Еврейлер
7 Себәби Ыбрайым патышалары еңип, ызына доланып гелйәркә, Салимиң патышасы ве Бейик Худайың баш руханысы Мелкиседек оны гаршылап паталады. 2 Ыбрайым оңа алан олҗасының ондан бир бөлегини бөлүп берди. Онуң ады «Догрулык Патышасы» ве «Салим патышасы», ягны «Парахатлык Патышасы» диймеги аңладяр. 3 Онуң какасының, эҗесиниң кимдиги, несил шеҗереси, хачан доглуп, хачан өлендиги белли болмаса-да, ол Худайың Оглы кимин хемишелик руханы болуп галяр.
4 Гөр, ол нәхили бейик адамды. Хатда ата-бабамыз* Ыбрайым хем олҗасының иң говусыны алып, ондан бир бөлегини оңа берипди. 5 Аслында, Мусаның канунына гөрә Левиниң огуллары руханылар хөкмүнде белленилип, халкдан, ягны Ыбрайымың несли болан* өз доганларындан-да ондан бир бөлеги йыгнамалыдылар. 6 Эмма Мелкиседек Левиниң машгаласындан болмаса-да, Ыбрайымың берен ондан бир бөлек задыны алып, Худайың вадасыны алан Ыбрайымы паталады. 7 Хава, ёкары везипели адамың өзүнден пес дереҗели адама пата берйәндиги билен хеммелер ылалашса герек. 8 Левилер, ягны ахырсоңы өлйән адамлар халкдан ондан бир бөлеги алан болсалар, халкдан ондан бир бөлеги алян башга бири хем бардыр. Язгыларың айтмагына гөрә, ол хенизем яшаяр. 9 Гөршүмиз ялы, хатда ондан бир бөлеги алян левилер хем Ыбрайым аркалы ондан бир бөлеги бердилер. 10 Себәби Мелкиседек Ыбрайымы гаршы аланда, Леви хениз догулмаса-да, ол Ыбрайымың гелҗекки неслиди.
11 Ысрайыллылара берлен Кануна гөрә руханылык борҗуна леви тайпасындан белленилйәрди. Эгер руханылар адамлары гүнәсиз эдип билен болсадылар, онда бизе Мелкиседек ялы руханы герек болармыды? Эйсем, Харун ялы руханы етерлик болмазмыды? 12 Эгер руханылык дүзгүни үйтгән болса, онда Канун хем үйтгемели ахырын. 13 Бизиң гүррүң эдйән бу адамымыз гурбанлык сыпасының өңүнде хызмат эдйән тайпаның агзасы дәлди. 14 Бизиң Халыпамызың яхуда тайпасындан гелип чыкандыгы хеммелере мәлимдир. Эмма Муса бу тайпадан руханыларың гелип чыкҗакдыгыны айтманды.
15 Шейлеликде, Мелкиседек ялы башга бир руханы пейда боланда, бу хас-да айдың болды. 16 Ол леви тайпасындан болмаса-да (Канунда талап эдилиши ялы), руханы болуп хызмат эдйәр. Себәби онуң ёк эдип болмаҗак яшайшы берйән гүйҗи бардыр. 17 Худай ол хакда: «Сен Мелкиседек ялы эбеди руханысың» дийип шаятлык эдипди.
18 Шейлеликде, өңки табшырык говшак ве нетиҗесиз боландыгы үчин Худай оны арадан айырды. 19 Себәби Мусаның кануны хич зады кәмиллиге етирип билмеди, йөне Худайың берен аҗайып умыды әхли зады кәмил этди. Биз ол умыт аркалы Худая якынлашярыс. 20 Худай хем ант ичип, Иса руханылык борҗуны берендир. 21 Себәби Худай руханылык борҗуны алан адамлар бабатда ант ичмәнди, эмма ол башга бири хакда ант ичип: «Ехова* ант ичйәр, ол пикирини үйтгетмез*, „Сен эбеди руханысың“» дийипди. 22 Шейдип, Иса хас говы әхтиң кепили болды. 23 Галыберсе-де, руханылар өлйәндиклери үчин гуллугыны довам эдип билмедилер. Ине, шонуң үчин хем оларың ерине башга руханылар гелип, гуллугы довам эдйәрдилер. 24 Эмма Иса эбеди яшаяндыгы үчин, онуң руханылыгы хич киме гечмез. 25 Ол өзи аркалы Худая якынлашянлары долы халас этмеги башаряндыр. Себәби ол хемише яшаяр ве Худая ялбарып, олара көмек этмегини сораяр.
26 Чүнки бизе вепалы, сада, языксыз, гүнәкәр адамлардан узакда болан ве шөхраты гөге етен баш руханы герекдир. 27 Бейлеки баш руханылардан тапавутлыкда, оңа хер гүн илки билен өз гүнәлери, соңра болса халкың гүнәлери үчин гурбан гетирмек герек дәлдир. Себәби ол өзүни бир гезекде хемишелик хөдүрледи. 28 Мусаның кануны гүнәли адамлары баш руханы эдип беллейәр, эмма Канундан соң гелен ве ант аркалы берлен вада хемишелик кәмил болан Худайың Оглуны белләндир.