Лука

23 Шейлеликде, оларың бары турдулар-да, Исаны Пилатусың янына алып гитдилер. 2 Олар Исаны шейле сөзлер билен айыплап башладылар: «Бу адам халкымызы аздырып, патыша* салгыт төлемеги гадаган эдйәр, өзүне болса Месих патыша диййәр». 3 Пилатус ондан: «Сен ехудыларың Патышасымы?» дийип сорады. Иса оңа: «Муны сениң өзүң айдярсың» дийип җогап берди. 4 Шонда Пилатус улы руханылара ве халка йүзленип: «Мен бу адамда хич хили язык тапмадым» дийди. 5 Эмма олар өз диенлерини тутдурып: «Ол тутуш Яхудада, хатда Җелиледен башлап шу ере ченли адамлара хөкүмете табын болмазлыгы өвредйәр» дийдилер. 6 Пилатус муны эшидип: «Ол нәме, җелилелими?» дийип сорады. 7 Пилатус Исаның Хиродесиң* хөкүмдарлык эдйән ерине дегишлидигини биленде, оны Хиродесиң янына иберди. Себәби Хиродес шол вагт Иерусалимдеди.

8 Хиродес Исаны гөренде, гаты бегенди. Ол энчеме вагт бәри Исаны гөрмегиң арзувындады. Себәби ол хакда көп затлары эшидипди ве онуң гөркезйән гудратларыны гөрмеги умыт эдйәрди. 9 Шонда ол Иса сораг барыны ягдырып башлады, йөне ол хич зат җогап бермеди. 10 Улы руханылар ве канунчылар болса ызыны үзмән Исаны эрбет затларда айыплаярдылар. 11 Шонда Хиродес эсгерлери билен Исаны кемсидип башлады. Эгнине гымматбаха доны гейдирип, үстүнден гүлдүлер, соңра Пилатусың янына ибердилер. 12 Хиродес билен Пилатус өң душманды, йөне шол гүн олар достлашдылар.

13 Соңра Пилатус улы руханылары, ёлбашчылары ве халкы янына чагырып, 14 шейле дийди: «Сиз бу адамы халкы аздыряр дийип яныма гетирдиңиз. Ине, мен оны сизиң өңүңизде сораг этдим, йөне сизиң оңа йөңкейән затларыңызда хич хили гүнәси ёк экен. 15 Хиродес хем онда хич хили язык тапмандыр, шол себәпли оны ызына, бизиң янымыза иберипдир. Гөршүңиз ялы, ол өлүме мынасып иш этмәндир. 16 Шейлеликде, мен оңа темми берип, бошадып гойберҗек». 17 *—— 18 Бүтин мәреке болса: «Бу адамы өлүме хөкүм эт, бизе болса Бараббасы бошат!» дийип гыгырярды. 19 (Бараббас шәхерде гозгалаң турзуп, адам өлдүрендиги үчин түрмә басылыпды). 20 Пилатус Исаны бошатмак үчин ене-де халка йүзленди. 21 Шонда мәреке: «Оны пүрсе чүйле! Оны пүрсе чүйле!» дийип, гыгырып башладылар. 22 Ол үчүнҗи гезек олара: «Нәме үчин? Бу адам нәме яманлык этди? Мен онда өлүме мынасып зат тапмадым; шонуң үчин оңа темми берип, бошадып гойберҗек» дийди. 23 Эмма мәреке өз диенини тутуп, батлы сес билен оны пүрсе чүйлемеги талап эдйәрди. Олар шейле бир гыгырярдылар велин, 24 Пилатус оларың талабыны ерине етирмели диен карара гелди. 25 Ол халкың ислейши ялы, гозгалаң турзан ве адам өлдүрен Бараббасы бошатды, Исаны болса оларың элине берди.

26 Олар Исаны алып баряркалар, киреналы Симун атлы бир адам шәхере гирип гелйәрди. Олар оны тутдулар-да, җебир пүрси* онуң үстүне атып, Исаның ызындан йөремеги буюрдылар. 27 Биргиден мәреке онуң ызына дүшүп барярды, оларың арасында Иса үчин хасрат чекип гурсагына урян ве аглаян аяллар хем барды. 28 Иса олара тарап өврүлди-де, шейле дийди: «Эй Иерусалимиң гызлары, мениң үчин агламаң. Өзүңиз ве чагаларыңыз үчин аглаң. 29 Себәби шейле бир гүнлер гелер, адамлар: „Өнелгесиз, чага догурмадык ве эмдирмедик аяллар багтлыдыр!“ диерлер. 30 Шонда олар даглара: „Үстүмизе йыкылың!“ ве депелере: „Үстүмизи өртүң!“ дийип башларлар. 31 Эгер олар агач энтек яшылка шейле эдйән болсалар, онда ол гураса нәме болар?»

