Римлилер
13 Шейлеликде, хер кес* ёкары хәкимиетлере табын болсун. Себәби хәкимиетлериң әхлиси Худайдандыр ве Худай олара хөкүм сүрмәге ругсат берендир. 2 Диймек, хөкүмете гаршы чыкян адам Худайың ёла гоян задына гаршы гидйәндир. Оңа гаршы гидйән адамлар болса хөкүме сезевар боларлар. 3 Себәби ёкары хәкимиетлерден говы иш эдйән адамлар дәл-де, эрбет иш эдйәнлер горкмалыдыр. Эгер сиз олардан горкмак ислемейән болсаңыз, онда ягшы ишлери эдиң. Шонда хөкүметиң берекелласыны аларсыңыз. 4 Себәби олар сизиң пейдаңыз үчин Худайың гуллукчыларыдыр. Эгер эрбетлик этсеңиз, онда олардан горкуң, чүнки оларың сизе темми бермәге ыгтыяры бардыр. Ол Худайың гуллукчысыдыр, эрбет иш эдйәнлере темми бермек* үчин белленендир.
5 Шейлеликде, сиз хәкимиетлере диңе бир теммиден гачмак үчин дәл-де, ынсабыңыза гөрә хем табын болмага борчлусыңыз. 6 Олар Худайың гуллукчылары хөкмүнде элмыдама җемгыетчилик ишлерини ерине етирйәрлер. Ине, шонуң үчин хем сиз салгытлары төлейәрсиңиз. 7 Хер киме бермелисини бериң: салгыт бермелилере салгыды; гүмрүк бермелилере гүмрүги; хормат гоймалылара хорматы; сарпа гоймалылара сарпа гоюң.
8 Сиз бир-бириңизи сөймекден башга хич затда бергили болмаң. Себәби якыныны сөййән адам кануны берҗай эдйәндир. 9 Канунда «зына этме, адам өлдүрме, огурлык этме, илиң задына гөз гыздырма» дийлен табшырыклар бардыр. Шу ве бейлеки табшырыклар болса: «Якыныңы өзүңи сөйшүң ялы сөй» диен сөзде җемленендир. 10 Сөййән адам якынына эрбетлик эдйән дәлдир. Себәби сөйги кануның берҗай эдилмегидир.
11 Шонуң үчин булары берҗай эдиң. Себәби белленен вагтың голайландыгыны билйәнсиңиз. Укудан оянмалы сагадыңыз эййәм гелип етди, чүнки халас болмалы вагтымыз иман эден вагтымыздакыдан хас голайлашандыр. 12 Гиҗе тамамланып, гүндиз голайлашяр. Шонуң үчин түмлүге дегишли ишлери эгнимизден чыкарып, ягтылыгың ярагларыны гейнелиң. 13 Гелиң, кейпи-сапалы отурышыклардан, серхошлыкдан, ахлаксыз ве хаясыз ишлерден*, дава-җенҗелден, гөрипликден гача дуруп, гүндиздәки ялы эдепли гезелиң. 14 Халыпамыз Иса Месихиң гөрелдесине эерип, тен хөвеслерини канагатландырмагың аладасыны этмәлиң.