Римлилер
1 Иса Месихиң гулы болан мен Павлус, сизе хат язярын. Месих мени ресул болмага ве Худайың хош хабарыны ыглан этмәге белледи. 2 Худай бу хош хабары өң Язгыларда пыгамберлер аркалы вада берипди. 3 Ол Давудың несли* болуп доглан Худайың Оглы хакындакы хош хабардыр. 4 Огул мукаддес рухуң гүйҗи аркалы өлүмден диреленде, онуң Худайың Оглудыгы тассыкланды. Хава, ол Халыпамыз Иса Месихдир. 5 Ол маңа мерхемет этди ве әхли миллетлер оңа иман эдип, гулак асар ялы хем-де онуң адыны шөхратландырар ялы, мени* ресуллык ишини ерине етирмек үчин белледи. 6 Иса Месихиң шәгирди болмагыңыз үчин, Худай сизи-де башга халкларың арасындан чагырды. 7 Мен Худайың сөййәнлерине, мукаддес болмага чагырыланлара, ягны Римде яшаянларың хеммесине хат язярын.
Ата Худайымыздан ве Халыпамыз Иса Месихден сизе мерхемет хем парахатлык болсун.
8 Илки билен, сизиң үчин Иса Месих аркалы Худая миннетдардырын, себәби сизиң иманыңыз хакда бүтин дүнйәде гүррүң эдйәрлер. 9 Мен Худайың Оглы барадакы хош хабар билен баглы мукаддес гуллугы бүтин йүрекден ерине етирйәрин. Догаларымда сизи хемише ятлаяндыгыма Худайым шаятдыр. 10 Худай ислесе, мүмкин болдугындан, сизиң яныңыза ахырсоңы барарын дийип умыт эдйәрин ве бу хакда Худая ялбарярын. 11 Себәби сизи җуда гөресим гелйәр, иманыңызы беркитмек үчин кәбир рухландырыҗы пикирлери* пайлашмак ислейәрин. 12 Хас догрусы, сиз иманыңыз билен мени, мен хем иманым билен сизи рухландырар ялы гөршесим гелйәр.
13 Доганлар, мен энчеме гезек сизиң яныңыза бармакчыдым. Башга халкларда эдишим ялы, сизиң араңызда-да шәгирт тайярлап билмегим үчин адамлара өвретмек ислейәрдим. Йөне хер гезегем бир пәсгелчилик дөрейәрди. 14 Мен греклериң-де, башга халкларың-да*, акылдарларың-да, билимсиз адамларың-да өңүнде борчлудырын. 15 Хава, мен сизе-де, ягны Римде яшаянлара-да хош хабары ыглан этмек ислейәрин. 16 Мен хош хабары вагыз этмекден утанмаярын. Хош хабар — Худайың гүйҗи болуп, иманлы адамларың әхлисини, илки ехудылары, соңра греклери халас эдип билйәндир. 17 Себәби Худай иман эдйән адамлара хош хабар аркалы өз догры кадаларыны аян эдйәр ве оларың иманыны беркидйәр, чүнки: «Догры адам иманы аркалы яшар» дийип язылгыдыр.
18 Худай гулак асмаян адамлара ве догры дәллере гөкден гахарыны аян эдйәндир. Шейле адамлар нәдогры херекетлери билен башгалара хакыкаты билмәге пәсгел берйәрлер. 19 Худай олара Өзи хакда билмек үчин етерлик субутнамалары берйәндир. 20 Худай гөзе гөрүнмесе-де, адамлар ярадылан затлар аркалы онуң гүйҗүне ве хәсиетлерине дүшүнип билйәрлер. Шол себәпли олар өзлерини аклап билмезлер. 21 Олар Худайы билселер-де, оны не шөхратландырярлар, не-де миннетдарлык айдярлар. Оларың акылы бошдур, хич зада дүшүнйән дәлдир ве доңйүрекдир. 22 Өзлерини акылдар хасаплап-да, акылсыз болдулар. 23 Олар бакы* Худайы шөхратландырмагың дерегине, өлйән* адамларың, гушларың, дөрт аяклы хайванларың ве сүйренҗилериң кешбини шөхратландырярлар.
24 Шол себәпли Худай олара йүреклериниң хаясыз ислеглерине гөрә яшамага ёл берди. Шейтмек билен, олар диңе өз беденлерини масгара эдйәрлер. 25 Олар Худайың хакыкатына дәл-де, ялан затлара ынанмагы макул билдилер, ярадылан затлара хормат гоюп, сежде эдйәрлер*. Эмма диңе Ярадыҗы эбеди шөхрата мынасыпдыр. Омын. 26 Ине, шонуң үчинем Худай олара ахлаксыз ислеглерини канагатландырмага ёл берди. Шейлеликде, аяллар эркек адамлар билен дәл-де, аяллар билен ятярлар*. 27 Шейле-де эркек адамлар адаты ислегине эермән, гүйчли хаясыз ислегине ковалашып, аяллар билен дәл-де, эркек адамлар билен ятярлар. Олар нәдогры херекетлери үчин долы җезасыны аларлар.
28 Олар Худайы долы танамаярлар*. Шонуң үчин Худай олара акылсыз дүшүнҗелерине эерип, ерликсиз затлары этмәге ёл берди. 29 Олар әхли ягдайда өзлерини эдепсиз алып барып, залым, гысганч, эрбет, йүреклери гөрипликден долы, ганхор, давачыл, яланчы, гахарҗаң, гыбатчы, 30 төхметчи, Худайы йигренйән, улумсы, текепбир, өвүнҗең, эрбетлиги ойлап тапыҗы, ата-энә гулак асмаян, 31 дүшүнҗесиз, сөзүнде дурмаян, доган-гарындашларыны сөймейән, рехимсиз адамлардыр. 32 Худайың чыкаран адыл карарыны, ягны бу затлары эдйән адамлара өлүм җезасының берилҗекдигини говы билселер-де, олары диңе бир этмек билен чәкленмән, эйсем, эдйәнлери хем макуллаярлар.