Ресулларың ишлери
2 Пентикост* гүни шәгиртлериң әхлиси шол өңки ерде йыгнандылар. 2 Бирденкә гүйчли елиң өвсүши кимин гөкден бир сес гелди, оны җайда отуранларың хеммеси эшитди. 3 Шонда от ялынларына меңзеш диллер пейда болды, олар бөлүнип, херсиниң үстүнде дурды. 4 Оларың хеммеси мукаддес рухдан долуп, рухуң берен укыбына гөрә дүрли диллерде гепләп башладылар.
5 Шол вагт Иерусалиме дүнйәниң дүрли күнҗегинден худайхон ехудылар гелипди. 6 Сес эшидиленде, ол ере мәреке йыгнанды ве олар шәгиртлериң дүрли диллерде геплейәндиклерини эшидип, алҗыраңңы ягдая дүшдүлер. 7 Догрудан-да, олар хайран галышып, шейле дийдилер: «Эйсем, бу геплейән адамлар җелилели дәлми? 8 Олар нәдип бизиң эне дилимизде геплейәрлер? 9 Биз парфиялылар, мидиялылар, иламлылар, Месопотамияның, Яхуданың, Каппадокияның, Понтусың, Азияның* яшайҗылары, 10 фригиялылар, памфилиялылар, мүсүрлилер, Киренаның голайында яшаян ливиялылар, Римден гелен ехудылар билен ехуды динине геченлер*, 11 критлилер ве араплар болуп, буларың Худайың гудратлы ишлери барада өз дилимизде гүррүң берйәндиклерини эшидйәрис». 12 Хава, оларың бары гең галып, бири-бирине: «Бу нәме болдугыка?» дийишйәрдилер. 13 Эмма башгалар оларың үстүнден гүлүп: «Олар сүйҗи шерапдан җулк болупдырлар» диййәрдилер.
14 Шонда Петрус бейлеки 11 ресул билен биле еринден турды-да, батлы сес билен шейле дийди: «Эй Яхуданың ве тутуш Иерусалимиң яшайҗылары, айтҗак сөзлерими үнсли диңләң. 15 Бу адамлар сизиң пикир эдишиңиз ялы, серхош дәл. Себәби сагат яңы үч* болды. 16 Гөрйән затларыңыз Ёвел пыгамбериң айдан шу сөзлериниң ерине етмеги үчин болды: 17 „Худай шейле диййәр: „Соңкы гүнлерде мен хер бир адама өз рухумдан дөкерин. Шонда огул-гызларыңыз пыгамберлик эдер, яшларыңыз гөрнүшлер, гаррыларыңыз дүйшлер гөрер. 18 Шол гүнлер мен рухумы хатда гулларыма, гырнакларыма-да дөкерин, олар хем пыгамберлик эдерлер. 19 Мен асманда гудратлар, ер йүзүнде аламатлар — ган, от ве гойы үмүр гөркезерин. 20 Ехованың* бейик ве шөхратлы гүни гелмезден өң, Гүн шөхлесини бермез, Ай хем ган ялы гызыл болар. 21 Шонда Ехованың* адыны чагыран хер бир адам халас болар““.
22 Эй ысрайыл халкы, шу сөзлере гулак асың: назаретли Исаны Худай иберди. Худай ол аркалы сизиң араңызда улы ве гудратлы ишлери хем-де аламатлары гөркезди. Муны өзүңиз хем билйәнсиңиз. 23 Сиз оны эрбет адамларың үсти билен пүрсе чүйләп өлдүрдиңиз. Худай мунуң шейле болҗакдыгыны өңүнден билип, муңа ёл берди. 24 Эмма Худай оны дирелдип, өлүмиң сүтеминден* азат этди. Себәби өлүмиң оны баглап сакламагы мүмкин дәлди. 25 Давут хем ол хакда шейле дийипди: „Мен Ехованы* элмыдама өңүмде* гөрйәрин. Онуң саг тарапымдадыгы үчин, мен хич хачан алада этмерин. 26 Шол себәпли йүрегим хемише шатланар ве дилим җуда бегенер. Мен* умытда яшарын. 27 Себәби сен мени Габырда* галдырмарсың, вепалы гуллукчыңың бедениниң чүйремегине ёл бермерсиң. 28 Сен маңа яшайша элтйән ёлы гөркездиң; йүрегими өз хузурыңда улы шатлыкдан долдурдың“.
