Матта
4 Соңра Худайың рухы Исаны чөле алып гитди. Ол ерде Иблис оны сынамага башлады. 2 Иса 40 гиҗе-гүндиз агыз бекләп аҗыкды. 3 Сынагчы онуң янына гелип: «Эгер сен Худайың оглы болсаң, шу дашлара чөрек болмагы буюр» дийди. 4 Эмма Иса оңа шейле җогап берди: «Язгыларда: „Адам диңе бир чөрек билен дәл, эйсем, Ехованың* агзындан чыкян хер бир сөз билен хем яшамалыдыр“ дийип язылгыдыр».
5 Соңра Иблис оны мукаддес шәхере* алып гитди ве ыбадатхананың депесине* чыкарып, 6 оңа: «Эгер сен Худайың оглы болсаң, өзүңи ашак зың, себәби Язгыларда шейле язылгы: „Ол перишделерине сен хакда буйрук берер“ ве „Аякларың даша дегмез ялы, олар сени эллеринде гөтерерлер“» дийди. 7 Иса оңа: «Язгыларда: „Худайың Ехованы* сынама“ дийип хем язылгыдыр» дийди.
8 Соңра Иблис Исаны өрән бейик дага чыкарып, оңа дүнйәниң әхли патышалыкларыны ве оларың шан-шөхратыны гөркезди. 9 Иблис оңа: «Эгер сен дыза чөкүп, маңа сежде этсең, бу затларың әхлисини саңа берерин» дийди. 10 Шонда Иса: «Янымдан айрыл, Шейтан! Язгыларда: „Худайың Ехова* сежде этмели ве диңе оңа мукаддес гуллугы берҗай этмели“ дийип язылгыдыр» дийди. 11 Шонда Иблис Исаның янындан гитди, перишделер хем гелип, Иса хызмат эдип башладылар.
12 Иса Яхяның туссаг эдилендигини эшидип, Җелилә гитди. 13 Ол Назаретден гайдандан соң, Зебулун ве Нафталы этрапларына гелип, деңзиң якасында ерлешйән Капернаумда яшап башлады. 14 Шейдип, Ишая пыгамбер аркалы айдылан шу сөзлер берҗай болды: 15 «Эй Зебулун ве Нафталы топрагы! Деңзе барян ёлдакы ве Иорданың аңырсындакы Җелиле халкы!* 16 Гараңкылыкда отуран адамлар гүйчли ягтылык гөрди. Өлүм көлегесинде отуранлара нур сачылды». 17 Шондан соң Иса: «Тоба эдиң, себәби гөгүң Патышалыгы* голайлашды» дийип, вагыз этмәге башлады.
18 Иса Җелиле деңзиниң* кенарындан йөрәп барярка, ики доганы, ягны Петрус дийилйән Симуны хем-де онуң доганы Андреасы гөрди. Олар балыкчыды ве деңзе тор зыңып дурдулар. 19 Иса олара: «Мениң ызыма дүшүң. Мен сизи адам тутян балыкчы эдейин» дийди. 20 Олар шол бада торларыны ташлап, онуң ызына дүшдүлер. 21 Соңра Иса ол ерден гидип, башга ики доганы, ягны Зебедейиң оглы Якубы ве онуң доганы Яхяны гөрди. Олар какалары Зебедей билен гайыкда торларыны беҗерип отырдылар. Иса олары хем чагырды. 22 Олар деррев гайыкларыны ве какасыны гоюп, онуң ызына дүшдүлер.
23 Соңра ол бүтин Җелиләни айланып, адамлара синагогаларда* өвредйәрди ве Патышалык барадакы хош хабары вагыз эдйәрди. Ол дүрли кеселли ве сыркав адамлары сагалдярды. 24 Исаның ады бүтин Сирия яйрады. Онуң янына кеселден хем-де сыркавлыкдан эҗир чекйәнлериң әхлисини, җын-арвахлы, гарагуш ве ысмаз кеселли адамлары гетирдилер. Иса хем олары сагалтды. 25 Шейлеликде, Җелиледен, Декаполисден*, Иерусалимден, Яхудадан ве Иорданың аңырсындан энчеме адамлар онуң ызына дүшдүлер.