1 Петрус
1 Иса Месихиң ресулы болан мен Петрус, Понтусдакы, Галатядакы, Каппадокиядакы, Азиядакы* ве Битиниядакы сайлананлара, ягны вагтлайын яшайҗылара хат язярын. 2 Гөкдәки Атамыз хем Худайымыз өңүнден айдышы ялы, сизи сайлады. Оңа гулак асмагыңыз үчин, ол өз рухы аркалы сизи мукаддес* этди ве Иса Месихиң ганы билен арассалады*.
Гой, Худайың мерхемети ве парахатлыгы сизде артсын.
3 Халыпамыз Иса Месихиң Худайына ве Атасына шөхрат болсун. Ол бизиң берк умыдымыз болар ялы, бейик мерхемети билен тәзеден догулмагымыза ёл ачды. Биз бу умыда Иса Месихиң өлүмден дирелмеги билен эе болдук. 4 Худай бизе яшайыш үчин догулмага ёл ачып, чүйремез, арасса ве солмаз мирасы вада берди. Ол бу сылагы сизиң үчин гөкде саклаяндыр. 5 Худай сизи дөврүң соңунда халас болмагыңыз үчин иманыңызың бардыгы себәпли өз гүйҗи аркалы гораяр. 6 Шонуң үчин хәзир дүрли сынаглар себәпли аз вагтлык кынчылык чекйәнем болсаңыз, сиз көп шатланярсыңыз. 7 Сизиң сынагдан гечен иманыңыз отдан гечирилип арассаланан алтындан-да хас гымматлыдыр, себәби алтын барыбир ёк болуп гидйәндир. Шейле иман Иса Месих геленде, сизи хормата, шөхрата ве өвгә эе эдер. 8 Сиз Месихи хич хачан гөрмесеңиз-де, оны сөййәрсиңиз. Сиз оны хәзирем гөрмейәрсиңиз, эмма оңа иман эдйәрсиңиз ве чәксиз бегенип, көп шатланярсыңыз. 9 Себәби сиз иманыңыз аркалы максада, ягны гутулыша етерсиңиз.
10 Сизе эдилен мерхемет хакында велилик эден пыгамберлер бу гутулыш бабатда җикме-җик өвренип, ичгин гөзлег гечирдилер. 11 Олар Месихиң нәдип хорлук чекҗекдиги ве соңра нәхили шөхрата эе болҗакдыгы барада өңүнден айдыланлары мукаддес рухуң көмеги билен өвренип, мунуң хайсы вагта я-да дөвре дегишлидигини билҗек болдулар. 12 Худай пыгамберлериң эдйән хызматының өзлери үчин дәл-де, сизиң үчин эдйәндигини аян этди. Бу болса хәзир сизе гөкден инен мукаддес рухуң көмеги билен хош хабары ыглан эдйәнлер аркалы айдыляр. Шол затлар билен хатда перишделер хем ичгин гызыкланярлар.
13 Пикириңизи долы җемләп*, херекет этмәге тайяр болуң; хемише сагдын пикирлениң; Иса Месих геленде, сизе эдилҗек мерхемете умыт баглаң. 14 Худайы танамаян вагтыңыздакы хөвеслериңизе эермегиңизи бес эдип, гулак асян чагалар ялы болуң. 15 Сизи чагыран Мукаддес Худайдан гөрелде алың, өзүңизи әхли затда мукаддес алып барың. 16 Себәби Язгыларда: «Мукаддес болуң, чүнки мен мукаддесдирин» дийип язылгыдыр.
17 Эгер сиз хич кими ала тутмаян ве хер кесиң эден ишине гөрә хөкүм чыкарян Атаны чагырян болсаңыз, онда бу дүнйәде вагтлайын яшаян махалыңыз Худайдан горкуп яшаң. 18 Сиз ата-бабаларыңыздан мирас галан бидерек яшайышдан күмүш я-да алтын ялы чүйрейән затлар билен азат эдилмәндигиңизи* билйәнсиңиз. 19 Эмма сиз языксыз ве шикессиз* гузының, ягны Месихиң гымматлы ганы билен азат эдилдиңиз. 20 Аслында, Худай оны дүнйә ярадылмаздан өң сайлады, йөне ол сизиң үчин соңкы гүнлерде аян болды. 21 Сиз ол аркалы Худая иман эдйәрсиңиз. Хава, сиз Худая иман эдип, оңа умыт баглар ялы, Худай Месихи өлүмден дирелдип, оны шөхрата эе этди.
22 Хәзир сиз Худайың Сөзүндәки хакыката гулак асып, өзүңизи арассаладыңыз ве доганлары хилесиз сөймеги өврендиңиз. Шол себәпли-де бири-бириңизи йүрекден сөйүң. 23 Сиз хасыл бермейән тохумдан* дәл-де, хасыл берйән тохумдан, ягны дири ве эбеди Худайың сөзи аркалы тәзеден догулдыңыз. 24 Себәби «әхли адамлар мейдан оты ялыдыр ве оларың оваданлыгы мейдан гүллери киминдир. От гураяр, онуң гүллери-де дөкүлйәр. 25 Эмма Ехованың* айдян сөзи эбеди галяндыр». Бу «сөз» болса сизе айдылан хош хабардыр.