Римлилер
11 Онда Худай өз халкындан йүз өвүрдими? Элбетде, ёк! Мен хем Ыбрайымың неслинден*, бенямин тайпасындан болан ысрайыллыдырын. 2 Худай илкибашда назар салан халкындан йүз өвүрмеди. Сиз Ыляс пыгамбериң ысрайыллылар бабатда Худая зейренендиги барада Язгыларда нәме дийилйәнини билмейәрмисиңиз? 3 Ыляс шейле дийди: «Ехова*, олар сениң пыгамберлериңи өлдүрдилер, гурбанлык сыпаларыңы ёк этдилер. Мен еке галдым, инди олар мени-де өлдүрҗек болуп гөзләп йөрлер». 4 Шонда Худай оңа нәме җогап берди? Ол: «Мениң хениз 7 мүң саны адамларым бар, олар Багалың өңүнде дыза чөкмедилер» дийди. 5 Шонуң ялы хәзир хем Худайың мерхемети аркалы сайланан галынды бар. 6 Олар эден ишлери аркалы дәл-де, Худайың мерхемети аркалы сайландылар. Эгер олар эден ишлери аркалы сайланан болсадылар, онда Худайың мерхеметиниң гереги болмазды.
7 Онда нәме диели? Ысрайыл халкы ислән задына етип билмеди, эмма Худайың сайланлары оңа етди. Галанлары болса гулак асмакдан йүз өвүрдилер. 8 Себәби Язгыларда: «Худай олары рухы тайдан гүйчли ука гидирди. Шонуң үчин шу гүне ченли оларың гөзлери болса-да, гөрмейәрлер, гулагы болса-да, эшитмейәрлер» дийилйәр. 9 Давут хем шейле диййәр: «Гой, оларың сачагы өзлерине дузак, тор, бүдреме дашы ве җеза болсун. 10 Гой, оларың гөзлери гөрмез ялы гараңкырасын, биллери хемишелик бүкүлсин».
11 Олар гайдып турмаз ялы бүдрәп йыкылдылармы? Элбетде, ёк! Эмма ысрайыллыларың эден гүнәси башга халкларың халас болмагына ёл ачды ве оларың муңа гахары гелди*. 12 Эгер оларың эден гүнәси зерарлы дүнйә рухы тайдан баяян болса ве оларың азалмагы башга халклары рухы тайдан бай эдйән болса, онда оларың долы саны хас-да бай этсе герек!
13 Мен башга халклара йүзленйәрин. Башга халклара иберилен ресул боландыгым үчин, мен гуллугымы шөхратландырярын*. 14 Мен өзүм ялы ехудыларда* гөриплиги оярып, оларың кәбириниң халас болмагы үчин җан эдйәрин. 15 Эгер оларың Худайдан айра дүшмеги дүнйәни Онуң билен ярашдыран болса, онда оларың кабул эдилмеги өлен адамың дирелиши ялы болмазмы нәме? 16 Эгер хамырың илкинҗи бөлеги мукаддес болса, онда тутуш хамыр хем мукаддесдир. Эгер агаҗың көки мукаддес болса, онда шахалар хем мукаддесдир.
17 Сиз ябаны зейтун агаҗының шахалары болсаңыз-да, Худай хакыкы зейтун агаҗының кәбир шахаларыны дөвүп, сизи оларың арасына сапды. Инди сиз онуң көкүнден пейда алян болсаңыз, 18 онда бейлеки шахалардан өзүңизи улумсы тутмаң*. Эгер өзүңизи улумсы тутян* болсаңыз, онда сиз көки дәл-де, көкүң сизи саклаяндыгыны унутмаң. 19 Онда сиз: «Шахалар мениң сапылмагым үчин дөвүлди» диерсиңиз. 20 Хава, догры айдярсыңыз! Олар иманының говшакдыгы себәпли кесилипди, эмма сиз иманда берк дурсуңыз. Шонуң үчин улумсы болмакдан әгә болуң. 21 Эгер Худай хакыкы шахалары гайгырмадык болса, онда ол сизи-де гайгырмаз. 22 Худай хем ягшылык эдйәндир, хем гахарланяндыр. Ол йыкылянлара гахарланяр, сизе болса ягшылык эдйәр. Эгер сиз мундан бейләк-де онуң гөвнүнден турсаңыз, ол сизе ягшылык эдер, ёгсам сизи-де кесип ташлар. 23 Эгер олар ене-де иман эдип башласалар, олар хем сапыларлар. Себәби Худай тәзеден сапмагы башаряндыр. 24 Худай ябаны зейтун агаҗының шахалары болан сизи кесип, хакыкы зейтун агаҗына сапан болса, онда кесилип айрылан хакыкы шахалары-да ене-де ызына сапмазмы нәме?
25 Доганлар, сиз өз гөзүңизде акылдар болмаз ялы, мукаддес сыр хакда билмегиңизи ислейәрин. Кәбир ысрайыллылар гулак асмакдан йүз өвүрдилер. Шейле ягдай Худайың башга халкдан сайланлары йыгнанянча довам эдер. 26 Шонда бүтин ысрайыл халкы халас болуп билер. Себәби Язгыларда шейле дийилйәр: «Халасгәр Сиондан гелер ве Якупдан эрбетлиги айрар. 27 Бу мениң олар билен баглашан әхтимдир, чүнки мен оларың гүнәлерини айрарын». 28 Догрудан-да, оларың хош хабардан йүз өврүп, Худайың душманы болмагы сизе пейда гетирди. Эмма ата-бабаларының хатырасы үчин, Худай оларың кәбирини өзүне дост сайлады. 29 Худай олары чагырандыгына ве берен совгатларына өкүнмез. 30 Себәби сиз өң Худая гулак асмаярдыңыз, йөне ехудыларың гулак асмазлыгы себәпли, сизе рехим эдилди. 31 Шейдип, ехудыларың гулак асмазлыгы аркалы Худай сизе рехим этди, йөне ол ехудылара-да рехим эдер. 32 Худай хемме адамлара рехим этмек үчин оларың әхлисине гулак асмазлыгың гулы болмага ёл берди.
33 Худайың берекети, гөр, нәхили болдур! Акылдарлыгы ве билими дийсең чуңдур! Онуң хөкүмлериниң ве әхли ёлларының аңырсына етип болян дәлдир! 34 Себәби шейле язылгыдыр: «Ехованың* пикирине ким дүшүнип билер я-да ким оңа маслахат берип билер?» 35 Я-да: «Худай гайтарып берер ялы, ким оңа илки зат берди?» 36 Себәби хемме зат ондандыр, ол аркалы бардыр ве онуң үчиндир. Оңа бакы шөхрат болсун. Омын.