29 Доганлар, атамыз Давут хакда чекинмән геплемәге* маңа ругсат эдиң. Ол арадан чыкды ве җайланды. Онуң габры хенизе ченли-де бар. 30 Давут пыгамберди, ол өз неслинден* болан бириниң тагта чыкҗакдыгыны билйәрди. Себәби Худай бу хакда ант ичип, касам эдипди. 31 Давут Месихиң дирелҗекдигини билйәрди. Шол себәпли ол Месихиң Габырда* галмаҗакдыгыны ве онуң бедениниң чүйремегине Худайың ёл бермеҗекдигини өңүнден айтды. 32 Худай Месихи өлүмден дирелтди, бизиң әхлимиз муңа шаятдырыс. 33 Нетиҗеде, ол Худайың сагында отурды ве Атаның вада берен мукаддес рухуны алды. Сизиң хәзир гөрүп-эшидишиңиз ялы, ол бу рухы бизиң үстүмизе индирди*. 34 Давут гөге галмады, йөне ол шейле дийди: „Ехова* мениң Халыпама: 35 „Душманларыңы аякларың астында гойянчам, саг тарапымда отур“ дийди“. 36 Шейлеликде, тутуш ысрайыл өйи, шуны билип гой: сизиң пүрсе чүйлән Исаңызы Худай Ёлбашчы ве Месих эдип белләндир».
37 Мәреке бу сөзлери эшиденде, ынсаплары эзъет берип башлады. Шонда олар Петрус билен бейлеки ресуллара йүзленип: «Доганлар, инди биз нәме этмели?» дийдилер. 38 Петрус шейле дийди: «Гүнәлериңизиң өтүлмеги үчин тоба эдиң ве Иса Месихиң ады билен сува чүмдүрилиң. Шонда сиз Худайың җомартлык билен берйән мукаддес рухуны аларсыңыз. 39 Ол сизе, чагаларыңыза, узакда яшаянларың әхлисине ве Ехова* Худайымызың чагыранларының хеммесине вада берилди». 40 Петрус башга-да көп сөзлер билен биркемсиз шаятлык эдип, олары: «Халас болмак үчин, шу азгын несилден өзүңизи гораң» дийип хөвеслендирди. 41 Онуң сөзлерини хөвес билен кабул эден адамлар сува чүмдүрилдилер. Шол гүн шәгиртлере 3 мүңе голай адам гошулды. 42 Олар ресуллардан билим алмакларыны довам эдйәрдилер, бир-бири билен затларыны пайлашярдылар, биле ийип-ичйәрдилер ве дога эдйәрдилер.
43 Ресуллар көп гудратлары ве аламатлары гөркезйәрдилер. Муны гөрен адамлар Худая хормат гоюп башладылар. 44 Исаның шәгирди боланларың хеммеси биле йыгнанышярдылар ве бар затларыны бири-бири билен пайлашярдылар. 45 Олар өз ерлерини ве эмләклерини сатып, хер кимиң зерурлыгына гөрә пайлаярдылар. 46 Олар бир максат билен хер гүн ыбадатханада йыгнанышярдылар, бир-бирлериниң өйлерине барярдылар ве ийип-ичйән затларыны улы шатлык билен ак йүрекден пайлашярдылар. 47 Олар Худайы шөхратландырып, адамларың хорматыны газанярдылар. Ехова* болса халас этҗек адамларыны хер гүн шәгиртлере гошярды.