкатдыр. Биз башда «хава», соңра болса «ёк» диймейәрис. 19 Себәби сизиң араңызда биз, ягны мен, Силванус* ве Тимотеос аркалы вагыз эдилен Худайың Оглы Иса Месих башда «хава» болуп, соңра «ёк» болян дәлдир. Ол элмыдама «хавадыр». 20 Худайың вадалары нәче көп болса-да, олар Иса аркалы «хава» боляндыр. Шейлеликде, биз Худая шөхрат гетирер ялы, ол аркалы «Омын» диййәрис. 21 Эмма сизиң ве бизиң Месихе дегишлидигимизе гүвә геченем, бизи месх эденем Худайдыр. 22 Шейле-де ол бизе өз мөхүрини басды ве гелҗекки сылага гирев хөкмүнде йүреклеримизе рухуны гуйды.

23 Худайың өңүнде өз җанымдан ант ичйәрин: мен сизи аямак иследим, шонуң үчин шу вагта ченли Коринфе бармадым. 24 Себәби биз сизиң иманыңызың үстүнден агалык этҗек болмаярыс, гайтам, шатланмагыңыз үчин ишдешлериңиздирис, чүнки сиз иманда берк дурсуңыз.