32 Олар Исаның янында пүрсе чүйлемек үчин ики саны җенаятчыны хем алып барярдылар. 33 «Келлечанак» дийилйән ере геленлеринде, олар Исаны җенаятчылар билен биле пүрсе чүйледилер: бирини саг, бейлекисини чеп тарапында. 34 Эмма Иса: «Атам, бу адамлары багышла, чүнки олар нәме эдйәндиклерини билмейәрлер» дийди. Соңра олар Исаның эшиклерини өзара пайлашмак үчин биҗе атдылар. 35 Адамлар олара середишип дурдулар. Эмма халкың ёлбашчылары гүлшүп: «Ол башгалары халас эдйәрди; эгер ол Худайың сайлан Месихи болян болса, гой, өзүни халас этсин» диййәрдилер. 36 Хатда эсгерлер хем онуң үстүнден гүлйәрдилер ве янына барып, шерап хөдүрледилер. 37 Олар: «Эгер сен ехудыларың Патышасы болсаң, өзүңи халас эт» диййәрдилер. 38 Шейле-де олар Исаның депесинде: «Бу ехудыларың Патышасы» диен язгыны асдылар.

39 Янында асылгы дуран җенаятчыларың бири оңа сөгүп: «Эгер сен Месих болсаң, өзүңи-де, бизи-де халас эт» диййәрди. 40 Бейлекиси болса шол җенаятча кәйәп: «Сен Худайдан горкмаярмың? Сенем онуң ялы җеза чекйәрсиң ахырын. 41 Бизе эден ишимизе лайык адалатлы хөкүм чыкарылды, эмма ол хич хили эрбет иш этмеди» дийди. 42 Соңра ол Иса йүзленип: «Иса, Патыша боланыңда*, мени ятлагын» дийди. 43 Иса хем оңа: «Шу гүн саңа догрусыны айдярын, сен мениң билен биле Җеннетде боларсың» дийди.

44 Бүтин ер йүзүне такмынан сагат алтыдан* докуза* ченли гараңкылык аралашды. 45 Себәби Гүн ягтылык бермейәрди. Ыбадатхананың мукаддес ериндәки туты хем йыртылып, ортарасындан икә бөлүнди. 46 Иса батлы сес билен гыгырып: «Атам, мен рухумы* саңа табшырярын» дийди. Муны айдандан соң, ол җан берди. 47 Йүзбашы болан затлары гөренде, Худайы шөхратландырып: «Ол, хакыкатдан-да, догры адам экен» дийди. 48 Болан затлары гөрен мәреке хасратдан яңа гурсакларына уруп, өйлерине доланярды. 49 Исаны танаянларың әхлиси узагракда дурдулар. Ол ерде хатда Җелиледен онуң ызына дүшүп гелен аяллар хем барды, оларам болан затлары гөрдүлер.

50 Шол ерде Юсуп атлы бир адам барды. Ол Меҗлисиң* хорматланян агзасыды ве догручыл хем-де ягшы адамды. 51 Юсуп Исаны өлдүрҗек боланларың тарапыны тутманды ве ишине-де гошулманды. Ол Яхуданың Ариматия атлы шәхеринденди ве Худайың Патышалыгының гелмегине гарашярды. 52 Юсуп Пилатусың янына барып, Исаның җеседини бермеги хайыш этди. 53 Ол җеседи пүрсден дүшүрди-де, оны ёкары хилли зыгыр мата долады. Соңра гаяда оюлып ясалан ве хениз хич кимиң җайланмадык мазарында җайлады. 54 Шол гүн тайярлык гөрүлйән гүнди ве гүн яшанда Сабат гүни* башламалыды. 55 Җелиледен Исаның ызына дүшүп гелен аяллар онуң мазарыны ве җеседини гөрмәге гелдилер. 56 Соңра олар якымлы ыслы отлары ве яглары тайярламак үчин ызларына доландылар. Эмма Кануна гөрә олар Сабат гүни дынч алдылар.