Ресулларың ишлери
15 Яхудадан Антиохия гелен кәбир доганлар: «Эгер Мусаның канунына гөрә сүннетленмесеңиз, халас болуп билмерсиңиз» дийип, өвредип башладылар. 2 Эмма Павлус ве Барнабас олар билен бираз чекишип, җеделлешдилер. Шонда доганлар Павлус билен Барнабасы ве башга-да кәбир доганлары шу меселе боюнча Иерусалимдәки ресулларың хем-де яшулуларың янына ибердилер.
3 Йыгнагың агзалары олары ярты ёла ченли уградып, ызларына доландылар. Павлус, Барнабас ве бейлеки доганлар болса Финикия билен Самария барып, башга миллетдәки адамларың Худая сежде эдип башландыгыны җикме-җик гүррүң бердилер. Доганлар муны эшидип, өрән бегендилер. 4 Иерусалиме геленлеринде, йыгнагың агзалары, ресуллар ве яшулулар олары мәхирли гаршыладылар. Павлус билен Барнабас Худайың олар аркалы эден энчеме ишлерини гүррүң бердилер. 5 Шонда өң фарисейлериң дини топарына* дегишли боланларың кәбири еринден туруп: «Ехуды болмадык имандашлары сүннетлемели, олара Мусаның кануныны берҗай этмеги табшырмалы» дийдилер.
6 Ресуллар ве яшулулар бу меселе бабатда маслахат этмек үчин йыгнанышдылар. 7 Гызгалаңлы чекишмеден соң, Петрус еринден турды-да, шейле дийди: «Адамлар, доганлар, сиз башга халкдан болан адамларың хош хабары эшидип, иман этмеклери үчин Худайың илки мени сайландыгыны билйәнсиңиз. 8 Йүреклери билйән Худай олардан разыдыгыны мукаддес рухуны берип, айдың гөркезипди. 9 Шейдип, Худай олар билен бизиң арамызда тапавут гоймады. Гайтам, иман эдендиклери үчин йүреклерини арассалады. 10 Онда нәме үчин сиз ата-бабаларымызың хем, бизиң хем гөтерип билмедик задымызы оларың үстүне йүкләп, Худайы сынаярсыңыз? 11 Аслында, биз хем олар ялы Халыпамыз Исаның мерхемети аркалы халас болҗакдыгымыза иман эдйәрис».
12 Шейлеликде, отуранларың бары дымдылар-да, Барнабас билен Павлусы диңләп башладылар. Олар Худайың өзлери аркалы башга халкларың арасында гөркезен энчеме аламатлары ве гудратлары барада гүррүң бердилер. 13 Барнабас билен Павлус гүррүңини тамамланда, Якуп шейле дийди: «Адамлар, доганлар, маңа гулак асың. 14 Симон* бизе Худайың Өз адыны гөтермеклери үчин өзге миллетли адамлара илкибашда нәдип үнс берендигини бирин-бирин гүррүң берди. 15 Пыгамберлер китабында хем шейле язылгыдыр: 16 „Мундан соң мен доланып, Давудың йыкылан чадырыны тәзеден дикелдерин; мен онуң хараба болан ерлерини гуруп беҗерерин. 17 Шонда галан адамлар мениң адымы гөтерйән башга халклар билен бирликде Ехованы* йүрекден агтарып билерлер — дийип, бу затлары эдйән Ехова* айдяр. 18 Ол муны гадымы дөвүрден бәри йүрегине дүвүпди“. 19 Мениң пикиримче, Худая иман эден башга халклара кынчылык дөретмели дәл. 20 Йөне олара шу затлардан, ягны бутлар билен баглы затлардан, ахлаксызлыкдан*, боглан* хайванларың этинден ве гандан гача дурмагы язмалы. 21 Себәби гадымы дөвүрлерден бәри хер шәхерде Мусаның язанларыны ыглан эдйән адамлар бар. Онуң язан затлары хер Сабат гүни* синагогаларда окаляр».
22 Соңра ресуллар, яшулулар ве йыгнагың бүтин агзалары өз араларындан ики адамы, ягны Барсаба дийилйән Яхуданы ве Силасы сайлап, олары Павлус хем-де Барнабас билен Антиохия ибермеги макул билдилер. Сайланан ики адам доганларың арасында ёлбашчылык эдйәрди. 23 Доганлар аркалы шейле хат уградылды:
«Антиохия, Сирия ве Киликиядакы башга халклардан болан доганлара ресуллардан хем-де яшулулардан салам болсун! 24 Биз шу ерден баран кәбир адамларың сизе кынчылык дөредйәндигини эшитдик. Олар сизе бизиң табшырмадык затларымызы айдып, иманыңызы говшатҗак болярлар. 25 Шонуң үчин биз ики адамы сайлап, олары Барнабас ве Павлус билен биле сизиң яныңыза ибермеги бирагыздан макул билдик. 26 Барнабас билен Павлус Халыпамыз Иса Месихиң ады үчин җанларыны ховп астына салан адамлардыр. 27 Шейлеликде, бизиң айданларымызы сизе сөзме-сөз етирер ялы, оларың янында Яхуда билен Силасы-да ёлладык. 28 Себәби биз мукаддес рухуң көмеги билен сизден шу ваҗып затлардан башга хич зады талап этмезлиги макул билдик: 29 бутлара гурбан эдилен затлардан, гандан, боглан* хайванларың этинден ве ахлаксызлыкдан* гача дуруң. Эгер сиз өзүңизи шу затлардан горасаңыз, эден ишиңиз ровачланар. Саг-саламат болуң!»
30 Ол ерден гайдан доганлар Антиохия гелип, бүтин топары йыгнадылар-да, олара хаты бердилер. 31 Хаты окап, олар рухландылар, бегендилер. 32 Яхуда билен Силас пыгамбер боландыклары үчин энчеме нутуклар билен чыкыш эдип, доганлары рухландырдылар ве беркитдилер. 33 Бу ики доган ол ерде бирнәче вагт боландан соң, ерли доганлар ягшы арзувлар билен олары ёла салдылар. 34 *—— 35 Эмма Павлус билен Барнабас Антиохияда галып, башгалар билен билеликде хош хабары, ягны Ехованың* сөзүни өвретмеги ве вагыз этмеги довам этдилер.
36 Бирнәче гүн геченсоң, Павлус Барнабаса: «Гел*, инди Ехованың* сөзүни вагыз эден шәхерлеримизе доланып, доганлары идәли, оларың хал-ягдайыны соралы» дийди. 37 Барнабас яны билен Маркус дийилйән Яхяны-да алып гитмекчи болды. 38 Эмма Павлус муны макулламады, себәби Маркус олары Памфилияда ташлап гидипди. 39 Шонда оларың арасында гүйчли дава туруп, бири-биринден айрылдылар. Барнабас яны билен Маркусы алып, гәмиде Кипре гитди. 40 Павлус болса Силасы сайлады. Доганлар Павлус үчин Ехованың* мерхеметини диләп, олары ёла салдылар. 41 Ол Сирия ве Киликияның үсти билен гечип, йыгнаклары беркидйәрди.