Ресулларың ишлери
23 Павлус Меҗлисде* отуранлара ичгин серетди-де: «Адамлар, доганлар, мен шу вагта ченли Худайың өңүнде пәк ынсап билен яшап гелйәрин» дийди. 2 Шонда баш руханы Хананя шол ерде дуранлара онуң агзына урмагы буюрды. 3 Павлус оңа: «Худай сени урсун, эй икийүзли*. Сен мени Кануна лайык хөкүм этмек үчин отырсың дәлми, онда нәме үчин Кануны бозуп, мени урмагы буюрярсың?» дийди. 4 Павлусың янында дуранлар: «Сен Худайың баш руханысына дил етирйәрмиң?» дийдилер. 5 Шонда Павлус: «Доганлар, мен онуң баш руханыдыгыны билмәндирин. Чүнки Худайың китабында: „Халкың ёлбашчысына дил етирме“ дийип язылгыдыр» дийди.
6 Павлус отуранларың ярысының саддукейлер, ярысының болса фарисейлердигини билип, батлы сес билен Меҗлисе* йүзленди-де: «Адамлар, доганлар, мен фарисейлериң неслинден болан фарисейдирин. Мени дирелише умыт эдйәндигим себәпли хөкүм эдйәрлер» дийди. 7 Ол муны айданда, фарисейлер билен саддукейлериң арасында дава турды ве отуранлар ики топара бөлүнди. 8 Себәби саддукейлер дирелише-де, перишделере-де, рухлара-да ынанмаярдылар. Эмма фарисейлер буларың әхлисине ынанярдылар. 9 Шонда улы гыкылык турды ве фарисейлер топарына дегишли болан кәбир канунчылар еринден турдулар-да, гахар-газап билен җеделлешип: «Биз бу адамда хич хили язык гөрмейәрис, белки-де, онуң билен рух я-да бир перишде геплешендир» дийдилер. 10 Дава хас гүйҗәнде, гошун серкердеси Павлусы өлдүрерлер өйдүп горкды. Шонда ол эсгерлерини иберип, Павлусы оларың арасындан чекип чыкармагы ве эсгерлериң болян җайына алып гитмеги буюрды.
11 Шол гиҗе Халыпамыз Павлусың янына гелип: «Батыр бол! Сен Иерусалимде мен хакда биркемсиз шаятлык эдишиң ялы, Римде-де шаятлык этмелисиң» дийди.
12 Даң атанда, ехудылар дил дүвшүп, Павлусы өлдүрйәнчәлер хич зат ийип-ичмеҗекдиклери хакда ант ичдилер. 13 Дил дүвшүп, ант иченлериң саны 40-дан говрак адамды. 14 Олар улы руханыларың ве яшулуларың янына барып: «Биз Павлусы өлдүрйәнчәк, хич зат иймерис дийип ант ичдик. 15 Хәзир сиз Меҗлис* билен бирликде гошун серкердесине хабар ёллап, Павлусың ишини хас чуңңур барламак ислейәндигиңизи айдың. Гой, олар оны гетирсинлер. Эмма ол сизиң яныңыза гелип етмәнкә, биз оны өлдүрмек үчин тайын болуп дурарыс» дийдилер.
16 Эмма Павлусың егени* оларың дил дүвшүп, букуда гарашҗак боляндыкларыны эшиденде, эсгерлериң болян җайына барды-да, муны Павлуса хабар берди. 17 Шонда Павлус йүзбашыларың бирини янына чагырып: «Шу огланы ал-да, гошун серкердесиниң янына элт. Ол оңа бир зады хабар бермекчи боляр» дийди. 18 Ол хем огланы алды-да, гошун серкердесиниң янына элтип: «Туссаглыкда отуран Павлус мени чагырып, шу огланы яныңа гетирмеги хайыш этди. Ол саңа бир зат айтҗак боляр» дийди. 19 Гошун серкердеси онуң элинден тутды-да, алып гитди ве екеликде ондан: «Сен маңа нәме айтмакчы?» дийип сорады. 20 Ол хем оңа шейле дийди: «Ехудылар Павлусың ишини җикме-җик барламакчы болан болуп, эртир оны Меҗлисе* гетирмеги сенден хайыш этҗек болярлар. 21 Йөне сен олара ынанма, себәби 40-дан говрак адам Павлусы тутмак үчин, оңа букуда гарашарлар. Олар Павлусы өлдүрйәнчәлер, ийип-ичмезлиги ант ичдилер. Хәзир болса олар сениң разылыгыңа гарашып, тайын дурлар». 22 Гошун серкердеси оглана: «Маңа айданларыңы хич киме айдайма» дийип табшырды-да, оны угратды.
23 Соңра ол ики саны йүзбашыны чагырып, олара: «Шу гиҗе үчүнҗи сагатда* Кайсария ёла дүшмек үчин 200 эсгер, 70 атлы хем-де 200 саны найзалы адам тайярлаң. 24 Павлус үчин хем атлары тайярлаң-да, оны саг-аман хөкүмдар Феликсиң янына элтиң» дийди. 25 Соңра ол шейле хат язып ёллады:
26 «Клавдий Лисийден Сизиң Алыхезретлериңиз Хөкүмдар Феликсе салам болсун! 27 Ехудылар бу адамы тутуп өлдүрҗек болдулар. Эмма мен онуң Римиң раятыдыгыны билип, дессине эсгерлерим билен гелдим-де, оны халас этдим. 28 Мен оны нәмеде айыплаяндыкларыны билмек үчин ехудыларың Меҗлисине* алып бардым. 29 Оларың бу адамы өз Кануны билен баглы затларда айыплаяндыкларыны аныкладым. Эмма ол өлүме хөкүм эдилер ялы я-да түрмә басылар ялы, хич хили иш этмәндир. 30 Бу адама гаршы дил дүвшендиклерини биленимде, оны хаял этмән сениң яныңа ибердим ве оны айыплаянлара арзыны саңа айтмакларыны табшырдым».
31 Шонда эсгерлер буйрулышы ялы, Павлусы алдылар-да, гиҗе Антипатрисе гетирдилер. 32 Эртеси гүн олар Павлусы атлылара табшырып, өзлери эсгерлериң болян җайына доландылар. 33 Атлылар Кайсария гелип, хаты хөкүмдара говшурдылар, Павлусы хем онуң янына элтдилер. 34 Ол хаты окап, Павлусың хайсы велаята дегишлидигини сорады ве онуң Киликиядандыгыны билди. 35 Ол Павлуса: «Сени айыплаянлар геленде, мен сениң ишиңи долы диңләрин» дийди. Соңра ол гаравуллара Павлусы Хиродесиң көшгүнде сакламагы табшырды.