Ресулларың ишлери
18 Павлус Афиныдан гайдып, Коринф шәхерине гелди. 2 Бу ерде ол Акила атлы бир ехуда душды. Ол Понтусда доглупды ве якында аялы Прискилла билен Италиядан гелипди. Себәби император Клавдий әхли ехудылара Римден чыкмагы буйрупды. Шейлеликде, Павлус оларың янына барды. 3 Кәрлери бир болансоң, Павлус оларың өйүнде яшап, олар билен биле чадыр тикйәрди. 4 Ол хер Сабат гүни* синагогада адамлар билен пикир алшып, ехудылары ве греклери ынандырярды.
5 Силас билен Тимотеос Македониядан геленде, Павлус Худайың сөзүни хас ыхласлы вагыз эдип башлады ве ехудылара Исаның, хакыкатдан-да, Месихдигине шаятлык эдйәрди. 6 Олар Павлуса гаршы чыкып, сөгенлеринде, ол донуны силкди-де*: «Сиз өлүмиңизе өзүңиз гүнәкәрсиңиз. Муңа мен җогапкәр дәлдирин. Инди мен гидип, өзге миллетлере вагыз эдерин» дийди. 7 Ол синагогадан чыкып, Титивус Юстус атлы бир худайхон адамың өйүне барды. Онуң өйи синагога дегип дурды. 8 Синагога ёлбашчысы Криспус бүтин өй-ичериси билен Халыпамыза иман этди. Коринфлилериң көпүси-де хош хабары эшидип, иман этдилер ве сува чүмдүрилдилер. 9 Халыпамыз хем Павлуса гиҗе гөрнүшде шейле дийди: «Горкма, вагыз этмегиңи довам эт, асла бес этме. 10 Чүнки мен сениң билендирин. Хич ким саңа топулмазам, зыянам етирмез. Бу шәхерде маңа иман этҗек адамлар көпдүр». 11 Шейлеликде, Павлус ол ерде бир йыл алты ай галып, олара Худайың сөзүни өвретди.
12 Галион Ахаяның велаят хәкимикә*, ехудылар билелешип, Павлуса гаршы чыкдылар ве оны хөкүм эдилйән ере элтип: 13 «Бу адам кануна гаршы гелйән ёл билен Худая сежде этдирҗек боляр» дийдилер. 14 Павлус яңы геплеҗек боланда, Галион олара шейле дийди: «Эй ехудылар, бу адам, хакыкатдан-да, бир эрбет иш эден болса, онда мен сизи диңләрин. 15 Эгер сиз сөз үстүнде, адамлар ве кануныңыз барада дава эдйән болсаңыз, онда оны өзүңиз чөзүң. Мен бу затларда сизе казылык этмек ислемейәрин». 16 Шейдип, ол мәрекәни хөкүм эдилйән ерден ковуп гойберди. 17 Шонда олар синагога ёлбашчысы Сосфени тутуп, оны хөкүм эдилйән ериң өңүнде уруп башладылар. Галионың болса бу затлар азарына-да дәлди.
18 Павлус ол ерде ене-де бирнәче гүн болды. Соңра доганлар билен хошлашып, янына Прискилла билен Акиланы алды-да, гәмиде Сирия гитди. Ол Худая берен вадасыны берҗай этмек үчин Кенхреяда сачыны алдырды. 19 Эфесе геленлеринде, Павлус олары шол ерде гойды-да, өзи синагога гитди ве ехудылар билен Язгылар эсасында пикир алышды. 20 Олар Павлусдан көпрәк вагт галмагы хайыш этселер-де, ол разы болмады. 21 Олар билен хошлашып: «Эгер Ехова* ислесе, мен ене-де гелерин» дийди. Соңра Эфесден гәмә мүнүп, деңзиң үсти билен 22 Кайсария гитди. Ондан соң Иерусалиме гелип, йыгнакдакылар билен гөрүшди ве Антиохия гитди.
23 Павлус ол ерде бираз вагт боландан соң, Галатя юрдунда ве Фригия велаятында шәхерме-шәхер айланып, шәгиртлери беркидйәрди.
24 Шол вагт аслы александриялы Аполлос атлы бир ехуды Эфесе гелди. Ол Язгылары говы билйән дилевар адамды. 25 Ехованың* ёлуны өвренен бу адам рухда хыҗувлыды. Аполлос диңе Яхяның сува чүмдүрмеги барада билсе-де, Иса барадакы хакыкаты догры гүррүң берип өвредйәрди. 26 Ол синагогада батыргайлык билен вагыз эдип башлады. Прискилла билен Акила муны эшиденде, оны янларына алып, оңа Худайың ёлуны хас догры дүшүндирдилер. 27 Аполлос Ахая гитмекчи боланда, доганлар шол ердәки шәгиртлере хат язып, оны мәхирли гаршыламагы табшырдылар. Аполлос ол ере баранда, Худайың мерхемети аркалы иман эденлере көп көмек этди. 28 Ол җемагатың өңүнде ачык ве гүйчли хыҗув билен ехудыларың өвредйән затларының нәдогрудыгыны биркемсиз субут эдйәрди, Язгылар эсасында Исаның Месихдигини гөркезйәрди.