Ресулларың ишлери
1 Эй Теофил, мен илкинҗи китабымда Исаның әхли эден ве өвреден затлары барада языпдым. 2 Ол гөге гитмезден өң, мукаддес рух аркалы сайлан ресулларына гөркезмелери берипди. 3 Иса эҗир чекип өленден соң, олара өзүниң диридигини көп субутнамалар аркалы гөркезди ве 40 гүнүң довамында гөрнүп, олара Худайың Патышалыгы барада гүррүң берди. 4 Иса олар билен гөршенде, шейле табшырык берди: «Иерусалимден гитмәң-де, сизе өң айдышым ялы, Атаның вада берен задына гарашың. 5 Себәби Яхя сува чүмдүрйәрди, эмма сиз тиз вагтдан мукаддес рух билен чүмдүрилерсиңиз».
6 Олар ене-де Исаның янына йыгнанышанларында, ондан: «Мугаллым, сен Ысрайыл үчин патышалыгы шу вагт дикелтмекчими?» дийип сорадылар. 7 Иса олара шейле дийди: «Сизе белленен вагты ве дөври билмек герек дәл. Онуң хачан болҗакдыгыны чөзмәге диңе Атаның ыгтыяры бардыр. 8 Эмма үстүңизе мукаддес рух иненде, сиз гүйч-кувват алып, Иерусалимде, тутуш Яхудада, Самарияда ве бүтин ер йүзүнде* мен барада шаятлык эдерсиңиз». 9 Иса бу сөзлери айдандан соң, шәгиртлериниң гөзүниң өңүнде асмана галды ве булут оны өртенде, ол гөзден гайып болды. 10 Шәгиртлери асмана середип дуркалар, бирденкә янларында ак эшикли ики адам пейда болды. 11 Олар: «Эй җелилели адамлар, сиз нәме үчин асмана середип дурсуңыз? Иса сизден алнып, асмана нәдип гиден болса, эдил шонуң ялы-да гайдып гелер» дийдилер.
12 Соңра олар Зейтун дагындан гайдып, Иерусалиме гелдилер. Ол даг Иерусалимиң голайында ерлешйәрди ве бир Сабат гүнлүк ёлды*. 13 Ресуллар болян җайларына гайдып геленлеринде, ёкаркы отага чыкдылар. Ол ерде Петрус, Яхя билен Якуп, Андреас, Филипус билен Томас, Бартоломей билен Матта, Алфейиң оглы Якуп, ыхласлы дийилйән Симун ве Якубың оглы Яхуда барды. 14 Олар Исаның эҗеси Меръем хем-де онуң доганлары ве бейлеки аяллар билен билеликде эрҗеллик билен дога эдйәрдилер.
15 Шол гүнлериң биринде 120-ә голай доган-уялар дога этмек үчин йыгнандылар. Шонда Петрус еринден турды-да, шейле дийди: 16 «Доганлар, бу затлар Давудың мукаддес рух аркалы айдан пыгамберлигиниң ерине етмеги үчин болды. Пыгамберлик Исаны туссаг этдирмек үчин эсгерлери алып гелен Иуда хакдады. 17 Ол хем ресулды, бизиңки ялы гуллугы берҗай этмек үчин сайланыпды. 18 Шейлеликде, ол нәдогры иш үчин берлен пула бир мейдан сатын алды ве ёкардан башашак гачанда, гарны ярылып, әхли ичегелери дашына чыкды. 19 Бу ваканы Иерусалимиң әхли яшайҗылары эшитди. Шол себәпли сатын алнан мейдана өз диллеринде Хакелдама, ягны «Ганлы мейдан» дийип ат дакдылар. 20 Себәби Зебур китабында: „Гой, онуң өйи бошап галсын ве онда хич ким яшамасын. Онуң гөзегчилик этмек везипесини башга бири алсын“ дийип язылгыдыр. 21 Шейлеликде, онуң орны Халыпамыз Иса янымыздака, элмыдама арамызда болан адамлардан бирине берилмели. 22 Ол Исаның Яхя тарапындан сува чүмдүрилип, Худайың оны бизден алан вагтына ченли янымызда боланларың бири болмалы. Шейле-де ол Исаның өлүмден дирелендигиниң шаяды болмалы».
23 Шейлеликде, олар ики адамы, ягны Барсаба дийилйән Юсубы — оңа Юстус хем дийилйәрди — ве Маттияны теклип этдилер. 24 Соңра олар шейле дога этдилер: «Эй Ехова*, сен әхли адамларың йүреклерини гөрйәрсиң. Шу ики адамың хайсысыны сайлан болсаң, бизе гөркезмегиңи хайыш эдйәрис. 25 Гой, ол Иуданың йүз өврен гуллугына ве ресуллык ишине эе болсун». 26 Олар үчин биҗе атдылар ве биҗе Маттия дүшди. Шейдип, ол 11 ресулың хатарына гошулды.